ବରଗଡ଼ ଅଫିସ,୨୨।୯: କେନ୍ଦ୍ର ସରକାରଙ୍କ କୃଷି ବିଲ୍କୁ ନେଇ ସବୁଠି ବିରୋଧର ସ୍ବର ତୀବ୍ର ହେବାରେ ଲାଗିଛି। ମଙ୍ଗଳବାର ଆମ୍ ଆଦ୍ମୀ ପାର୍ଟି (ଆପ୍) ଏହାର ପ୍ରତିବାଦରେ ବରଗଡ଼ରେ ବିକ୍ଷୋଭ ଶୋଭାଯାତ୍ରା କରିଛି। ଏହା ସହିତ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଜିଲାପାଳ ଜ୍ୟୋତିରଞ୍ଜନ ପ୍ରଧାନଙ୍କୁ ଆପ୍ ପକ୍ଷରୁ ଏକ ସ୍ମାରକପତ୍ର ପ୍ରଦାନ କରାଯାଇଛି। ସ୍ମାରକପତ୍ରରେ ଉଲ୍ଲେଖି ରହିଛି ଯେ, କେନ୍ଦ୍ର ସରକାର ସଂସଦର ଉଭୟ ଗୃହରେ ପାରିତ କରିଥିବା କୃଷି ବିଲ୍ ଯୋଗୁ ଚାଷୀମାନେ ରସାତଳକୁ ଠେଲି ହୋଇଯେିବ। ଚାଷୀମାନେ ସ୍ବାମୀନାଥନ କମିଶନ ଲାଗୁ କରିବାକୁ ଦାବି କରୁଥିବା ବେଳେ କେନ୍ଦ୍ର ସରକାରଙ୍କ ଏହି ଚାଷୀ ବିରୋଧୀ ବିଲ୍ ସମସ୍ତ ଚାଷୀକୁଳକୁ ହତାଶ କରିଛି। ଏହି ବିଲ୍ରେ କୃଷିଜାତ ଦ୍ରବ୍ୟର ସର୍ବନିମ୍ନ ସହାୟକ ମୂଲ୍ୟ ଉପରେ କିଛି ଉଲ୍ଲେଖ କରାଯାଇ ନାହିଁ। ଫଳରେ ଚାଷୀମାନେ ଉଚିତ୍ ମୂଲ୍ୟ ପାଇବେ କି ନାହିଁ, ସେ ନେଇ ଆଶଙ୍କା ପ୍ରକାଶ ପାଇଛି ବୋଲି ଆପ୍ କର୍ମକର୍ତ୍ତାମାନେ କହିଛନ୍ତି।
ସେହିପରି ପୁଞ୍ଜିପତିଙ୍କ ହାତକୁ ଧାନ କିଣାବିକା ଚାଲିଯିବ ଏବଂ ଚାଷୀମାନେ ସରକାର କିମ୍ବା ପ୍ରଶାସନ ପାଖରେ ଅଭିଯୋଗ କରି ପାରିବେ ନାହିଁ। ଅନ୍ୟପକ୍ଷରେ କଣ୍ଟାକ୍ଟ ଫାର୍ମିଂ ଦ୍ବାରା ପୁଞ୍ଜିପତିମାନେ ଅଗ୍ରାଧିକାର ପାଇବେ ବୋଲି ଆପ୍ ଅଭିଯୋଗ କରିଛି। ଫଳରେ ଉକ୍ତ କୃଷି ବିଲ୍କୁ ଅନୁମୋଦନ କରା ନ ଗଲେ ଚାଷୀମାନେ ଉପକୃତ ହେବେ ଏବଂ ଗଣତନ୍ତ୍ର ସୁରକ୍ଷିତ ରହିବ ବୋଲି ସ୍ମାରକପତ୍ରରେ ଉଲ୍ଲେଖିତ ରହିଛି। ଆପ୍, ବରଗଡ଼ ଜିଲା ଆବାହକ ଭବାନୀ ପ୍ରସାଦ ସାହୁଙ୍କ ନେତୃତ୍ୱରେ ହୋଇଥିବା ଏହି କାର୍ଯ୍ୟକ୍ରମରେ ଅମିତାଭ ପାତ୍ର, ରମେଶ ପତି, ସ୍ବରୂପ ଭୋଇ, ପ୍ରମୁଖ ସାମିଲ୍ ହୋଇଥିଲେ।
