ତାଳଚେର,୩୦।୧୧(ନି.ପ୍ର.): ତାଳଚେର ପୌର ପରିଷଦ ପକ୍ଷରୁ ହୋଲ୍ଡିଂ ଟ୍ୟାକ୍ସ ବୃଦ୍ଧି କରାଯିବାକୁ ନେଇ ଚିନ୍ତାବ୍ୟକ୍ତ କରିଛନ୍ତି ପୌରାଞ୍ଚଳବାସୀ। ଏହି ଟ୍ୟାକ୍ସ ଆଦାୟ କ୍ଷେତ୍ରରେ ମ୍ୟୁନିସିପାଲ ଆକ୍ଟକୁ ଖିଲାପ କରାଯାଇଥିବା ସେମାନେ ଅଭିଯୋଗ କରିଛନ୍ତି। ଏ ନେଇ ତାଳଚେର ନାଗରିକ ମଞ୍ଚ ପକ୍ଷରୁ ମଙ୍ଗଳବାର ସାଧାରଣ ସମ୍ପାଦକ ଦେବରଞ୍ଜନ ସାମଲଙ୍କ ନେତୃତ୍ୱରେ ଏକ ୧୨ ଜଣିଆ ଟିମ୍ ନଗରପାଳ ଓ ନିର୍ବାହୀ ଅଧିକାରୀଙ୍କ ସହ ଆଲୋଚନା କରିଥିଲେ।
ପୌରାଞ୍ଚଳବାସୀଙ୍କ କହିବା ଅନୁଯାୟୀ, ପୂର୍ବାପେକ୍ଷା ବହୁ ଅଧିକ ଅର୍ଥ ଟିକସ ଦେବାକୁ କୁହାଯାଉଛି। ଏଭଳି ଟିକସ ବୃଦ୍ଧି ପ୍ରସ୍ତାବ ଉପରେ କେବେ ଓ କେଉଁଠି ଜନଶୁଣାଣି କରାଗଲା ତାହା କାହାକୁ ଜଣାନାହିଁ। ତେବେ ଆଲୋଚନା ସମୟରେ ନଗରପାଳ ପବିତ୍ର ଭୂତିଆ ମଧ୍ୟ ଟ୍ୟାକ୍ସ ବୃଦ୍ଧିକୁ ବିରୋଧ କରିଥିଲେ। ବାରମ୍ବାର କାଉନସିଲରେ ମନା କରାଯାଇଥିଲେ ମଧ୍ୟ ପ୍ରଶାସନ ଏହାକୁ ଖାତିର କରୁନାହିଁ। ତୁରନ୍ତ ଜିଲା ପ୍ରଶାସନ ଏଥିରୁ ନିବୃତ୍ତ ନ ହେଲେ ଲୋକଙ୍କ ସହ ମିଶି ସେ ରାସ୍ତାକୁ ଓହ୍ଲାଇବେ ବୋଲି ପ୍ରକାଶ କରିଥିଲେ। ନିର୍ବାହୀ ଅଧିକାରୀ ଗିରିଜା ଶଙ୍କର ମଲ୍ଲିକ
କହିଥିଲେ, ଆଇନ ସମ୍ମତ ଉପାୟରେ ହୋଲ୍ଡିଂ ଟିକସ ବୃଦ୍ଧି କରାଯାଇଛି। ଯଦି କୌଣସି ଲୋକଙ୍କ କିଛି ଅଭିଯୋଗ ଅଛି, ତେବେ ପୁନର୍ବିଚାର କରାଯିବ। ଏହି ଆଲୋଚନାରେ ଉପସଭାପତି ରଞ୍ଜିତ କୁମାର ମହାପାତ୍ର, ସହ ସମ୍ପାଦକ ଦୁର୍ଗା ଚରଣ ସାହୁ, ତୁଷାରକାନ୍ତ ପ୍ରଧାନ, ବିଭୂତି ଭୂଷଣ ମହାନ୍ତି, ଉପଦେଷ୍ଟା କେଶବ ଭୂତିଆ, ରଶ୍ମି ରଞ୍ଜନ ମିଶ୍ରଙ୍କ ସମେତ ବହୁ ବୁଦ୍ଧିଜୀବୀ ଉପସ୍ଥିତ ଥିଲେ।