କୋକସରା,୬।୩(ଡି.ଏନ୍.ଏ): ପୁଣି ବାଙ୍ଗାଲୋରରେ ଜଣେ ଓଡ଼ିଆ ଦାଦନ ଶ୍ରମିକଙ୍କ ସନ୍ଦେହଜନକ ଅବସ୍ଥାରେ ମୃତ୍ୟୁ ଘଟିଛି। ମୃତ୍ୟୁର କାରଣ ଜଣାପଡି ନ ଥିବା ବେଳେ ବେଳେ ବାଙ୍ଗାଲୋର ଜିଆର୍ପି ପୋଲିସ ମୃତଦେହ ଜବତ କରି ତଦନ୍ତ ଆରମ୍ଭ କରିଛି।
ମିଳିଥିବା ସୂଚନା ମୁତାବକ, କଳାହାଣ୍ଡି ଜିଲା ଆମପାଣି ଥାନା ଅଧୀନ କନ୍ଦାଗଡ଼ର ବସନ୍ତ ମାଝୀ ଗତ ବର୍ଷ ଜୁଲାଇରେ ଗ୍ରାମର ସାଥୀ ଶ୍ରମିକଙ୍କ ସହ ଦାଦନ ଖଟିବାକୁ ବାଙ୍ଗାଲୋର ଯାଇଥିଲେ। ସେଠାରେ ସେ ଏକ ଠିକାସଂସ୍ଥାରେ କାମ କରୁଥିଲେ।
ହେଲେ ଶନିବାର କେ.ଆର୍.ପୁରମ ରେଲୱେ ଷ୍ଟେଶନ ନିକଟ ଟ୍ରେନ ଲାଇନ କଡରେ ଜଣେ ଯୁବକଙ୍କ ମୁଣ୍ଡ ଗଣ୍ଡି ଅଲଗା ହୋଇପଡିଥିବା ରେଳ କର୍ମଚାରୀ ଦେଖିବାକୁ ପାଇଥିଲେ। ଏନେଇ ରେଳ କର୍ମଚାରୀ ସ୍ଥାନୀୟ ଇନ୍ଦ୍ରାନଗର ଜିଆର୍ପି ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ତଦନ୍ତ ଆରମ୍ଭ କରିଥିଲା। ମୃତଦେହ ନିକଟରୁ ଏକ ପରିଚୟ ପତ୍ର ମିଳିଥିଲା ପୋଲିସ ମୃତ ଯୁବକ ଜଣକ କଳାହାଣ୍ଡି ଜିଲା କୋକସରା ବ୍ଲକ କନ୍ଦାଗଡ଼ ଗାଁର ବସନ୍ତ ମାଝୀ(୨୨) ବୋଲି ଜାଣିବାକୁ ପାଇଥିଲା। ପରେ ପୋଲିସ ବସନ୍ତଙ୍କ ପରିବାର ଲୋକଙ୍କ ସହ ଯୋଗଯୋଗ କରି ଘଟଣା ସମ୍ପର୍କରେ ଅବଗତ କରିଥିଲା। ବସନ୍ତଙ୍କ ମୃତ୍ୟୁ ଖବର ପାଇ ପରିବାର ଲୋକ ରବିବାର ବାଙ୍ଗାଲୋର ଯାଉଥିବା ଜଣାପଡିଛି। ହେଲେ ବସନ୍ତଙ୍କ କେଉଁ ପରିସ୍ଥିତିରେ ମୃତ୍ୟୁ ଘଟିଛି ତାହା ସ୍ପଷ୍ଟ ହୋଇନାହିଁ।
