ରସୁଲପୁର,୧୫ା୯(ଡି.ଏନ.ଏ.): ରସୁଲପୁର ବ୍ଲକ ଅନ୍ତର୍ଗତ ଅତଲାପୁର ପଞ୍ଚାୟତର ଅତଲାପୁର ଘେରିବନ୍ଧ ପାର୍ଶ୍ୱ ଦଶଘର ସାହିଠାରୁ କ୍ଷେତ୍ରପାଳ ପର୍ଯ୍ୟନ୍ତ ବ୍ରାହ୍ମଣୀ ନଦୀ ଗର୍ଭରେ ଚାରାରୋପଣ କରାଯାଉଛି। ଫଳରେ ଏହାକୁ ଗ୍ରାମବାସୀଙ୍କ ପକ୍ଷରୁ ବିରୋଧ କରାଯାଇଛି। ନଦୀ ଗର୍ଭରେ ଚାରାରୋପଣ କରାଗଲେ ସରକାରୀ ଅର୍ଥ ପାଣିରେ ପଡ଼ିବ ବୋଲି ବିଡିଓଙ୍କ ନିକଟରେ ଅଭିଯୋଗ ହୋଇଛି। ତେଣୁ ଉକ୍ତ ସ୍ଥାନରେ ଚାରାରୋପଣକୁ ତୁରନ୍ତ ବନ୍ଦ କରିବା ପାଇଁ ଗ୍ରାମର ସେକ୍ କମାଲ ଉଦ୍ଦିନ, ରାମ ନାଥ, ମାୟାଧର ବାରିକ, ଅର୍ଜୁନ ମଳିକ, ଶମ୍ଭୁନାଥ ସେଠୀ, ଶ୍ରୀଧର ସେଠୀଙ୍କ ସମେତ ବହୁ ଗ୍ରାମବାସୀ ଦାବି କରିଛନ୍ତି।
ସୂଚନା ମୁତାବକ, ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା (ଏମ୍ଜିଏନ୍ଆର୍ଇଜିଏସ୍)ରେ ଘେରିବନ୍ଧ ପାର୍ଶ୍ୱ ନଦୀପଠାରେ ଚାରାରୋପଣ ଚାଲିଛି। ଉକ୍ତ ସ୍ଥାନଟି ନଦୀ ମଧ୍ୟରେ ଅବସ୍ଥିତ। ଏହା ଗୋଚର କିସମର ଜମି ହୋଇଥିବାରୁ ଏଠାରେ ଗୋରୁ ଚରାବୁଲା କରନ୍ତି। ସେହିପରି ପ୍ରକଳ୍ପ ସ୍ଥଳରେ ଶ୍ରମିକ ବଦଳରେ ମେଶିନରେ କାର୍ଯ୍ୟ କରାଯାଉଛି। ଏଠାରେ ଚାରାରୋପଣ କରାଗଲେ ସାମୂହିକ କାର୍ଯ୍ୟରେ ବାଧା ଉପୁଜିବ। ନଦୀରେ ବନ୍ୟା ଆସିଲେ ଗଛଗୁଡ଼ିକ ଭାସିଯିବ। ଉକ୍ତ ପ୍ରକଳ୍ପଟି କାର୍ଯ୍ୟକାରୀ ହେଲେ ଜବ୍କାର୍ଡଧାରୀଙ୍କ ବଦଳରେ କେତେକ ଠିକାଦାର ଲାଭବାନ ହେବେ ବୋଲି ଅଭିଯୋଗ ହେଉଛି। ଏଭଳି ସ୍ଥିତି ବିଗତ ଦିନରେ ଉପୁଜିଥିବାର ନଜିର ରହିଛି। ବ୍ଲକ ଅଞ୍ଚଳର ଅତଲାପୁର, ରାଜେନ୍ଦ୍ରପୁର, ସିଂହାପୁର ଆଦି ପଞ୍ଚାୟତର ବିଭିନ୍ନ ସ୍ଥାନରେ ବ୍ରାହ୍ମଣୀ ନଦୀପଠା ଓ କୁଦ ଆଦି ସ୍ଥାନରେ ପଞ୍ଚାୟତ ଏବଂ ବ୍ଲକ ପ୍ରଶାସନ ପକ୍ଷରୁ ଚାରାରୋପଣ କରାଯାଇଥିଲା। ୨୦୨୦ରେ ନଦୀରେ ବନ୍ୟା ଆସିବା ଫଳରେ ବିଭିନ୍ନ ସ୍ଥାନର ବନୀକରଣ ପ୍ରକଳ୍ପଗଡ଼ିକ ନଷ୍ଟ ହୋଇଯାଇଥିଲା। ମାତ୍ର ସମାନ ସ୍ଥିତି ଏଠାରେ ଉପୁଜିବା ଆଶଙ୍କା ରହିଛି ବୋଲି ଗ୍ରାମବାସୀ ଅଭିଯୋଗରେ ଦର୍ଶାଇଛନ୍ତି। ଏ ସମ୍ପର୍କରେ କନିଷ୍ଠ ଯନ୍ତ୍ରୀ ଚୁନମୁନ ନାୟକ କହିଛନ୍ତି, ଲୋକଙ୍କ ଅନୁରୋଧ କ୍ରମେ ସେଠାରେ ଗଛ ଲଗାଯିବା ପାଇଁ ପଦକ୍ଷେପ ନିଆଯାଇଛି। ଗଛ ଲାଗିଲେ ଘେରିବନ୍ଧ ପାର୍ଶ୍ୱରେ ଥିବା ଜନବସତି ସୁରକ୍ଷିତ ରହିବ। ମାତ୍ର ଏହାକୁ ଗାଁର କେତେଜଣ ଲୋକ ବିରୋଧ କରୁଥିବାରୁ ଉକ୍ତ ପ୍ରକଳ୍ପ କାର୍ଯ୍ୟକୁ ବନ୍ଦ କରି ଦିଆଯାଇଛି।