ଆଳି,୧୫ା୪(ଡି.ଏନ.ଏ.): ଆଳି ବ୍ଲକ ଅନ୍ତର୍ଗତ ଅରଗଳ ଗଁଶରେ କେତେଜଣ ବ୍ୟକ୍ତିଙ୍କ ବ୍ୟକ୍ତିଗତ ଜମିରେ ପଞ୍ଚାୟତ କର୍ତ୍ତୃପକ୍ଷ ଜୋରଜବରଦସ୍ତ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନା (ଏମ୍ଜିଏନ୍ଆରଇଜିଏସ୍) ରାସ୍ତା ନିର୍ମାଣକୁ ସମ୍ପୃକ୍ତ ବ୍ୟକ୍ତିମାନେ ବିରୋଧ କରିଛନ୍ତି। ଏହି କାର୍ଯ୍ୟ ତୁରନ୍ତ ବନ୍ଦ କରିବା ପାଇଁ ସେମାନେ ଆଳି ବିଡିଓଙ୍କ ହସ୍ତକ୍ଷେପ ଲୋଡ଼ିଛନ୍ତି। ଆଳି ବିଡିଓଙ୍କ ନିକଟରେ ଅରଗଳ ଗ୍ରାମ ର ସନ୍ତୋଷ ନାୟକ, ଦିବାକର ସାହୁ, ନିରଞ୍ଜନ ସାହୁ, ରବୀନ୍ଦ୍ର ସାହୁ ଓ ସହଦେବ ଦାସ, ଅଭିଯୋଗ କରିଛନ୍ତି। ଅରଗଳ ପଞ୍ଚାୟତରେ ଏମ୍ଜିଏନ୍ଆରଇଜିଏସ୍ କାର୍ଯ୍ୟ ଚାଲୁ ରହିଛି। ଏହି ପରିପ୍ରେକ୍ଷୀରେ ଗୋଟିଏ ରାସ୍ତା ଗ୍ରାମର ଜଗବନ୍ଧୁ ସାହୁଙ୍କ ଘରଠାରୁ ରବୀନ୍ଦ୍ର ନାୟକଙ୍କ ଘର ପର୍ଯ୍ୟନ୍ତ କାମ ଆରମ୍ଭ ହୋଇଛି। କିନ୍ତୁ ସରକାରୀ ନୀତିନିୟମକୁ ଉଲ୍ଲଂଘନ କରି ସେମାନଙ୍କର ୫୪୭, ୫୫୪, ୫୫୫, ୫୪୬ ପ୍ଲଟରେ ଥିବା ବ୍ୟକ୍ତିଗତ ଜମିରେ ଏହି ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ୯ ଲକ୍ଷ ୫୦ ହଜାର ଟଙ୍କା ବ୍ୟୟ ଅଟକଳରେ ହେଉଥିବା ଏହି ରାସ୍ତା କାମ ବନ୍ଦ କରିବାକୁ ସେମାନେ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀଙ୍କୁ ଜଣାଇଲେ ମଧ୍ୟ ସେ କାମ ବନ୍ଦ କଲେ ନାହିଁ। ଅଧିକନ୍ତୁ ସେମାନଙ୍କୁ ଧମକ ଚମକ ମଧ୍ୟ ଦେଇ ଛନ୍ତି। ଜମି ମାଲିକମାନଙ୍କ ବିନା ଅନୁମତିରେ କିଭଳି ଭାବେ ଏହି କାମ ଆରମ୍ଭ ହେଲା ତାହା ସମସ୍ତଙ୍କୁ ବିସ୍ମିତ କରିଛି। ସେମାନେ ସେମାନଙ୍କ ଅଭିଯୋଗପତ୍ରରେ ଉଲ୍ଲେଖ କରିଛନ୍ତି ଯେ, ଏହାଦ୍ୱାରା ସେମାନଙ୍କ ମାନବିକ ଅଧିକାର ମଧ୍ୟ କ୍ଷୂର୍ଣ୍ଣ ହେଉଛି। ଏହାର ନକଲ ସେମାନେ କେନ୍ଦ୍ରାପଡ଼ା ଜିଲାପାଳ, ପ୍ରକଳ୍ପ ନିର୍ଦ୍ଦେଶକ, ଆଳି ତହସିଲଦାରଙ୍କୁ ମଧ୍ୟ ପ୍ରଦାନ କରିଛନ୍ତି। ଏ ବିଷୟରେ ଆଳି ବିଡିଓ ଦିବେନ୍ଦୁ ଦାସଙ୍କୁ ପଚାରିବାରୁ ସେ ଅଭିଯୋଗ ପାଇଛନ୍ତି, ଯଦି ପ୍ରକୃତରେ ତାହା ବ୍ୟକ୍ତିଗତ ଜମି ହୋଇଥିବ ରାସ୍ତା କାମ ହୋଇପାରିବ ନାହିଁ। ରାସ୍ତା କାମ ପାଇଁ କୌଣସି ଅର୍ଥ ଦିଆଯିବ ନାହିଁ ବୋଲି ସେ କହିଛନ୍ତି।
