ଭୁବନେଶ୍ୱର, ୧୪।୯(ବ୍ୟୁରୋ): ସ୍ମାର୍ଟସିଟି ଭୁବନେଶ୍ୱରର ବିକାଶମୂଳକ କାର୍ଯ୍ୟକୁ ଯଥାଶୀଘ୍ର ତ୍ୱରାନ୍ବିତ କରିବା ନେଇ ମଙ୍ଗଳବାର ବିଏମ୍ସି କାର୍ଯ୍ୟାଳୟରେ ଏକ ସମନ୍ବୟ ବୈଠକ ଅନୁଷ୍ଠିତ ହୋଇଯାଇଛି। ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ବିଭିନ୍ନ ବିଭାଗର ଅଧିକାରୀ ଯୋଗଦେଇଥିଲେ। ପାର୍ବଣଋତୁ ଆରମ୍ଭ ହୋଇଯାଇଥିବାବେଳେ ରାଜଧାନୀରେ ଦୁର୍ଗାପୂଜା ପାଇଁ ପ୍ରସ୍ତୁତି ଜୋରଦାର ଚାଲିଛି। ଏଥିସହିତ ଆଗକୁ ଭୁବନେଶ୍ୱରରେ ପୁରୁଷ ବିଶ୍ୱକପ୍ ହକି ଏବଂ ଫିଫା ଫୁଟ୍ବଲ ଅଣ୍ଡର ୧୭ ମହିଳା ଟୁର୍ନାମେଣ୍ଟ ଆୟୋଜନ ହେବାକୁ ଯାଉଛି। ତେଣୁ ଏଠାକୁ ସହର ବାହାରୁ ଏବଂ ରାଜ୍ୟ ତଥା ଦେଶ ବାହାରୁ ପ୍ରଶଂସକ ଆସିବ। ଏହାକୁ ଦୃଷ୍ଟିରେ ରଖି ସହରକୁ ସ୍ବଚ୍ଛ, ସୁନ୍ଦର ଏବଂ ଆକର୍ଷଣୀୟ କରି ଗଢି ତୋଳିବାକୁ ପଡ଼ିବ, ଯାହାକି ପରିଦର୍ଶକଙ୍କ ଦ୍ୱାରା ପ୍ରଶଂସିତ ହୋଇପାରିବ ବୋଲି କମିଶନର କହିଛନ୍ତି। ଏଥିପାଇଁ ବିଏମ୍ସି ପକ୍ଷରୁ ଏକ ଏଜେଣ୍ଡା ପ୍ରସ୍ତୁତ କରାଯାଇଥିଲା। ଏଥିରେ ଏନ୍ଏଚ୍ଏଆଇ, ଡ୍ରେନେଜ୍ ଡିଭିଜନ, ପ୍ରାଚୀ ଡିଭିଜନ୍, ଇଡ୍କୋ, ଟିପିସିଓଡିଏଲ୍, ରିଲାଏନ୍ସ ଜିଓ ଏବଂ ଏୟାରଟେଲ୍ଙ୍କୁ ସାମିଲ କରାଯାଇ ବିଭିନ୍ନ ବିକାଶ ମୂଳକ ଦିଗ ଉପରେ ଆଲୋଚନା କରାଯାଇଥିଲା। ବିଭିନ୍ନ ଅଞ୍ଚଳରେ ସ୍ବେରେଜ କାମ ସରି ନ ଥିବାବେଳେ ତୁରନ୍ତ ଏହାକୁ ସାରିବାକୁ କମିଶନର ନିର୍ଦ୍ଦେଶ ଦେଇଛନ୍ତି। ଏଥିସହ ସହରରୁ ବେଆଇନ୍ ବିଜ୍ଞାପନ ହଟାଇବା ପାଇଁ ଟିପିସିଓଡିଏଲ୍କୁ ନିର୍ଦ୍ଦେଶ ଦିଆଯାଇଛି। ସମସ୍ତ ବିଭାଗକୁ ଜରୁରିକାଳୀନ ଭିତ୍ତିରେ କାମ ସାରିବାକୁ କୁହାଯାଇଛି। ବୈଠକରେ ବିଏମ୍ସି ଅତିରିକ୍ତ କମିଶନର ସୂର୍ଯ୍ୟବଂଶୀ ମୟୁର ବିକାଶ, ସିଟି ଇଞ୍ଜିନିୟର ଅରୁଣ କୁମାର ନାୟକ ଏବଂ ଅନ୍ୟାନ୍ୟ ବିଭାଗର ଅଧିକାରୀମାନେ ଉପସ୍ଥିତ ଥିଲେ।
