ଭଦ୍ରକ ଅଫିସ, ୧୨ ।୩ ଭଦ୍ରକ ପୌରାଧ୍ୟକ୍ଷା ପଦ ପାଇଁ ଏବେ ୭ଜଣ ପ୍ରାର୍ଥୀ ନାମାଙ୍କନ ପତ୍ର ଦାଖଲ କରିଛନ୍ତି। ପୌରପାଳିକାର ୪ ନଂ. ୱାର୍ଡ ନିର୍ବାଚନ କୋର୍ଟରେ ବିଚାରାଧୀନ ଥିବାରୁ ଅନ୍ୟ ୨୯ ୱାର୍ଡରେ ନିର୍ବାଚନ ଅନୁଷ୍ଠିତ ହେବ। ଏଥିପାଇଁ ବିଭିନ୍ନ ଦଳ ପକ୍ଷରୁ ରଣକୌଶଳ ପ୍ରସ୍ତୁତ ସରିଛି। ପ୍ରାର୍ଥୀମାନେ ଘର ଘର ବୁଲି ଭୋଟରଙ୍କୁ ମନାଇବା ପାଇଁ ଉଦ୍ୟମ ଆରମ୍ଭ କରିଛନ୍ତି। ପୌରାଧ୍ୟକ୍ଷ ପଦବୀ ସିଧାସଳଖ ନିର୍ବାଚନ ହେଉଥିବା ଓ ଏହା ସାଧାରଣ ବର୍ଗର ମହିଳାଙ୍କ ପାଇଁ ସଂରକ୍ଷିତ ଥିବାରୁ ଚଳିତ ନିର୍ବାଚନ ସବୁ ଦଳ ପାଇଁ ସମ୍ମାନର ପ୍ରଶ୍ନ ହୋଇଛି।
ଜଗନ୍ନାଥପୁରର ଜଣାଶୁଣା ସାମାଜିକ କର୍ମୀ ଅଞ୍ଜନା ମିଶ୍ର ନାମାଙ୍କନ ଦାଖଲ କରିଥିବା ବେଳେ ବାଲିଓରଡ଼ାର ସବ୍ନା ପରୱିନ, କୁଆଁସର ଅମିତାବାଳା ଆଚାର୍ଯ୍ୟ, ଚରମ୍ପା ଅଞ୍ଚଳର ସମିତା ମିଶ୍ର, ନରିପୁରର ଗୀତାଞ୍ଜଳି ପଢ଼ିଆରୀ, ମିର୍ଜାପୁରର ଗୁଲମକୀ ଦଲାୱାଜି, ମିର୍ଜାପୁରର ତହିଦ ତବସୁମ ନିର୍ବାଚନ ଲଢ଼ିବେ। ଏମାନଙ୍କ ମଧ୍ୟରୁ ସମିତା ବିଜେଡି ପକ୍ଷରୁ ନାମାଙ୍କନ ଦାଖଲ କରିଥିବା ବେଳେ ନିକଟରେ ବିଜେଡି ଛାଡ଼ି କଂଗ୍ରେସରେ ମିଶିଥିବା ଅମିତା ପ୍ରଚାର ଆରମ୍ଭ କରିଛନ୍ତି। ସେହିଭଳି ଭାଜପା ପକ୍ଷରୁ ଗୀତାଞ୍ଜଳି ପ୍ରାର୍ଥୀ ହୋଇଥିବା ବେଳେ ନିକଟରେ ବିଜେଡିରୁ ଟିକେଟ ନ ମିଳିବାରୁ ସ୍ବାଧୀନ ଭାବେ ବିଦ୍ରୋହୀ ହୋଇ ପ୍ରାର୍ଥତ୍ପତ୍ର ଦାଖଲ କରିଛନ୍ତି ପୁରୁଣାବଜାର ଅଞ୍ଚଳର ଗୁଲମକୀ ଦଲାୱାଜି। ଏଣୁ ବିଜେଡି ପାଇଁ ସ୍ବାଧୀନ ପ୍ରାର୍ଥୀ ଅଡୁଆ ସୃଷ୍ଟି କରିବେ ବୋଲି ସହରର ସଚେତନ ଭୋଟରମାନେ ପ୍ରତିକ୍ରିୟା ରଖିଛନ୍ତି। ଯଦିଓ ପୌରପାଳିକା ବିଜେଡି ଦଖଲରେ ରହିଥିଲା କିନ୍ତୁ ଚଳିତ ନିର୍ବାଚନରେ ପୌରାଧ୍ୟକ୍ଷ ପଦବୀ ହାତେଇବା ପାଇଁ ବିଦ୍ରୋହୀମାନେ ମାଳ ମାଳ ହେଉଥିବାରୁ ଏହା ବିଭିନ୍ନ ଦଳ ପାଇଁ ଚ୍ୟାଲେଞ୍ଜ ସୃଷ୍ଟି କରିବ ବୋଲି ଚର୍ଚ୍ଚା ହେଉଛି।
