![](https://www.dharitri.com/wp-content/uploads/2019/10/electric.jpg)
ଭୁବନେଶ୍ୱର,୨୮।୨(ବ୍ୟୁରୋ): ବର୍ଦ୍ଧିତ ବିଦ୍ୟୁତ୍ ଦେୟ ଦେଇ ରାଜ୍ୟବାସୀ ଶୋଷଣର ଶିକାର ହେବାକୁ ଯାଉଛନ୍ତି ବୋଲି ସମାଜବାଦୀ ପାର୍ଟି ପକ୍ଷରୁ ଅଭିଯୋଗ କରାଯାଇଛି। ଏନେଇ ଦଳର ରାଜ୍ୟ କମିଟି ସଭାପତି ରବି ବେହେରା କହିଛନ୍ତି, ହାଇକୋର୍ଟ ନିର୍ଦ୍ଦେଶ ସତ୍ତ୍ବେ ବେଦାନ୍ତ ତା’ର ଥର୍ମାଲ ପାୱାର ପ୍ଲାଣ୍ଟରୁ ବିଜୁଳି ନ ଦେବା ପାଇଁ ଚକ୍ରାନ୍ତ କରି ବାର୍ଷିକ ରକ୍ଷଣାବେକ୍ଷଣ ନାମରେ ଗତ ସୋମବାର ଅର୍ଥାତ୍ ୨୧ ତାରିଖରୁ ପ୍ଲାଣ୍ଟକୁ ବନ୍ଦ କରିଛି। ଫଳରେ ଓ.ଇ.ଆର୍.ସି. ଗତ ସପ୍ତାହକ ତଳେ ତଥା ଗତ ଶନିବାର ଦେଇଥିବା ରାୟ ମୂଲ୍ୟହୀନ ହୋଇଗଲା ବୋଲି ବେହେରା କହିଛନ୍ତି। ଗ୍ରୀଡ୍କୋ ରାଜ୍ୟବାସୀଙ୍କୁ ବିଜୁଳି ଯୋଗାଇବା ପାଇଁ ବର୍ତ୍ତମାନ ବାହାରୁ ବିଜୁଳି କିଣିବ। ୟୁନିଟ୍ ପିଛା ୨ଟଙ୍କା ୫୨ ପଇସା ବଦଳରେ ଏବେ ୪ଟଙ୍କା ୬୯ ପଇସାରେ ବିଜୁଳି କିଣାହେବ, ଯାହାର ବୋଝ ବୋହିବେ ୯୨ଲକ୍ଷ ଗ୍ରାହକ। ତିନିମାସକୁ ହାରାହାରି ୧୬୩ କୋଟି ଟଙ୍କା ଗଣିବେ। ବେଦାନ୍ତ – ଓଇଆର୍ସି – ଗ୍ରୀଡ୍କୋ- ଶକ୍ତି ବିଭାଗର ଇନ୍ଦ୍ରଜାଲ ଭିତରେ ରାଜ୍ୟବାସୀ ଫସିଯାଇଛନ୍ତି। ବିଦ୍ୟୁତ୍ ଘରୋଇକରଣ ଓ ସଂସ୍କାର ନାମରେ ଦୀର୍ଘ ୨୭ ବର୍ଷ ହେଲା ରାଜ୍ୟବାସୀ ଶୋଷଣର ଶିକାର ହେବାରେ ଲାଗିଛନ୍ତି। ତେଣୁ ସରକାର ତୁରନ୍ତ ବିଦ୍ୟୁତ୍ ସଂସ୍କାର ଉପରେ ଏକ ‘ଶ୍ୱେତପତ୍ର’ ପ୍ରକାଶ କରନ୍ତୁ ଓ ରାଜ୍ୟବାସୀଙ୍କୁ ବର୍ଦ୍ଧିତ ଶୁଳ୍କ କବଳରୁ ରକ୍ଷା କରନ୍ତୁ। ତାହା ନ ହେଲେ ଆଗାମୀ ଦିନରେ ବିଦ୍ୟୁତ୍ ଶୁଳ୍କକୁ ନେଇ ଜନଆନ୍ଦୋଳନକୁ ଜୋରଦାର କରାଯିବ ବୋଲି ବେହେରା ସତର୍କ କରାଇଛନ୍ତି।