ଭୁବନେଶ୍ୱର, ୧୬।୯ (ତପନ ସ୍ବାଇଁ):୧୭ ବର୍ଷରୁ କମ୍ ଏଏଫ୍ସି ମହିଳା ଏସିଆନ କପ୍ ଯୋଗ୍ୟତାର ଦ୍ୱିତୀୟ ପର୍ଯ୍ୟାୟ ଥାଇଲାଣ୍ଡରେ ଅନୁଷ୍ଠିତ ହେବ। ସେଥିପାଇଁ ଭାରତୀୟ ଦଳ ଶନିବାର ଗୋଆରୁ ମୁମ୍ବାଇ ବାଟଦେଇ ଥାଇଲାଣ୍ଡ ଯାତ୍ରା କରିବ। ୧୭ ବର୍ଷରୁ କମ୍ ମହିଳା ଫୁଟବଲ ବିଶ୍ୱକପ୍ ପାଇଁ ଏଏଫ୍ସି ଯୋଗ୍ୟତା ହାସଲ ନିହାତି ଆବଶ୍ୟକ। ତେଣୁ ସର୍ବଭାରତୀୟ ଫୁଟବଲ ଫେଡେରେଶନ (ଏଆଇଏଫ୍ଏଫ୍) ଶକ୍ତିଶାଳୀ ଦଳ ଗଠନ ପାଇଁ ପ୍ରୟାସ ଜାରି ରଖିଛି। ଥାଇଲାଣ୍ଡ ଯାତ୍ରା କରୁଥିବା ଭାରତୀୟ ଦଳରେ ୨୩ ଖେଳାଳିଙ୍କ ସହ କୋଚ୍ ଓ ଅଫିସଆଲଙ୍କୁ ମିଶାଇ ମୋଟ ୨୯ ଜଣ ରହିଛନ୍ତି। ଓଡ଼ିଶାର ଅନ୍ତର୍ଜାତୀୟ ଖ୍ୟାତିସମ୍ପନ୍ନ ଖେଳାଳି ଶ୍ରଦ୍ଧାଞ୍ଜଳି ସାମନ୍ତରାୟ ଏବେ ଭାରତୀୟ ୧୭ ବର୍ଷରୁ କମ୍ ମହିଳା ଫୁଟବଲ ଦଳର ସହକାରୀ କୋଚ୍ ଅଛନ୍ତି। ଟ୍ରେନିଂ ବହୁତ ଭଲ ହୋଇଛି। ପିଲାମାନେ ମଧ୍ୟ ଶ୍ରେଷ୍ଠ ପ୍ରଦର୍ଶନରେ ବ୍ୟଗ୍ର। ତେଣୁ ଭାରତୀୟ ଦଳର ଭଲ ପ୍ରଦର୍ଶନ ପାଇଁ ମୁଁ ଆଶାବାଦୀ ଅଛି ବୋଲି ଶ୍ରଦ୍ଧାଞ୍ଜଳି ପ୍ରକାଶ କରିଛନ୍ତି। ଦଳର ପ୍ରଶିକ୍ଷଣ ଓ ଶିବିର ପରିଚାଳନା ପାଇଁ ଏଆଇଏଫ୍ଏଫ୍ ସମସ୍ତ ବ୍ୟବସ୍ଥା କରିଥିବାରୁ ଶ୍ରଦ୍ଧାଞ୍ଜଳି କୃତଜ୍ଞତା ଜଣାଇଛନ୍ତି। ଏଏଫ୍ସି ମହିଳା ଏସିଆନ କପ୍ର ଦ୍ୱିତୀୟ ପର୍ଯ୍ୟାୟ ଯୋଗ୍ୟତାରେ ଭାରତ ଏହାର ପ୍ରଥମ ମ୍ୟାଚ କୋରିଆ ସହିତ ୧୯ ତାରିଖରେ ଖେଳିବ। ଏହାପରେ ଥାଇଲାଣ୍ଡକୁ ୨୧ ଓ ଇରାନକୁ ୨୩ ତାରିଖରେ ଭେଟିବ। ଭଲ ଗୋଲ ବ୍ୟବଧାନରେ ଗ୍ରୁପ୍ ଚାମ୍ପିୟନ ହେଲେ ଭାରତ ଦ୍ୱିତୀୟ ଯୋଗ୍ୟତା ପର୍ଯ୍ୟାୟ ଅତିକ୍ରମ କରିପାରିବ। ପ୍ରକାଶଯୋଗ୍ୟ ଯେ, ଗତବର୍ଷ ଭାରତ ପ୍ରଥମ ଯୋଗ୍ୟତା ପର୍ଯ୍ୟାୟ ଅତିକ୍ରମ କରିଥିବାରୁ ଖେଳାଳି ଓ ସପୋର୍ଟ ଷ୍ଟାଫ୍ମାନେ ପ୍ରଶଂସିତ ହୋଇଥିଲେ।