ବ୍ରିଟେନରେ ରହୁଥିବା ନୋବେଲ ପୁରସ୍କାର ବିଜୟିନୀ ଶିକ୍ଷା ଅଧିକାର କର୍ମୀ ମାଲାଲା ୟୁସୁଫ୍ଜାଇଙ୍କ ବିରୋଧରେ ପାକିସ୍ତାନର ଘରୋଇ ସ୍କୁଲ ସଂଘ ଏକ ବୃତ୍ତଚିତ୍ର ଲଞ୍ଚ୍ କରିଛି। ଜୁଲାଇ ୧୨ରେ ‘ମାଲାଲା ଦିବସ’ ପାଳନ ଅବସରରେ ଘରୋଇ ସ୍କୁଲଗୁଡ଼ିକରେ ମାଲାଲା ବିରେଧୀ ଶିକ୍ଷା ଓ ଆଲୋଚନାଚକ୍ରର ଆୟୋଜନ କରାଯାଇଛି। ଅଲ୍ ପାକିସ୍ତାନ ପ୍ରାଇଭେଟ୍ ସ୍କୁଲ୍ସ ଫେଡେରେଶନ୍ ଅଧ୍ୟକ୍ଷ କାଶିଫ୍ ମିର୍ଜା କହିଛନ୍ତି, ‘ଆଇ ଆମ୍ ନଟ୍ ମାଲାଲା’ ଶୀର୍ଷକ ଡକ୍ୟୁମେଣ୍ଟାରି ଜରିଆରେ ୨ ଲକ୍ଷ ଘରୋଇ ସ୍କୁଲର ୨ କୋଟି ଛାତ୍ରୀଛାତ୍ରଙ୍କୁ ମାଲାଲାଙ୍କ ଇସ୍ଲାମ ବିରୋଧୀ ଆଭିମୁଖ୍ୟ, ବିବାହ ଉପରେ ବିବାଦୀୟ ମନ୍ତବ୍ୟ ଓ ପାଶ୍ଚାତ୍ୟ କାର୍ଯ୍ୟସୂଚୀ ସମ୍ପର୍କରେ ଅବଗତ କରାଇଛୁ। ୨୦୧୨ ଅକ୍ଟୋବର ୯ରେ ଖାଇବର ପାଖ୍ତୁନ୍ଖ୍ବା ପ୍ରଦେଶର ସ୍ବାତ୍ ଉପତ୍ୟକାରେ ତେହରିକ୍-ଇ-ତାଲିବାନ ପାକିସ୍ତାନ ଆତଙ୍କବାଦୀମାନେ ମାଲାଲାଙ୍କୁ ଗୁଳି କରିଥିଲେ।
