ଭୁବନେଶ୍ୱର,୨୦।୯(ବ୍ୟୁରୋ): ଗ୍ଲୋବାଲ୍ ପ୍ଲାଟ୍ଫର୍ମରେ କରିସ୍ମା ଦେଖାଇଛନ୍ତି ପୁଣିଜଣେ ଓଡ଼ିଆ। ରାୟଗଡ଼ା ଜିଲାର ୨୧ବର୍ଷୀୟ ଯୁବକ ମାରାଜୁ ସୁମନ୍ତ ଆମେରିକାସ୍ ଗଟ୍ ଟ୍ୟାଲେଣ୍ଟ ସିଜନ-୧୫ର ଫିନାଲେରେ ପହଞ୍ଚତ୍ବାର ସୌଭାଗ୍ୟ ଅର୍ଜନ କରିଛନ୍ତି। ନିଜ ଡ୍ୟାନ୍ସ ପାର୍ଟନର ତଥା କୋଲକାତାର ୧୫ବର୍ଷୀୟ ସୋନାଲି ମଜୁମଦାରଙ୍କ ସହ ମିଶି ସେ ସଫଳତାର ସହ ବିଦେଶୀ ମଞ୍ଚରେ ନିଜ ପ୍ରତିଭା ଦେଖାଇଛନ୍ତି। ‘ବ୍ୟାଡ୍ ସାଲ୍ସା’ ନାମରେ ପରିଚିତ ସୁମନ୍ତ ଓ ସୋନାଲିଙ୍କ ଡ୍ୟାନ୍ସ ଯୋଡ଼ି ପୂର୍ବରୁ ଇଣ୍ଡିଆସ୍ ଗଟ୍ ଟ୍ୟାଲେଣ୍ଟ ଏବଂ ‘ଝଲକ୍ ଦିଖ୍ଲାଜା’ ଭଳି ମଞ୍ଚରେ ସମସ୍ତଙ୍କ ମନ ଜିଣିଥିଲା। ଏମ୍. ଜଗଦୀଶ ରାଓ ଏବଂ ଏମ୍. ରାଧାକୁମାରୀଙ୍କ ପୁଅ ସୁମନ୍ତ ରାଜ୍ୟ ଏବଂ ଦେଶ ବାହାରର ବହୁ ମଞ୍ଚରେ ନିଜ ନୃତ୍ୟକଳା ଦେଖାଇ ସାରିଛନ୍ତି। ତେବେ ‘ଆମେରିକାସ୍ ଗଟ୍ ଟ୍ୟାଲେଣ୍ଟ’ ସେମିଫିନାଲେ ମଞ୍ଚରେ ଉଭୟ ଦକ୍ଷିଣ ଭାରତୀୟ ହିଟ୍ ‘ଟପ୍ ଲେସି ପୋଡି’ ଗୀତରେ ନୃତ୍ୟ ପ୍ରଦର୍ଶନ କରି ଶୋ’ର ବିଚାରକଙ୍କୁ ଚକିତ କରିଥିଲେ। ବିଚାରକମାନେ ଆମେରିକୀୟ ଗ୍ରୁପ୍କୁ ପଛରେ ପକାଇ ସୋନାଲି ଏବଂ ସୁମନ୍ତଙ୍କୁ ଫାଇନାଲକୁ ଉନ୍ନୀତ କରିଥିଲେ। ଖୁବ୍ଶୀଘ୍ର ଶୋ’ ଫାଇନାଲ ଟେଲିଭିଜନରେ ପ୍ରସାରିତ ହେବାକୁ ଥିବାବେଳେ ସୁମନ୍ତ ଓଡ଼ିଶାକୁ ଅନ୍ତର୍ଜାତୀୟ ମଞ୍ଚରେ ପୁଣିଥରେ ଗର୍ବିତ କରିବେ ବୋଲି କୁହାଯାଉଛି। ପୂର୍ବରୁ ଏହି ଯୋଡ଼ି ବ୍ରିଟେନ୍ସ ଗଟ୍ ଟ୍ୟାଲେଣ୍ଟରେ ମଧ୍ୟ ଅଂଶଗ୍ରହଣ କରିଥିଲେ।