![](https://www.dharitri.com/wp-content/uploads/2023/03/h.jpg)
ଯାଜପୁର ଅଫିସ,୨ା୩: ଯାଜପୁର ଜିଲା ଦେଇ ଯାଇଥିବା ଡୁବୁରୀ-ତାଳଚେର ୫୩ ନଂ. ଜାତୀୟ ରାଜପଥ ସମ୍ପ୍ରସାରଣ କାର୍ଯ୍ୟରେ ନିୟୋଜିତ ଠିକାସଂସ୍ଥା କୁନାଳ ଷ୍ଟ୍ରକ୍ଚର ଇଣ୍ଡିଆ ପ୍ରାଇଭେଟ ଲିମିଟେଡ ବିରୋଧରେ ଫୌଜଦାରୀ ମାମଲା ରୁଜୁ କରିବାକୁ ନିର୍ଦ୍ଦେଶ ହୋଇଛି। ଏହି ମର୍ମରେ ନ୍ୟାଶନାଲ ଗ୍ରୀନ ଟ୍ରିବ୍ୟୁନାଲ(ଏନ୍ଜିଟି)ର ୨ ଜଣିଆ ଖଣ୍ଡପୀଠ ଜଷ୍ଟିସ ବି. ଅମିତ ସ୍ଥାଳେକର ଏବଂ ଏକ୍ସପର୍ଟ ମେମ୍ବର ପ୍ରଫେସର ଏ. ସେନ୍ଥିଲ ଭେଲ ମଙ୍ଗଳବାର ଏକ ମାମଲାର ଚୂଡ଼ାନ୍ତ ଶୁଣାଣୀ କରି ୧୫ ଦିନ ମଧ୍ୟରେ ନିର୍ଦ୍ଦେଶର ଅନୁପାଳନ କରିବାକୁ ଢେଙ୍କାନାଳ ଜିଲାପାଳଙ୍କୁ ନିର୍ଦ୍ଦେଶ ଦେଇଛନ୍ତି।
ଅଭିଯୋଗ ଅନୁସାରେ ବହ୍ଲର ଛକଠାରୁ କାମାକ୍ଷାନଗର ପର୍ଯ୍ୟନ୍ତ ରାସ୍ତା ନିର୍ମାଣାଧୀନ ଥିବାବେଳେ ଠିକାସଂସ୍ଥା କୁନାଲ ଷ୍ଟ୍ରକ୍ଚର ଇଣ୍ଡିଆ ପ୍ରାଇଭେଟ ଲିମିଟେଡ କାମାକ୍ଷାନଗର ଓ ପରଜଙ୍ଗ ତହସିଲ ଅଞ୍ଚଳରୁ ବେଆଇନ ଭାବେ ମାଟି,ମୋରମ, ଚିପ୍ସ ଖନନ କରି ଉତ୍ତୋଳନ କରିଆସୁଥିଲା। ଏହାସହ ଆଇନ ଉଲ୍ଲଂଘନ କରି ଜଙ୍ଗଲ କିସମ, ଅବାଦଯୋଗ୍ୟ ଅନାବାଦୀ, ଗୋଚର କିସମ ସରକାରୀ ଜମିରୁ ବେଆଇନ ଭାବେ ମାଟି, ମୋରମ, ପଥର ଉତ୍ତୋଳନ କରୁଥିବା ନେଇ ୨୦୨୦ରେ ସାମାଜିକ କର୍ମୀ ଶାନ୍ତନୁ କୁମାର ଭୁକ୍ତା ଏନ୍ଜିଟିଙ୍କ ନିକଟରେ ଅଭିଯୋଗ କରିଥିଲେ। ଏନେଇ ଏନ୍ଜିଟିରେ ୧୦/୨୦୨୦/ଇଜେଡରେ ଏକ ମାମଲା ରୁଜୁ ହୋଇଥିଲା। ବିଗତ ୩ ବର୍ଷରୁ ଊର୍ଦ୍ଧ୍ୱ ସମୟ ଧରି ଚାଲିଥିବା ମାମଲାର ଚୂଡ଼ାନ୍ତ ଶୁଣାଣୀ ହୋଇଛି। ଏନ୍ଜିଟି ରାୟରେ ଆହୁରି ପ୍ରକାଶ କରିଛନ୍ତି, କୁନାଲ ନାମକ ଠିକା ସଂସ୍ଥା ସମୁଦାୟ ୬୬ ଟି ଜଙ୍ଗଲ ଜମି, ସରକାରୀ ଜମି ଓ ଘରୋଇ କିସମ ଜମିରୁ ବେଆଇନ ଭାବେ ଲଘୁ ଖଣିଜ ଦ୍ରବ୍ୟ ଚୋରା ଚାଲାଣ କରିଥିବା ବେଳେ ଜିଲା ପ୍ରଶାସନ ପକ୍ଷରୁ କୌଣସି ଫୌଜଦାରୀ ମାମଲା ରୁଜୁ ହୋଇ ନାହିଁ। ତେଣୁ ଓଡ଼ିଶା ମାଇନର ମିନେରାଲ କନସେଶନ ରୁଲ୍ସ-୨୦୧୬ର ଧାରା ୫୧ ଅନୁସାରେ ଠିକାସଂସ୍ଥା ନାମରେ ଫୌଜଦାରୀ ମାମଲା ସହିତ ବେଆଇନ ଭାବେ ଉତ୍ତୋଳନ କରିଥିବା ଲଘୁ ଖଣିଜ ଦ୍ରବ୍ୟର ସମସ୍ତ ସ୍ଥାନଗୁଡ଼ିକର ପରିବେଶ କ୍ଷୟକ୍ଷତି ଭରଣ ନିମନ୍ତେ ଆବଶ୍ୟକ ଜରିମାନା ଆଦାୟ କରିବା ପାଇଁ ଢେଙ୍କାନାଳ ଜିଲାପାଳଙ୍କୁ ନିର୍ଦ୍ଦେଶ ହୋଇଛି। ଅଭିଯୋଗକାରୀଙ୍କ ପକ୍ଷରୁ ଆଇନଜୀବୀ ଶଙ୍କରପ୍ରସାଦ ପାଣି ମାମଲାର ପରିଚାଳନା କରିଥିଲେ।