ମୋର୍ବି,୨ା୧୧: ଗୁଜରାଟର ମୋର୍ବି ଝୁଲାପୋଲ ଭୁଶୁଡ଼ିବା ଘଟଣାର ପୁଙ୍ଖାନୁପୁଙ୍ଖ ତଦନ୍ତ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ନିର୍ଦ୍ଦେଶ ଦେଇଛନ୍ତି। ଏଥିସହ ଉକ୍ତ ଅଘଟଣରୁ ଶିକ୍ଷାଲାଭ କରି ତାକୁ ତୁରନ୍ତ କାର୍ଯ୍ୟକାରୀ କରିବାକୁ ସେ ଏକ ଉଚ୍ଚସ୍ତରୀୟ ବୈଠକରେ କହିଛନ୍ତି।
ନିର୍ବାଚନମୁହଁା ଗୁଜରାଟରେ ଥିବା ପ୍ରଧାନମନ୍ତ୍ରୀ ନିଜ ପ୍ରଚାର କାର୍ଯ୍ୟସୂଚୀ ବଦଳାଇ ଦୁର୍ଘଟଣାସ୍ଥଳ ପରିଦର୍ଶନ କରିବା ସହ ଏକ ଉଚ୍ଚସ୍ତରୀୟ ବୈଠକରେ ସ୍ଥିତି ସମୀକ୍ଷା କରିଥିଲେ। ପ୍ରଭାବିତ ପରିବାରଙ୍କୁ ଯଥାସମ୍ଭବ ସହାୟତା ପ୍ରଦାନ ପାଇଁ ଉପସ୍ଥିତ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଥିଲେ। ପରେ ମୋଦି ସରକାରୀ ହସ୍ପିଟାଲରେ ଆହତମାନଙ୍କୁ ଭେଟି ସେମାନଙ୍କ ସ୍ବାସ୍ଥ୍ୟବସ୍ଥା ପଚାରି ବୁଝିଥିଲେ। ଅନ୍ୟପକ୍ଷେ ପ୍ରଧାନମନ୍ତ୍ରୀଙ୍କ ବୋର୍ବି ସିଭିଲ ହସ୍ପିଟାଲ ପରିଦର୍ଶନକୁ ନେଇ ବିବାଦ ସୃଷ୍ଟି ହୋଇଛି। କାରଣ ପ୍ରଧାନମନ୍ତ୍ରୀଙ୍କ ଗସ୍ତ ଲାଗି ଉକ୍ତ ହସ୍ପିଟାଲର କାନ୍ଥଗୁଡ଼ିକରେ ରଙ୍ଗ ବୋଳାଯାଇଛି। ରିପ୍ୟାଣ୍ଟିଂ ପାଇଁ ସୋମବାର ରାତି ସାରା ୪୦ ଜଣ ପ୍ୟାଣ୍ଟରଙ୍କୁ ନିୟୋଜିତ କରାଯାଇଥିଲା। ଗ୍ରାଉଣ୍ଡ, ଟଏଲେଟ୍ ଓ ଅନ୍ୟାନ୍ୟ ଭିତ୍ତିଭୂମିରେ ଉନ୍ନତି ଅଣାଯାଇଛି। ହସ୍ପିଟାଲରେ ନୂଆ ଓ୍ବାଟର କୁଲର ରଖାଯାଇଛି, ଯହିଁରୁ ପାଣି ବାହାରୁ ନାହିଁ। ସେଠାରେ ଚିକିତ୍ସିତ ହେଉଥିବା ଆହତଙ୍କ ବେଡ୍ଗୁଡ଼ିକରେ ନୂଆ ଚାଦର ବିଛାଯାଇଛି। ଏସବୁର ଫଟୋ ଓ ଭିଡିଓ ସୋସିଆଲ ମିଡିଆରେ ବହୁଳ ପ୍ରସାରିତ ହେବା ପରେ କଂଗ୍ରେସ ଏବଂ ଆମ୍ ଆଦ୍ମୀ ପାର୍ଟି (ଏଏପି) ଶାସକ ଭାଜପାକୁ ଟାର୍ଗେଟ କରିଛନ୍ତି। ରୋଗୀଙ୍କ ଯନତ୍ ନେବା ପରିବର୍ତ୍ତେ ମୋଦିଙ୍କ ଗସ୍ତ ବେଳେ ଇଭେଣ୍ଟ ମ୍ୟାନେଜମେଣ୍ଟ ଓ ଫଟୋଶୁଟ୍କୁ ଅଧିକ ପ୍ରାଧାନ୍ୟ ଦିଆଯାଇଛି ବୋଲି ବିରୋଧୀ ସମାଲୋଚନା କରିଛନ୍ତି।