ଲକ୍ଷ୍ନୌ,୨୪।୧: ଉତ୍ତରପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ଭାଜପାକୁ ସୁହାଉଥିବା ଜନମତ ସର୍ଭେକୁ ପ୍ରତ୍ୟାଖ୍ୟାନ କରିଛନ୍ତି ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ। ସେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ସବୁଠୁ ବଡ଼ ମିଛୁଆ କହିଛନ୍ତି।
“ଏହା ଜନମତ ସର୍ଭେ ନୁହେଁ। ଏଗୁଡ଼ିକ ହେଲା ଓପିଅମ ପୋଲ୍ସ। ଆମକୁ ଜଣାନାହିଁ, କେଉଁ ପ୍ରକାର ନିଶାର ପ୍ରଭାବରେ ସେମାନେ ଏଭଳି ଆକଳନ ଓ ତଥ୍ୟ ଦେଖାଉଛନ୍ତି” ବୋଲି ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ କହିଛନ୍ତି। ଏଥିସହ ବିଭିନ୍ନ ଟିଭି ଚ୍ୟାନେଲ ପକ୍ଷରୁ ପ୍ରଦର୍ଶିତ କରାଯାଉଥିବା ଜନମତ ସର୍ଭେ ଉପରେ ବ୍ୟାନ ଲଗାଇବା ପାଇଁ ତାଙ୍କ ଦଳ ପକ୍ଷରୁ କରାଯାଉଥିବା ଦାବିକୁ ସେ ଯର୍ଥାତ କହିଛନ୍ତି।
“ସେମାନଙ୍କ ବିଧାୟକ ନିର୍ବାଚନ ମଣ୍ଡଳୀରେ ପଶି ପାରୁ ନାହାନ୍ତି। ସେମାନଙ୍କୁ ମାଡ଼ ମରାଯାଉଛି। ସେମାନଙ୍କ ଏମ୍ପିଙ୍କୁ ଆକ୍ରମଣର ସମ୍ମୁଖୀନ ହେବାକୁ ପଡ଼ୁଛି। ଏପରି କି ଉପ ମୁଖ୍ୟମନ୍ତ୍ରୀ ଅପମାନିତ ହେଉଛନ୍ତି। ଦଳର ବିଧାୟକ, ଏମ୍ପି ଓ ମନ୍ତ୍ରୀଙ୍କୁ ଏଭଳି ଅପମାନିତ କରାଯିବାର ଅର୍ଥ ରାଜ୍ୟବାସୀ ସେମାନଙ୍କ ବିରୋଧରେ ଅଛନ୍ତି। ତେବେ ଜନମତ ସର୍ଭେରେ କ’ଣ ଦର୍ଶାଯାଉଛି? ସେମାନେ ଲୋକଙ୍କୁ ବିଭ୍ରାନ୍ତ କରିବାକୁ ଉଦ୍ୟମ କରୁଛନ୍ତି” ବୋଲି ସେ କହିଛନ୍ତି।
“ରାଜ୍ୟର ପ୍ରତ୍ୟେକ ବ୍ୟକ୍ତି ଦରଦାମ ବୃଦ୍ଧି ଓ ବେରୋଜଗାର ସମସ୍ୟା ଯୋଗୁ ପ୍ରଭାବିତ ହୋଇଛି। ଭାଜପା ଏ ସମ୍ପର୍କରେ ମୁହଁ ଖୋଲୁ ନାହିଁ। ଯଦି ଦରବୃଦ୍ଧି ଦୁଇ ଗୁଣା ଓ ଆୟ ଅଧା, ତେବେ ଖୁସି କେଉଁଠୁ ଆସିବ। ସେମାନେ ମିଛ ଭିଡିଓ, ବିଜ୍ଞାପନ ପ୍ରସାରିତ କରୁଛନ୍ତି। ସେମାନେ ବେଙ୍ଗଲ ଫ୍ଲାଏଓଭର, ଚାଇନାର ବିମାନ ବନ୍ଦର, ଆମେରିକାରେ କାର୍ଯ୍ୟାଳୟ ୟୁପିରେ ଦର୍ଶାଉଛନ୍ତି। ସେମାନଙ୍କ ପ୍ରତ୍ୟେକ ପ୍ରତିଶ୍ରୁତି ଜୁମଲା” ବୋଲି ପୂର୍ବତନ ମୁଖ୍ୟମନ୍ତ୍ରୀ କହିଛନ୍ତି।