ଭୁବନେଶ୍ୱର,୧୨ା୧୧(ବ୍ୟୁରୋ): ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଗିରଫ ହୋଇ ଜେଲ ଯାଇଥିବା ଓଡ଼ିଶା ପୋଲିସ ହାଉସିଂ ଆଣ୍ଡ ଓ୍ବେଲ୍ଫେୟାର କର୍ପୋରେଶନ(ଓପିଏଚ୍ଡବ୍ଲ୍ୟୁସି) ଡେପୁଟି ମ୍ୟାନେଜର ପ୍ରତାପ କୁମାର ସାମଲଙ୍କୁ ଗୁରୁବାର ଚାକିରିରୁ ନିଲମ୍ବନ କରାଯାଇଛି। ବିଭାଗୀୟ କାର୍ଯ୍ୟାନୁଷ୍ଠାନ ସ୍ବରୂପ ତାଙ୍କ ବିରୋଧରେ ଏହି ପଦକ୍ଷେପ ନିଆଯାଇଥିବା କୁହାଯାଉଛି। ପ୍ରତାପଙ୍କ ଘରେ ମଙ୍ଗଳବାର ଭିଜିଲାନ୍ସ ଟିମ୍ ଚଢ଼ାଉ କରି ବିପୁଳ ପରିମାଣର ଆୟ ବହିର୍ଭୂତ ସମ୍ପତ୍ତି ଠାବ କରିବା ପରେ ବୁଧବାର ତାଙ୍କୁ ଗିରଫ କରାଯାଇଥିଲା। ଏବେ ଜେଲରେ ଅଛନ୍ତି। ଅପରପକ୍ଷରେ ପ୍ରତାପଙ୍କ ଓଡ଼ିଆ ସିନେମା(ଓଲିଉଡ୍) ଲିଙ୍କ୍ ନେଇ ଖୋଳତାଡ଼ ଆରମ୍ଭ ହୋଇଛି। ପ୍ରତାପ ୨ଟି ବ୍ୟୟବହୁଳ ଓଡ଼ିଆ ସିନେମାରେ ଟଙ୍କା ଲଗାଇଥିଲେ ବୋଲି ତଦନ୍ତ ସମୟରେ ଜଣାପଡ଼ିଛି। ଫିଲ୍ମରେ ସ୍ତ୍ରୀ ସସ୍ମିତା ସାମଲଙ୍କୁ ପ୍ରଯୋଜକ କରିଥିଲେ। ଏପରି କି ଆଗକୁ ମଧ୍ୟ ଓଲିଉଡ୍ରେ ନିବେଶ କରିବାକୁ ଯୋଜନା କରୁଥିବା କୁହାଯାଉଛି। ପ୍ରତାପ ଏବେ ଜେଲରେ ଥିବାରୁ ଭିଜିଲାନ୍ସ ତାଙ୍କୁ ରିମାଣ୍ଡରେ ଆଣି ଆୟ ବହିର୍ଭୂତ ସମ୍ପତ୍ତିର ଉତ୍ସ ଖୋଜିବା ସହ ଓଲିଉଡ୍ ଲିଙ୍କ୍ ନେଇ ଅଧିକ ପଚରାଉଚୁରା କରିବାକୁ ଯୋଜନା ରଖିଛି।
୨୦୦୩ ଏବଂ ୨୦୦୫ରେ ନିର୍ମିତ ଦୁଇଟି ଓଡ଼ିଆ ସିନେମାରେ ପ୍ରତାପ କେତେ ଟଙ୍କା ଲଗାଇଥିଲେ, ପରଦା ଆଢୁଆଳରେ ରହି ଅନ୍ୟ କୌଣସିି ସମ୍ପର୍କୀୟଙ୍କ ଦ୍ୱାରା ସିନେମାରେ ଟଙ୍କା ଲଗାଇଥିଲେ କି ନାହିଁ ସେନେଇ ଭିଜିଲାନ୍ସ ପଚରାଉଚୁରା