ସାଲେମ,୨୭।୧୧: ତାମିଲନାଡୁରେ ହିନ୍ଦୀ ଭାଷାକୁ ଜବରଦସ୍ତ ଲଦିଦେବା ଲାଗି କେନ୍ଦ୍ର ସରକାରଙ୍କ ଉଦ୍ୟମକୁ ବିରୋଧ କରି ସାଲେମ ଜିଲାର ଜଣେ ୮୫ ବର୍ଷୀୟ ବ୍ୟକ୍ତି ଆତ୍ମାହୁତି ଦେଇଛନ୍ତି। ମୃତକ ଜଣକ ମେଟ୍ଟୁର ନିକଟ ଥାଲାଇୟୁର ଗ୍ରାମର ଥାଙ୍ଗାଭେଲ୍। ସେ ପୂର୍ବରୁ ଡିଏମ୍କେ କୃଷକ ମୋର୍ଚ୍ଚାର କେନ୍ଦ୍ରୀୟ ସଂଗଠକ ଭାବେ କାର୍ଯ୍ୟ କରୁଥିଲେ। କିଛିବର୍ଷ ହେଲା ସେ ସକ୍ରିୟ ରାଜନୀତିରୁ ଓହରିଯାଇଥିଲେ। ଶନିବାର ପୂର୍ବାହ୍ନ ସାଢ଼େ ୧୧ଟାରେ ଥାଙ୍ଗାଭେଲ୍ ଥାଲାଇୟୁରସ୍ଥିତ ଡିଏମ୍କେ କାର୍ଯ୍ୟାଳୟ ନିକଟରେ ପହଞ୍ଚତ୍ଥିଲେ। ସେ ପାର୍ଟି ଅଫିସ୍ ଆଗରେ ଏକ ବ୍ୟାନର ଲଗାଇଥିଲେ, ଯେଉଁଥିରେ ଲେଖାଥିଲା ତାମିଲ ଭାଷାଭାଷୀ ରାଜ୍ୟରେ ନରେନ୍ଦ୍ର ମୋଦି ସରକାର ହିନ୍ଦୀ ଭାଷାକୁ ଜବରଦସ୍ତ ଲଦିଦେବା ଉଚିତ ନୁହେଁ। ହିନ୍ଦୀରେ ପଢ଼ିବା ଦ୍ୱାରା ରାଜ୍ୟର ଛାତ୍ରୀଛାତ୍ରଙ୍କ ପାଠପଢ଼ା ପ୍ରଭାବିତ ହେବ। ହିନ୍ଦୀରୁ ଆମକୁ ମୁକ୍ତି ଦିଅ ବୋଲି ସେଥିରେ ୩ ଥର ଲେଖାଯାଇଥିଲା। ଏହା ପରେ ସେ ଦେହରେ କିରୋସିନ୍ ଢାଳି ନିଆଁ ଲଗାଇଦେଇଥିଲେ ଓ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା। ତାମିଲନାଡ଼ୁ ଶ୍ରମ କଲ୍ୟାଣ ମନ୍ତ୍ରୀ ସି.ଭି. ଗଣେଶନ ଓ ଅନ୍ୟ ଦଳୀୟ ନେତାମାନେ ଘଟଣାସ୍ଥଳରେ ପହଞ୍ଚତ୍ ଥାଙ୍ଗାଭେଲ୍ଙ୍କ ପରିବାରକୁ ସମବେଦନା ଜଣାଇଛନ୍ତି।
ପୂର୍ବତନ ଡିଏମ୍କେ ନେତାଙ୍କ ଆତ୍ମଦାହ ପରେ ତାମିଲନାଡୁରେ ହିନ୍ଦୀକୁ ବିରୋଧ ଜୋର୍ ଧରିଛି। ଭାଜପା ନେତୃତ୍ୱାଧୀନ କେନ୍ଦ୍ର ସରକାରଙ୍କ ବିରୋଧରେ ଦଳ ପକ୍ଷରୁ ଦିଲ୍ଲୀରେ ବିକ୍ଷୋଭ ପ୍ରଦର୍ଶନ କରାଯିବ ବୋଲି ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ୍ଙ୍କ ପୁଅ ତଥା ଡିଏମ୍କେ ଯୁବ ଶାଖାର ସମ୍ପାଦକ ଉଦୟନିଧି ଷ୍ଟାଲିନ୍ ଚେତାବନୀ ଦେଇଛନ୍ତି। ହିନ୍ଦୀକୁ ବିରୋଧ କରି ତାମିଲନାଡୁରେ ଗତ କିଛିମାସ ହେଲା ବ୍ୟାପକ ଆନ୍ଦୋଳନ ଜାରି ରହିଛି। କେନ୍ଦ୍ର ସରକାର ଯଦି ତାମିଲମାନଙ୍କ ଭାବାବେଗକୁ ଅଣଦେଖା କରନ୍ତି, ତେବେ ନୀରବ ବସିବେ ନାହିଁ ବୋଲି ଡିଏମ୍କେ କହିଛି। ହିନ୍ଦୀ ଭାଷାଭାଷୀ ରାଜ୍ୟରେ ଆଇଆଇଟି ଓ ଅନ୍ୟ ଉଚ୍ଚତର ବୈଷୟିକ ଓ ଅଣବୈଷୟିକ ଶିକ୍ଷାନୁଷ୍ଠାନରେ ହିନ୍ଦୀକୁ ପାଠପଢ଼ାର ମାଧ୍ୟମ କରିବାକୁ ଏବଂ ଅନ୍ୟ ରାଜ୍ୟଗୁଡ଼ିକରେ ସ୍ଥାନୀୟ ଭାଷାରେ ପଢ଼ାଇବା ଲାଗି ସଂସଦୀୟ କମିଟି ସୁପାରିସ କରିବା ପରେ ଆନ୍ଦୋଳନ ଜୋର୍ ଧରିଛି।