ଭୁବନେଶ୍ୱର, ୬ା୮(ବ୍ୟୁରୋ): କମ୍ ବୟସରେ ବଡ଼ ସଫଳତା। ମାତ୍ର ୨୨ବର୍ଷ ବୟସରେ ୟୁପିଏସ୍ସି ପରୀକ୍ଷାରେ ସଫଳତା ହାସଲ କରିଛନ୍ତି ଜଣେ ଓଡ଼ିଆ ଝିଅ। ୩୧ତମ ର଼୍ୟାଙ୍କ୍ରେ ରହି ସର୍ବକନିଷ୍ଠ ଆଇଏଏସ୍ ଅଧିକାରୀ ଭାବେ ନୂଆ କୀର୍ତ୍ତି ସ୍ଥାପନ କରିବାକୁ ଯାଉଛନ୍ତି ବାଲେଶ୍ୱର ଜିଲାର ସିମି କିରଣ। ଜଳେଶ୍ୱର ବ୍ଲକ ଅନ୍ତର୍ଗତ ସନ୍ତୋଷପୁର ଗାଁରେ ତାଙ୍କ ଘର। ବାପା ଛତିଶଗଡ଼ ଭିଲାଇ ଷ୍ଟିଲପ୍ଲାଣ୍ଟରେ ଜେନେରାଲ ମ୍ୟାନେଜର ଭାବେ କାର୍ଯ୍ୟ କରୁଥିବାବେଳେ ମା’ ଶିକ୍ଷୟିତ୍ରୀ ଅଛନ୍ତି। ସିମି ନିଜର ସ୍କୁଲ ଶିକ୍ଷା ଡିପିଏସ୍ ଭିଲାଇରୁ ପଢ଼ିଥିବାବେଳେ ଆଇଆଇଟି ମୁମ୍ବାଇରୁ ଇଲେକ୍ଟ୍ରିକାଲ ଇଞ୍ଜିନିୟରିଂରେ ୨୦୧୯ରେ ଶିକ୍ଷା ସମାପ୍ତ କରିଥିଲେ। ୨୦୧୯ରେ ସେ ଆଇଏଏସ୍ ପରୀକ୍ଷା ଦେଇଥିବାବେଳେ ପ୍ରଥମ ପ୍ରଚେଷ୍ଟାରେ ହିଁ ସଫଳତା ହାସଲ କରିଛନ୍ତି। ନାରୀ ସଶକ୍ତୀକରଣକୁ ନେଇ ଅନେକ କିଛି କରିବାର ଇଚ୍ଛା ରଖିଥିବା ସିମି ତାଙ୍କର ସଫଳତାର ଶ୍ରେୟ ମାତାପିତା, ଶିକ୍ଷକ ଓ ବନ୍ଧୁମାନଙ୍କୁ ଦେଇଛନ୍ତି। ନାରୀ ସଶକ୍ତୀକରଣ ସହିତ ଶିକ୍ଷା ଉପରେ ଗୁରୁତ୍ୱ ଦେବେ ବୋଲି ସେ କହିଛନ୍ତି। ସେହିପରି ଦେଶରେ କମ୍ ବୟସର ଝିଅଙ୍କ ବିବାହକୁ ନେଇ ସିମି କହିଛନ୍ତି ଯେ, ଯେଉଁ ଝିଅମାନେ ଭଲ ପଢୁଛନ୍ତି ଓ ଆଗକୁ ପଢ଼ିବାର ଇଚ୍ଛା ରଖୁଛନ୍ତି ସେମାନଙ୍କୁ ସ୍ବତନ୍ତ୍ର ସ୍କଲାରଶିପ ଦେଇ ପ୍ରୋତ୍ସାହନ ଦେବା ଉଚିତ। ସେହିପରି ପାଠପଢ଼ିବାବେଳେ କେତେ ଘଣ୍ଟା ପଢୁଛନ୍ତି ତାହା ଯେତିକି ଗୁରୁତ୍ୱ ରଖେ ନାହିଁ, କେଉଁ ମାନର ବା କେଉଁ ଗୁଣବତ୍ତାର ପାଠପଢୁଛନ୍ତି ତାହା ସବୁଠୁ ଗୁରୁତ୍ୱପୂର୍ଣ୍ଣ। ଯଦି ଦିନକୁ ୫ ଘଣ୍ଟାର ଗୁଣାତ୍ମକ ପାଠ ପଢୁଛନ୍ତି ତାହା ୧୦ରୁ ୧୨ ଘଣ୍ଟାର ପାଠ ପଢ଼ାଠାରୁ ବି ଅଧିକ ହେବ ବୋଲି ସିମି କହିଛନ୍ତି।