କାଏମା,୧୫।୪(ଡି.ଏନ.ଏ.): ଯାଜପୁର ଜିଲାର ବହୁ ଗରିବ, ଅସହାୟ, ବିଧବା ଓ ଶ୍ରମିକ ଶ୍ରେଣୀ ଲୋକମାନେ ଆବାସ ଯୋଜନାରୁ ବଞ୍ଚିତ ହୋଇଛନ୍ତି। ଏ ସଂକ୍ରାନ୍ତରେ ସେମାନେ ଏକାଧିକ ବାର ଦରଖାସ୍ତ କରିଥିଲେ ମଧ୍ୟ ସଫଳତା ପାଇନାହାନ୍ତି ା ସେମିତି ଏକ ଅଭିଯୋଗ ଧର୍ମଶାଳା ବ୍ଲକ ଦେଓଦା ପଞ୍ଚାୟତ ତୋଟାସାହି ଗ୍ରାମରୁ ଆସିଛି ା ଉକ୍ତ ଗ୍ରାମର ସନ୍ଧ୍ୟାରାଣୀ ମଳିକଙ୍କ ପରିବାର ନାନା ଦୁଃଖକଷ୍ଟରେ ଝାଟିମାଟି କୁଡ଼ିଆରେ ଦିନ କାଟୁଛନ୍ତି। ସୂଚନା ଅନୁଯାୟୀ, ଆଜିକୁ ଦେଢ଼ବର୍ଷ ତଳେ ସନ୍ଧ୍ୟାରାଣୀଙ୍କ ସ୍ବାମୀଙ୍କ ପରଲୋକ ଘଟିଥିଲା ା ଏପରି ସ୍ଥିତିରେ ନିଜ ଭାଗ୍ୟକୁ ଆଦରି ସେ ଦିନ କାଟୁଛନ୍ତି ା ଆଜି ପର୍ଯ୍ୟନ୍ତ ତାଙ୍କୁ ବିଧବା ଭତ୍ତା ମିଳିନାହିଁ । ଏନେଇ ସେ ବ୍ଲକ କାର୍ଯ୍ୟାଳୟକୁ ଏକାଧିକ ଥର ଦୌଡ଼ି ନୟାନ୍ତ ହୋଇଥିଲେ ହେଁ ବାବୁମାନେ ମୋ ଦୁଃଖ ଶୁଣୁ ନାହାନ୍ତି ବୋଲି ସେ ଅଭିଯୋଗ କରିଛନ୍ତି ା
ସ୍ବାମୀ ତାଙ୍କ ପରିବାରର ଏକମାତ୍ର ରୋଜଗାରକ୍ଷମ ବ୍ୟକ୍ତି ଥିଲେ ା ତାଙ୍କ ପରଲୋକ ପରେ ଅନ୍ୟର ହାତଟେକା ସହାୟତାରେ ସନ୍ଧ୍ୟାରାଣୀ ଚଳୁଛନ୍ତି। ଏପରି ସ୍ଥିତିରେ ଘରଖଣ୍ଡେ କରିବା ତାଙ୍କ ପାଇଁ ସ୍ବପ୍ନ ହୋଇଛି । ତେଣୁ ଭଙ୍ଗା କୁଡିଆରେ ସେ ଓ ତାଙ୍କ ୩ ପିଲା ମୁଣ୍ଡ ଗୁଞ୍ଜିଛନ୍ତି । ବର୍ଷା,ଖରା, ଶୀତରେ ସେହି କୁଡ଼ିଆ ଖଣ୍ଡିକ ତାଙ୍କ ପାଇଁ ସାହା ହୋଇଛି ା ହେଲେ କେଉଁ ସମୟରେ ଯଦି ସେହି ପୁରୁଣାକାଳିଆ କୁଡ଼ିଆଟି ଭାଙ୍ଗି ପଡ଼ିବ ମୋ ପିଲାମାନେ ବେସାହାର ହୋଇପଡିବେ ବୋଲି କୋହଭରା କଣ୍ଠରେ ସନ୍ଧ୍ୟାରାଣୀ କହିଛନ୍ତି ା ବିଧବା ଭତ୍ତା ପରି ଆବାସ ଯୋଜନା ତାଲିକାରୁ ତାଙ୍କ ନାମ କାଟି ଦିଆଯାଇଛି । ଜିଲା ପ୍ରଶାସନ ପକ୍ଷରୁ କେତେଜଣ ଅଧିକାରୀ ତଦନ୍ତରେ ଆସିଥିଲେ ା ତାଙ୍କର କୋଠା ଘର ଥିବା ଦର୍ଶାଇ ଆବାସ ତାଲିକାରୁ ନାମ କାଟି ଦେଇଥିବା ସେ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ସେ ସ୍ଥାନୀୟ ବିଧାୟକ ପାଖେ ନେହୁରା ହୋଇଥିଲେ ବି କେହି ତାଙ୍କ ଦୁଃଖ ଶୁଣୁନାହାନ୍ତି ବୋଲି ସନ୍ଧ୍ୟାରାଣୀ ଆଖିରୁ ଲୁହ ପୋଛି କହିଛନ୍ତି ା