ଫ୍ଲୋରିଡା,୧୬ ।୯: ମହାକାଶକୁ ଯାତ୍ରା କରିବାକୁ ଇଚ୍ଛା ରଖିଥିବା ଅରବପତିଙ୍କ ଆଶା ଏବେ ପୂରଣ ହେବାକୁ ଯାଉଛି । ଭାରତୀୟ ସମୟଅନୁସାରେ ଗୁରୁବାର ଭୋର ପ୍ରାୟ ୫ଟା ୩୩ ମିନିଟରେ ଆମେରିକାର ଫ୍ଲୋରିଡା ସ୍ଥିତ କେନେଡି ସ୍ପେସ ସେଣ୍ଟରରୁ ୪ ସାଧାରଣ ନାଗରିକଙ୍କୁ ନେଇ ସ୍ପେସଏକ୍ସର କ୍ରୁ ଡ୍ରାଗନ କ୍ୟାପସୁଲ ଫାଲକନ-୯ ରକେଟ ମହାକାଶ ଯାତ୍ରା କରିଛି । ତେବେ ପ୍ରଥମଥର ପାଇଁ ମହାକାଶ ଯାନ ସାଧାରଣ ନାଗରିକଙ୍କୁ ନେଇ ପୃଥିବୀ କକ୍ଷରେ ଲଞ୍ଚ କରିଛି । ଯାହକୁ ନେଇ ଅନ୍ୟ ଅରବପତିମାନେ ବି ଉତ୍ସାହିତ ଅଛନ୍ତି । ଖବର ଅନୁଯାୟ, ଆମେରିକା ସମୟ ବୁଧବାର ରାତି ପ୍ରାୟ ୮ଟା ୨ ମିନିଟରେ ଏହାକୁ ଲଞ୍ଚ କରାଯାଇଛି । ଏହାକୁ ସୌଖିନ ମହାକାଶଚାରୀ ଅରବପତି ଜେରେଡ ଇସାକମ୍ୟାନଙ୍କ ନେତୃତ୍ୱରେ ଲଞ୍ଚ କରାଯାଇଛି । ସେ ସିଧାସଳଖ ରକେଟ କମ୍ପାନୀ କ୍ରୁ ଡ୍ରାଗନ କ୍ୟାପସୁଲକୁ ଭଡାରେ ନେଇଛନ୍ତି । ଏଥିପାଇଁ ଖର୍ଚ୍ଚର ପରିମାଣ ସେ ନ କହିଥବା ବେଳେ ମୋଟ ଖର୍ଚ୍ଚ ୨୦ କୋଟି ଡଲାରରୁ କମ୍ ହେବ ବୋଲି ସେ କହିଛନ୍ତି ।
