ବରଗଡ଼ ଅଫିସ୍,୨୦।୯: ବରଗଡ଼ ଜିଲା ଅତାବିରା ଥାନା ରେଙ୍ଗାଲିକ୍ୟାମ୍ପ ଛକରେ ଏକ ବାର୍ (ଅନ୍ ସପ୍ ମଦ ଦୋକାନ)କୁ ବିରୋଧ ସତ୍ତ୍ବେ ଖୋଲିବାକୁ ଉଦ୍ୟମ କରାଯିବା ଘଟଣାକୁ ନେଇ ଅସନ୍ତୋଷ ବଢ଼ିବାରେ ଲାଗିଛି । ଅନ୍ୟପଟେ ବାର୍କୁ ବିରୋଧ କରି ଶନିବାର ଆନ୍ଦୋଳନକୁ ଓହ୍ଲାଇଥିବା ଲୋକଙ୍କ ନାମରେ ପୋଲିସ ମାମଲା ରୁଜୁ କରିବା ପରେ ଅସନ୍ତୋଷ ଦ୍ୱିଗୁଣିତ ହୋଇଛି। ସୋମବାର ସ୍ଥାନୀୟ ଲୋକେ ଏ ନେଇ ବରଗଡ଼ ଜିଲାପାଳଙ୍କୁ ଫେରାଦ ହୋଇଛନ୍ତି। ଜିଲାପାଳ ମୋନିଷା ବାନାର୍ଜୀଙ୍କ ଅନୁପସ୍ଥିତିରେ ଅତିରିକ୍ତ ଜିଲାପାଳ ନବୀନ କୁମାର ପଟେଲଙ୍କୁ ସେମାନେ ଏକ ସ୍ମାରକପତ୍ର ପ୍ରଦାନ କରିଛନ୍ତି। ସେହିପରି ବାର୍ ଖୋଲାଯିବାକୁ ବିରୋଧ କରି ସ୍ଥାନୀୟ ଲୋକେ ଓଡ଼ିଶା ମାନବାଧିକାର କମିଶନ (ଓଏଚ୍ଆରସି)ଙ୍କ ପାଖରେ ଦାଖଲ କରିଥିବା ପିଟିଶନ ବିଚାରାଧୀନ ଥିବାବେଳେ ସେଠାରେ ବଳପୂର୍ବକ ବାର୍ ଖୋଲାଯିବା ପାଇଁ ଚାଲିଥିବା ମସୁଧା ଚର୍ଚ୍ଚାର ବିଷୟ ହୋଇଛି ।
ପ୍ରକାଶ ଯେ, ଅତାବିରାରେ ବାର୍ ଖୋଲିବାରେ ବିଫଳ ହେବା ପରେ ଜଣେ ବ୍ୟବସାୟୀ କିଛି ଅବକାରୀ କର୍ମଚାରୀ ଏବଂ ସ୍ଥାନୀୟ ନେତାଙ୍କୁ ହାତ କରି ରେଙ୍ଗାଲି କ୍ୟାମ୍ପରେ ବାର୍ ଖୋଲିବାକୁ ଲାଇସେନ୍ସ ପାଇଥିଲେ। ସ୍ଥାନୀୟ ଲୋକେ ଏହା ଜାଣିବା ପରେ ଓଏଚ୍ଆରସି, ଅବକାରୀ କମିଶନର, ଜିଲାପାଳ, ଅବକାରୀ ଅଧୀକ୍ଷକଙ୍କୁ ଲିଖିତ ଭାବେ ଜଣାଇଥିଲେ। ଓଏଚ୍ଆରସିରେ ଏହି ମାମଲା ଚୂଡ଼ାନ୍ତ ନ ହେଉଣୁ ଶନିବାର ସମ୍ପୃକ୍ତ ବ୍ୟବସାୟୀ ସେଠାରେ ବାର୍ ଖୋଲିଥିଲେ। ଏହା ଜାଣିବା ପରେ ସ୍ଥାନୀୟ ଲୋକେ ସମ୍ପୃକ୍ତ ବାର୍ ସମ୍ମୁଖକୁ ଯାଇ ଧାରଣାରେ ବସି ପ୍ରତିବାଦ କରିଥିଲେ। ସେଠାକୁ ଅବକାରୀ ଅଧିକାରୀମାନେ ପହଞ୍ଚତ୍ଥିଲେ ଏବଂ ସମ୍ପୃକ୍ତ ବାର୍ରେ ତାଲା ପକାଇବା ସହିତ ଏହାର ସମାଧାନ ନ ହେବା ପର୍ଯ୍ୟନ୍ତ ବାର୍ ବନ୍ଦ ରହିବ ବୋଲି ଲିଖିତ ପ୍ରତିଶ୍ରୁତି ଦେଇଥିଲେ। ଏହାପରେ ଆନ୍ଦୋଳନ ହଟିଥିଲା। ଅପରପକ୍ଷେ ଅତାବିରା ପୋଲିସ ଏହି ଘଟଣାରେ ଆନ୍ଦୋଳନକୁ ଓହ୍ଲାଇଥିବା ୧୧ଜଣଙ୍କ ନାମରେ ମାମଲା ରୁଜୁ କରିଛି। ଏହା ଜଣାପଡ଼ିବା ପରେ ଉକ୍ତ ଘଟଣାକୁ ନେଇ ପୁଣି ଆନ୍ଦୋଳନ ତେଜି ଉଠିଛି।
