ପୁରୀ ଅଫିସ,୧୨।୨: ଶ୍ରୀଗୁଣ୍ଡିଚା ମନ୍ଦିର ରତ୍ନସିଂହାସନ ନିଲାମକୁ ବିରୋଧ କରାଯାଇଛି। ଶ୍ରୀମନ୍ଦିର ପ୍ରଶାସନ ନିଲାମରେ ଦେଉଥିବା ଶ୍ରୀଗୁଣ୍ଡିଚା ରତ୍ନସିଂହାସନ ସୁରକ୍ଷିତ ନୁହେଁ ବୋଲି ଅଭିଯୋଗ ଉଠିଛି। ଶ୍ରୀଗୁଣ୍ଡିଚା ମନ୍ଦିର ନିଲାମ ହେବା କାରଣରୁ ରତ୍ନସିଂହାସନ କ୍ରମଶଃ ଅସୁରକ୍ଷିତ ହେବାରେ ଲାଗିଛି। ବର୍ଷ ବର୍ଷ ଧରି ଠାକୁରଙ୍କ ଏହି ଜନ୍ମବେଦିରେ ଅଣବ୍ରାହ୍ମଣ ଏବଂ ଅଣସେବାୟତମାନେ ବସି ଭକ୍ତ ଓ ପର୍ଯ୍ୟଟକଙ୍କୁ ଶୋଷଣ କରୁଛନ୍ତି ବୋଲି ଶ୍ରୀଜଗନ୍ନାଥ ଧାମ ସଂସ୍କୃତି ସୁରକ୍ଷା ସଙ୍ଗଠନ ଅଭିଯୋଗ ଆଣି ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ଦୃଷ୍ଟି ଆକର୍ଷଣ କରିଛି। ଗୁଣ୍ଡିଚା ମନ୍ଦିର ନିଲାମବେଳେ ରତ୍ନସିଂହାସନକୁ ନିଲାମରୁ ବାଦ୍ ଦେବାକୁ ଦାବି କରାଯାଇଛି। ବ୍ରହ୍ମାଙ୍କ ଦ୍ୱାରା ପ୍ରତିଷ୍ଠିତ ଏହି ରତ୍ନସିଂହାସନ ତଳେ କୋଟିଏ ଶାଳଗ୍ରାମ ରହିଛନ୍ତି। ଏଣୁ ଏହାକୁ ଅପବିତ୍ର ନ କରାଯାଇ ନିଲାମ ଶ୍ରେଣୀରୁ ପୃଥକ କରାଯିବା ଉଚିତ୍। ପ୍ରଶାସନ ଏ ସଂକ୍ରାନ୍ତରେ ଆବଶ୍ୟକ ପଦକ୍ଷେପ ନ ନେଲେ ସଙ୍ଗଠନ ହାଇକୋର୍ଟଙ୍କ ଦ୍ୱାରସ୍ଥ ହେବ ବୋଲି ଚେତାବନୀ ଦିଆଯାଇଛି। ଅନ୍ୟପକ୍ଷରେ ଶରଧାବାଲି ଏବେ ଅସୁରକ୍ଷିତ। ଏହା ଜଳଖିଆ ଦୋକାନ ଓ ବସ୍, ଟ୍ରକ୍ ରହଣିର ସ୍ଥାନ ପାଲଟିଛି। ଏ ନେଇ ମଧ୍ୟ ପ୍ରଶାସନ ଦୃଷ୍ଟି ଦେବାକୁ ସଙ୍ଗଠନ ଦାବି କରିଛି। ସଙ୍ଗଠନର ରାଜ୍ୟ ସଭାପତି ବଦ୍ରି ମିଶ୍ର କହିଛନ୍ତି, ପୁରୀ ବଡଦାଣ୍ଡକୁ ଜାତୀୟ ରାଜପଥ ଭାବେ ପ୍ରସ୍ତୁତ କରାଯିବା ବେଳେ ଶରଧାବାଲିକୁ ସଂରକ୍ଷଣ କରାଯାଇଥିଲା। ମାତ୍ର ଏବେ ଏହି ପବିତ୍ର ବାଲି ନିଜର ମହତ୍ତ୍ବ ହରାଉଛି। ଏଣୁ ଏହାର ସଂରକ୍ଷଣ ଲାଗି ପ୍ରଶାସନିକ ଉଦ୍ୟମର ଆବଶ୍ୟକତା ରହିଛି।