ନୟାଗଡ,୧୭।୯(ଲୋକନାଥ ମିଶ୍ର): ଧାଡିରେ ଧାନବୁଣା ପାଇଁ କୃଷି ଅନୁଦାନ ଲୁଟିବାର କସରତ ପଣ୍ଡ ହୋଇଛି । ଧାଡ଼ିରେ ଧାନବୁଣା ପାଇଁ ୩ ବର୍ଷ ପର୍ଯ୍ୟନ୍ତ ଏନ୍ଜିଓଙ୍କ ସହ ହୋଇଥିବା ଏଗ୍ରିମେଣ୍ଟକୁ ବାତିଲ୍ କରିବାକୁ ଶନିବାର ସୃଜନ ସଭାକକ୍ଷରେ ଅନୁଷ୍ଠିତ ଜିଲା ପରିଷଦ ବୈଠକରେ ଜିଲାପାଳ ରବୀନ୍ଦ୍ର ନାଥ ସାହୁ ନିର୍ଦ୍ଦେଶ ଦେଇଛନ୍ତି । ଧାଡ଼ିରେ ଧାନବୁଣା ପାଇଁ କୃଷି ଅନୁଦାନ ଲୁଟିବାର କସରତ ଖବର ଧରିତ୍ରୀରେ ଶନିବାର ପ୍ରକାଶ ପାଇବା ପରେ ଜିଲା ପରିଷଦ ବୈଠକରେ ଜିଲା ପରିଷଦ ସଭାପତି ଦେବାଶିଷ ପଟ୍ଟନାୟକ ଶନିବାର ଉପସ୍ଥାପନ କରି ଚର୍ଚ୍ଚା କରିଥିଲେ । ଜିଲାପାଳ ଓ ଜିଲା ପରିଷଦ ସଭାପତି ଘଟଣା ସମ୍ପର୍କରେ ଜିଲା ମୁଖ୍ୟ କୃଷି ଅଧିକାରୀଙ୍କୁ ପଚାରି ବୁଝିଥିଲେ ।
ସୂଚନାଯୋଗ୍ୟ, ସରକାର ଧାଡ଼ିରେ ଧାନବୁଣା ପାଇଁ ହେକ୍ଟର ପିଛା ୧୦ ହଜାର ଟଙ୍କା ସହାୟତା ଯୋଗାଉଛନ୍ତି । ଏଥିରେ ଚାଷୀ ୭ ହଜାର ଟଙ୍କା, ଏନ୍ଜିଓ ପାଇବ ଅଢ଼େଇ ହଜାର ଟଙ୍କା ଓ କୃଷକ ସାଥି ୫୦୦ ଟଙ୍କା ପାଇବାର ରହିଛି । ତେବେ କୃଷି ବିଭାଗର ଅବହେଳା ଯୋଗୁ ଚାଷୀ ୨୦୨୩-୨୪ ଆର୍ଥିକ ବର୍ଷରେ ନୟାଗଡ଼ ଜିଲାରେ ଏହି ଅନୁଦାନ ପାଇବାରେ ଅସମର୍ଥ ହୋଇଛନ୍ତି । ଧାନ ବୁଣା ଓ ଧାନ ରୁଆ ପରେ କୃଷି ବିଭାଗ ଧାଡ଼ିରେ ଧାନ ବୁଣା ବିଜ୍ଞାପନ ପ୍ରକାଶ କରିଥିଲା । ତାହା ପୁଣି କୌଣସି ଖବର କାଗଜରେ ବାହାରି ନ ଥିଲା । ଜିଲାପାଳଙ୍କ ୱେବସାଇଟରେ ଏହାକୁ ପ୍ରକାଶ କରି କିଛି ଦିନ ରଖି ପୁଣି ଗାଏବ କରି ଦିଆଯାଇଥିଲା। ସେହିପରି ଜିଲା