ବ୍ୟାଙ୍କକ୍, ୨୦ା୧: ରାଜତନ୍ତ୍ର ଓ ରାଜ ପରିବାରକୁ ଅପମାନିତ କରିଥିବା ଥାଇଲାଣ୍ଡର ଜଣେ ମହିଳାଙ୍କୁ ମଙ୍ଗଳବାର ୪୩ ବର୍ଷ ଜେଲଦଣ୍ଡ ହୋଇଛି। ଦେଶର ଲେଜି ମାଜେଷ୍ଟି ଆଇନ ବଳରେ କାହାକୁ ଏପରି କଠୋର ଦଣ୍ଡାଦେଶ ପ୍ରଥମ ଘଟଣା ବୋଲି କୁହାଯାଉଛି। ୬୦ ବର୍ଷୀୟା ସରକାରୀ କର୍ମଚାରୀ ଆଞ୍ଚନ ରାଜତନ୍ତ୍ର ବିରୋଧରେ ମନ୍ତବ୍ୟ ରଖି ଅଡିଓ କ୍ଲିପ ଫେସବୁକ୍ ଓ ୟୁଟ୍ୟୁବ୍ରେ ଅପ୍ଲୋଡ କରିଥିବା ଅଭିଯୋଗ ରହିଛି। ଏହି ଘଟଣାରେ ୨୦୧୫ରେ ତାଙ୍କୁ ଗିରଫ କରାଯାଇଥିଲା। ଜାମିନରେ ମୁକ୍ତ ହେବା ପୂର୍ବରୁ ତାଙ୍କୁ ପ୍ରଥମେ ତିନି ବର୍ଷ ପାଇଁ ପ୍ରି-ଟ୍ରାଏଲରେ ରଖାଯାଇଥିଲା। ପ୍ରଥମେ ତାଙ୍କୁ ୮୭ ବର୍ଷ ଜେଲଦଣ୍ଡାଦେଶ ହୋଇଥିଲା। ପରବର୍ତ୍ତୀ ଶୁଣାଣିବେଳେ ଆଞ୍ଚନ ତାଙ୍କ ଦୋଷ ମାନିଯିବାରୁ ଏହି ଦଣ୍ଡ ଅବଧି ଅଧା କରିଦିଆଯାଇଛି। ଥାଇଲାଣ୍ଡ ରାଜତନ୍ତ୍ରରେ ସଂସ୍କାର ପାଇଁ ବିକ୍ଷୋଭ ଚଳାଇଥିବା ଗଣତନ୍ତ୍ର ସମର୍ଥକ ବିରୋଧରେ ଏହି ବିବାଦୀୟ ଆଇନକୁ ବ୍ୟବହାର କରାଯାଇଛି। ୨୦୧୭ରେ ଉକ୍ତ ନିୟମ ଅନୁଯାୟୀ ଜଣେ ବ୍ୟକ୍ତିଙ୍କୁ ୩୭ ବର୍ଷ ଜେଲଦଣ୍ଡ ହୋଇଥିଲା।