ଭୁବନେଶ୍ୱର, ୨।୩ (ତପନ ସ୍ବାଇଁ): ମିଶନ ଅଲିମ୍ପିକ୍ସ ସ୍ପୋଟର୍ସ ଫେଡେରେଶନ(ଏମ୍ଓଏସ୍ଏଫ୍) ଆନୁକୂଲ୍ୟରେ ଗୁରୁକୂଳ ଟେନିସ ରିସର୍ଟରେ ୧ ଲକ୍ଷ ଟଙ୍କା ପୁରସ୍କାର ରାଶି ବିଶିଷ୍ଟ ଏଆଇଟିଏ-ଓଟିଏ ପୁରୁଷ ଟେନିସ ଟୁର୍ନାମେଣ୍ଟ ଶେଷ ହୋଇଛି। ଏହାର ଉଭୟ ସିଙ୍ଗଲ୍ସ ଓ ଡବଲ୍ସ ବିଭାଗରେ ଓଡ଼ିଶା ପ୍ରତିଯୋଗୀମାନେ ଚାମ୍ପିୟନ ହୋଇ ଟାଇଟଲ ପୋଛି ନେଇଛନ୍ତି। ସିଙ୍ଗଲ୍ସରେ ଓଡ଼ିଶାର ଅମୃତଜୟ ମହାନ୍ତି ମଣିପୁରର ହମୋମ ଭୂଷଣଙ୍କୁ ୩-୬, ୬-୨, ୬-୪ ସେଟ୍ରେ ପରାସ୍ତ କରିଛନ୍ତି। ପ୍ରଥମ ସେଟ୍ରେ ପଛୁଆ ରହିଥିଲେ ହେଁ ଅମୃତଜୟ ସଫଳ ପ୍ରତ୍ୟାବର୍ତ୍ତନ କରି ବିଜେତା ହୋଇଥିଲେ। ଚଳିତ ବର୍ଷ ଏହା ତାଙ୍କର ପ୍ରଥମ ଟାଇଟଲ। ଗତ ସପ୍ତାହ ତାଙ୍କ ପାଇଁ କଷ୍ଟସାଧ୍ୟ ଥିଲା। ଟୁର୍ନାମେଣ୍ଟରେ ତାଙ୍କୁ କେତେକ ୩ ସେଟ୍ ବିଶିଷ୍ଟ ମ୍ୟାଚ ଖେଳିବାକୁ ପଡ଼ିଥିଲା। ତେବେ ଦକ୍ଷତା ପ୍ରଦର୍ଶନ କରି ସେ ସଫଳତା ପାଇଥିଲେ। ଡବଲ୍ସରେ ଓଡ଼ିଶାର ସତୀର୍ଥ ପଟ୍ଟନାୟକ ଓ ଆଦିତ୍ୟ ଶତପଥୀ ମହାରାଷ୍ଟ୍ର ଯୋଡ଼ି ନୀରବ ଶେଟ୍ଟୀ ଓ ପ୍ରଣବ ଗାଡିଗିଲଙ୍କୁ ୬-୪, ୭-୫ ସେଟ୍ରେ ପରାସ୍ତ କରିଛନ୍ତି। ସ୍ଥାନୀୟ ଖେଳାଳି ସମସ୍ତ ମ୍ୟାଚ ଜିତିଥିବାରୁ ଓଡ଼ିଶା ପାଇଁ ଏହା ଏକ ବଡ଼ ସଫଳତା ବୋଲି ବିବେଚନା କରାଯାଉଛି।
