ନୂଆଦିଲ୍ଲୀ,୨୩।୩: ଇଭିଏମ୍ ପ୍ରସଙ୍ଗକୁ ନେଇ ଏନ୍ସିପି ମୁଖ୍ୟ ଶରଦ ପାଓ୍ବାରଙ୍କ ବାସଭବନରେ ଗୁରୁବାର ବିରୋଧି ନେତାଙ୍କ ଏକ ବୈଠକ ଅନୁଷ୍ଠିତ ହୋଇଥିଲା। ଏହି ବୈଠକରେ ସମାଜବାଦୀ ପାର୍ଟିର ରାଜ୍ୟ ସଭା ଏମ୍ପି ତଥା ପ୍ରସିଦ୍ଧ ଓକିଲ କପିଲ ସିବ୍ବଲ କହିଛନ୍ତି, ଯଦି ନିର୍ବାଚନ ଆୟୋଗ ଇଭିଏମ୍ ସମ୍ବନ୍ଧରେ ସଠିକ୍ ଉତ୍ତର ନ ଦିଅନ୍ତି, ତେବେ ପରବର୍ତ୍ତୀ ସମୟରେ କ’ଣ କରିବା ଉଚିତ ତାହା ଆମେ ସମସ୍ତ ରାଜନୈତିକ ଦଳ ଚିନ୍ତା କରିବୁ। ନିର୍ବାଚନ ଆୟୋଗଙ୍କ ନିକଟକୁ ଯାଇ ଇଭିଏମ୍ ବିଷୟରେ ଆଲୋଚନା କରାଯିବ। ଆମ ଦେଶରେ ଇଭିଏମ୍ କାହିଁକି ବ୍ୟବହାର କରାଯାଉଛି। ଅନ୍ୟ ଦେଶରେ ଇଭିଏମ୍ ବ୍ୟବହାର କରାଯାଉନାହିଁ ବୋଲି ସିବ୍ବଲ କହିଛନ୍ତି। ତେବେ ଶରଦ ପାୱାରଙ୍କ ଘରେ ଅନୁଷ୍ଠିତ ଏହି ବୈଠକରେ ଏନ୍ସିପି ମୁଖ୍ୟଙ୍କ ବ୍ୟତୀତ ତାଙ୍କ ଦଳର ପ୍ରଫୁଲ୍ଲ ପଟେଲ, ସମାଜବାଦୀ ପାର୍ଟିର ରାମ ଗୋପାଳ ଯାଦବ ଏବଂ କପିଲ ସିବ୍ବଲ, କଂଗ୍ରେସରୁ ଦିଗ୍ବିଜୟ ସିଂ, ସିପିଆଇରୁ ଡି. ରାଜା, ଶିବସେନାରୁ ଅନିଲ ଦେଶାଇଙ୍କ ଭଳି ବଡ଼ ନେତାମାନେ ସାମିଲ ହୋଇଥିଲେ। ଏହି ବୈଠକରେ ମମତା ବାନାର୍ଜୀଙ୍କ ଦଳ ତୃଣମୂଳ କଂଗ୍ରେସ(ଟିଏମ୍ସି) ର କୌଣସି ସଦସ୍ୟ ସାମିଲ ହୋଇ ନ ଥିଲେ। ସୂଚନା ମୁତାବକ, ଶରଦ ପାୱାର ଉକ୍ତ ବୈଠକ ପୂର୍ବରୁ ବିରୋଧୀ ଦଳର ନେତାମାନଙ୍କୁ ଚିଠି ଲେଖି ଇଭିଏମ୍ ହ୍ୟାକିଂ ପ୍ରସଙ୍ଗରେ ଆଲୋଚନା କରିବାକୁ ଆମନ୍ତ୍ରଣ କରିଥିଲେ।