କରିବ। ସେହପରି ପ୍ରତାପଙ୍କ ସ୍ତ୍ରୀଙ୍କୁ ମଧ୍ୟ ଭିଜିଲାନ୍ସ ପଚରାଉଚୁରା କରିବ। ପୂର୍ବରୁ ଯେଉଁ ଫିଲ୍ମ ୨ଟିରେ ଟଙ୍କା ଲଗାଇଥିଲେ ଉକ୍ତ ଫିଲ୍ମର ପ୍ରଯୋଜନା ସଂସ୍ଥାର ସଦସ୍ୟମାନେ ଭିଜିଲାନ୍ସ ସ୍କାନରକୁ ଆସିପାରନ୍ତି ବୋଲି ମଧ୍ୟ ଚର୍ଚ୍ଚା ହେଉଛି। ପ୍ରଯୋଜକ, ନିର୍ଦ୍ଦେଶକଙ୍କୁ ଜେରା କଲେ କେତେ ଟଙ୍କା ପ୍ରତାପ ଲଗାଇଥିଲେ ତାହା ଜଣାପଡ଼ିବ।
ସୂଚନାଯୋଗ୍ୟ, ଅଦାଲତଙ୍କ ନିର୍ଦ୍ଦେଶକ୍ରମେ ଭିଜିଲାନ୍ସ ପକ୍ଷରୁ ୧୦ଟି ଟିମ୍ ମଙ୍ଗଳବାର ସକାଳେ ଏକକାଳୀନ ଭୁବନେଶ୍ୱରସ୍ଥିତ ଓପିଏଚ୍ଡବ୍ଲ୍ୟୁସି କାର୍ଯ୍ୟାଳୟ, ବାଲେଶ୍ୱର ସିମୁଳିଆସ୍ଥିତ ତାଙ୍କ ପୈତୃକ ଘର ସମେତ ୯ ସ୍ଥାନରେ ଚଢ଼ାଉ କରାଯାଇଥିଲା। ଚଢାଉ ସମୟରେ ପ୍ରତାପଙ୍କ ସମେତ ସ୍ତ୍ରୀ ସସ୍ମିତା ଓ ପୁଅ ପ୍ରୀତମ କୁମାରଙ୍କ ନାମରେ ଅମାପ ସମ୍ପତ୍ତି ଥିବା ଜଣାପଡ଼ିଥିଲା। ୫ଟି କୋଠା ସହ ମୋଟ ୨୭ଟି ଅସ୍ଥାବର ସମ୍ପତ୍ତି ଠାବ ହେବା ସହ ନଗଦ ୩୮.୧୨ ଲକ୍ଷ ଟଙ୍କା ଜବତ ହୋଇଥିଲା। ଏଥିସହ ପ୍ରତାପ ଓ ତାଙ୍କ ପରିବାର ସଦସ୍ୟଙ୍କ ବ୍ୟାଙ୍କ ଆକାଉଣ୍ଟରୁ ୧ କୋଟି ୬୧ ଲକ୍ଷ ୩୫ ହଜାର ୮୧୨ ଟଙ୍କା ଓ ୫୭ ଲକ୍ଷ ୭୨ ହଜାର ୧୫୦ ଟଙ୍କା ବୀମାରାଶି ଜବତ ହୋଇଥିଲା। ପ୍ରତାପ ଏବଂ ତାଙ୍କ ସ୍ତ୍ରୀଙ୍କ ନାମରେ ସର୍ବମୋଟ୍ ୧୪.୮୭କୋଟି ଟଙ୍କାର ଆୟ ବହିର୍ଭୂତ ସମ୍ପତ୍ତି ଠାବ ହୋଇଥିଲା। ପ୍ରତାପଙ୍କ ପ୍ରକୃତ ଆୟର ଏହା ୧୦୨୧ ପ୍ରତିଶତ ବୋଲି ଭିଜିଲାନ୍ସ କହିଥିଲା। ବ୍ୟାଙ୍କ ଆକାଉଣ୍ଟକୁ ଅଚଳ କରିବା ସହ ଭିଜିଲାନ୍ସ ପ୍ରତାପ ଓ ସ୍ତ୍ରୀ ସସ୍ମିତା ସାମଲଙ୍କ ନାମରେ ଏକ ମାମଲା (ନଂ. ୩୪/୨୧) ରୁଜୁ କରିଥିଲା।