ଭିତର ଏନ୍ଜିଓଙ୍କୁ ଧାଡିରେ ଧାନବୁଣା କାର୍ଯ୍ୟକ୍ରମ ପାଇଁ ସୁଯୋଗ ଦେବା ପାଇଁ ନିୟମ ରହିଛି । ତେବେ ଜିଲା ଭିତରର ଏନ୍ଜିଓଙ୍କୁ ଅଣଦେଖା କରି କଟକ, ପୁରୀ ଓ ଭୁବନେଶ୍ୱର ଏନ୍ଜିଓମାନଙ୍କୁ ଅନୁକମ୍ପା ପ୍ରଦର୍ଶନ କରାଯାଇଥିଲା ।
ପୁଣି ଜିଲାରେ ଧାଡ଼ିରେ ଧାନବୁଣା କାର୍ଯ୍ୟକ୍ରମ ଆଦୌ ହୋଇ ନ ଥିବାବେଳେ କଟକ, ପୁରୀ ଓ ଭୁବନେଶ୍ୱରର ୩ ଏନ୍ଜିଓଙ୍କ ସହ ହୋଇଥିବା ଏଗ୍ରିମେଣ୍ଟକୁ ବାତିଲ କରାଯାଇ ନ ଥିଲା । ଏଗ୍ରିମେଣ୍ଟକୁ ବାତିଲ କରାଯାଉ ନ ଥିବାରୁ ଧାନକଟା ପରେ ରିପୋର୍ଟ ସଂଗ୍ରହ କରି ଅନିୟମିତତା ପାଇଁ ବ୍ୟବସ୍ଥା କରାଯାଉଛି ବୋଲିି ଅନୁରୂପ ଅଭିଯୋଗ ଉଠିଥିଲା। ଏଣୁ ଧାଡ଼ିରେ ଧାନ ବୁଣା କାର୍ଯ୍ୟକ୍ରମରେ କୃଷି ବିଭାଗର ଦୁର୍ନୀତିର ଗୁମର ଖୋଲି ଯାଇଥିବାର ଏଗ୍ରିମେଣ୍ଟକୁ ବାତିଲ କରିବାକୁ ଚାଷୀମାନେ ଜିଲାପାଳଙ୍କୁ ଅନୁରୋଧ କରଥିଲେ । ଜିଲାପାଳ ଚାଷୀଙ୍କ ଅନୁରୋଧ ଓ ଧରିତ୍ରୀରେ ପ୍ରକାଶିତ ଖବରକୁ ଅନୁଧ୍ୟାନ କରି ସତ୍ୟାସତ୍ୟ ଉପଲବ୍ଧି ପରେ ଏନ୍ଜିଓଙ୍କ ସହ ଏଗ୍ରିମେଣ୍ଟକୁ ବାତିଲ କରିବାକୁ ନିର୍ଦ୍ଦେଶ ଦେଇଛନ୍ତି । ଜିଲାପାଳ ଓ ଜିଲା ପରିଷଦ ସଭାପତିଙ୍କ ତ୍ୱରିତ ପଦକ୍ଷେପକୁ ଚାଷୀ ସ୍ବାଗତ କରିଛନ୍ତି । ଏନେଇ ଜିଲା ପରିଷଦ ସଭାପତି ଦେବାଶିଷ ପଟ୍ଟନାୟକ କୁହନ୍ତି, ଧରିତ୍ରୀରେ ଶନିବାର ପ୍ରକାଶିତ ଖବର ମୋ ନଜରକୁ ଆସିଥିଲା । କୃଷି ଓ କୃଷକଙ୍କୁ ପ୍ରଶାସନ ଅଣଦେଖା କରି ପାରିବ ନାହିଁ । ଏଣୁ ଗୃହରେ ସମ୍ପୃକ୍ତ ପ୍ରସଙ୍ଗ ଉଠାଇ ଏଗ୍ରିମେଣ୍ଟକୁ ବାତିଲ କରାଯାଇଛି ବୋଲି କହିଛନ୍ତି ।