ନୂଆଦିଲ୍ଲୀ,୨୦।୨: କଂଗ୍ରେସ ବିନା ବିରୋଧୀ ମେଣ୍ଟ ହୋଇପାରିବ ନାହିଁ। କଂଗ୍ରେସକୁ ଛାଡ଼ି ଯେକୌଣସି ମେଣ୍ଟ ବିଫଳ ହେବ। ୨୦୨୪ ସାଧାରଣ ନିର୍ବାଚନ ସମେତ ବିଭିନ୍ନ ରାଜ୍ୟ ବିଧାନସଭା ନିର୍ବାଚନ ନିମନ୍ତେ ମେଣ୍ଟ ଗଠନ ନେଇ ଆସନ୍ତା ୨୪ ତାରିଖରୁ ଆରମ୍ଭ ହେବାକୁ ଯାଉଥିବା କଂଗ୍ରେସର ୩ ଦିିନିଆ ମହାସମ୍ମିଳନୀରେ ଆଲୋଚନା କରାଯିବ ବୋଲି ଏକ ଖବରଦାତା ସମ୍ମିଳନୀରେ ଦଳର ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି। ଉଭୟ ପ୍ରାକ୍ ନିର୍ବାଚନୀ ମେଣ୍ଟ ଏବଂ ପରବର୍ତ୍ତୀ ମେଣ୍ଟ ସମ୍ପର୍କରେ ବିଚାର ବିମର୍ଶ କରାଯିବ ବୋଲି କଂଗ୍ରେସ ନେତା ସୂଚନା ଦେଇଛନ୍ତି।
ଛତିଶଗଡ଼ର ରାୟପୁରରେ ୨୪ ତାରିଖରୁ କଂଗ୍ରେସର ୮୫ତମ ସମ୍ମିଳନୀ ଅନୁଷ୍ଠିତ ହେବାକୁ ଥିବାବେଳେ ଏଥିରେ ସୋନିଆ ଗାନ୍ଧୀ, ରାହୁଲ ଗାନ୍ଧୀ, ପ୍ରିୟଙ୍କା ଗାନ୍ଧୀ ଭଦ୍ରାଙ୍କ ସମେତ ପାଖାପାଖି ୧୫,୦୦୦ ପ୍ରତିନିଧି ଯୋଗଦେବେ। ସମ୍ମିଳନୀରେ ‘ହାଥ୍ ସେ ହାଥ୍ ଯୋଡ଼ୋ’ ଲାଗି ଆହ୍ବାନ ଦିଆଯିବ ବୋଲି ଦଳର ସାଧାରଣ ସମ୍ପାଦକ କେ.ସି. ବେଣୁଗୋପାଳ କହିଛନ୍ତି। ସମ୍ମିଳନୀର ପ୍ରଥମ ଦିନରେ ଏକ ଷ୍ଟିୟରିଂ କମିଟି ବୈଠକ ଅନୁଷ୍ଠିତ ହେବ। ଦଳର ଶୀର୍ଷ ନୀତି ନିର୍ଦ୍ଧାରଣ ସଂସ୍ଥା କଂଗ୍ରେସ କାର୍ଯ୍ୟକାରୀ କମିଟି (ସିଡବ୍ଲ୍ୟୁସି) ପାଇଁ ଭୋଟ ହେବ କି ନାହିଁ ସେ ନେଇ ଷ୍ଟିୟରିଂ କମିଟିରେ ନିଷ୍ପତ୍ତି ଗ୍ରହଣ କରାଯିବ। ସିଡବ୍ଲ୍ୟୁସି କାର୍ଯ୍ୟକର୍ତ୍ତା ନିର୍ବାଚନ ଲାଗି ସଂଗଠନର ଗୋଟିଏ ଗୋଷ୍ଠୀ ଦାବି କରିଆସୁଛନ୍ତି।
୨୦୨୪ ଲୋକ ସଭା ନିର୍ବାଚନରେ ଭାଜପାକୁ ପରାସ୍ତ କରିବାକୁ ହେଲେ ବିରୋଧୀ ଦଳଗୁଡ଼ିକୁ ଏକାଠି କରି ମେଣ୍ଟ ଗଠନ କରିବାକୁ ପଡ଼ିବ ଏକଥା କଂଗ୍ରେସ ଜାଣେ। ଏଥିପାଇଁ ଦଳ ପକ୍ଷରୁ ପ୍ରାରମ୍ଭିକ ପ୍ରକ୍ରିୟା ଆରମ୍ଭ ହୋଇଛି ଏବଂ ବିଭିନ୍ନ ଦଳର ନେତାମାନଙ୍କ ସହ ସମ୍ପର୍କ ରକ୍ଷା କରାଯାଇଛି। ୨୦୨୪ ନିର୍ବାଚନରେ ଭାଜପା ବିରୋଧରେ ସବୁ ବିରୋଧୀଙ୍କୁ ଏକାଠି କରିବୁ ବୋଲି ବେଣୁଗୋପାଳ ଖବରଦାତା ସମ୍ମିଳନୀରେ କହିଛନ୍ତି। ଏନେଇ ଦଳର ମହାସମ୍ମିଳନୀରେ ନିଷ୍ପତ୍ତି ନିଆଯିବ। ୨୦୨୪ରେ ଭାଜପାକୁ ପରାସ୍ତ କରିବା ମୁଖ୍ୟ କାମ ବୋଲି ବେଣୁଗୋପାଳ କହିଛନ୍ତି।