ଭୁବନେଶ୍ୱର, ୨୩ା୭(ବ୍ୟୁରୋ): ଜାତୀୟ ସ୍ତରର ପତ୍ରିକା କମ୍ପିଟିଶନ୍ ସକ୍ସେସ୍ ରିଭିୟୁ ପକ୍ଷରୁ ଗତ ମାର୍ଚ୍ଚରେ ସର୍ବଭାରତୀୟ ପ୍ରବନ୍ଧ ପ୍ରତିଯୋଗିତା ଆୟୋଜିତ ହୋଇଥିଲା। ଏଥିରେ ଓଡ଼ିଶାର ଝିଅ ଲଭ୍ଲୀ ମହାନ୍ତି ପ୍ରଥମ ସ୍ଥାନ ଅଧିକାର କରିଛନ୍ତି। ସେ ସାଇ ଇଣ୍ଟରନ୍ୟାଶନାଲ ସ୍କୁଲର ଦ୍ୱାଦଶ ଶ୍ରେଣୀର ଛାତ୍ରୀ। ଏହି ପ୍ରତିଯୋଗିତାରେ ଦେଶର ବିଭିନ୍ନ ରାଜ୍ୟରୁ ଲକ୍ଷାଧିକ ଛାତ୍ରୀଛାତ୍ର ଅଂଶଗ୍ରହଣ କରିଥିଲେ। ‘ସୁଇଟ୍ ଆର୍ ଦ ୟୁଜେସ୍ ଅଫ୍ ଆଡ଼ଭର୍ସିଟି’ ବିଷୟବସ୍ତୁ ଉପରେ ଲଭ୍ଲୀ ପ୍ରବନ୍ଧ ଲେଖିଥିବା ବେଳେ ‘ଫରେଷ୍ଟସ୍ ଅଫ୍ ଇଣ୍ଡିଆ’, ‘ମାଇ ଫେଭରାଇଟ୍ ଅଥର୍’ ଏବଂ ‘ବ୍ଳୁ ଜୁମିଙ୍ଗ୍ ଅଫ୍ ସୋସିଆଲ୍ ମିଡିଆ’ ଆଦି ଅନ୍ୟ ବିଷୟବସ୍ତୁ ରହିଥିଲା। ପ୍ରତିକୂଳତାର ତଥାକଥିତ କ୍ଷତିକାରକ ପ୍ରଭାବ କିପରି ମାନସିକ ପୁନର୍ବିଚାର ମାଧ୍ୟମରେ ଏକ ସକାରାତ୍ମକ ଆଭିମୁଖ୍ୟ ବିକାଶ କରି ମଧୁର ଫଳାଫଳରେ ପରିଣତ କରାଯାଇପାରିବ, ତାହାକୁ ନିଜ ପ୍ରବନ୍ଧରେ ଉପସ୍ଥାପିତ କରିଛନ୍ତି ଲଭ୍ଲୀ। ଏଥିସହ ସେ ଲେଖିଛନ୍ତି ଯେ, କୌଣସି ବଡ଼ ଅସୁବିଧା ସହ ମୁକାବିଲା ନ କରି କେବେ ବି କୌଣସି ସଫଳତା ହାସଲ ହୋଇପାରିବ ନାହିଁ। ଆମ ଆଗରେ ଥିବା ସମସ୍ୟା ଦ୍ୱାରା ଭୟଭୀତ ନ ହୋଇ ସ୍ଥିରତା, ଦୃଢ଼ତା ଏବଂ ଧୈର୍ଯ୍ୟ ସହିତ ଆମେ ଜୀବନର ପ୍ରତିକୂଳ ପରିସ୍ଥିତିରେ ବିରୋଧରେ ଲଢ଼ିବା ଉଚିତ। ଲଭ୍ଲୀ ପୂର୍ବରୁ ମଧ୍ୟ ବିଭିନ୍ନ ତର୍କ ଏବଂ ପ୍ରବନ୍ଧ ପ୍ରତିଯୋଗିତାରେ ଭାଗ ନେଇ ରାଜ୍ୟ ତଥା ସର୍ବଭାରତୀୟ ସ୍ତରରେ ଅନେକ ସଫଳତା ଅର୍ଜନ କରିଛନ୍ତି। ଏହି ସଫଳତା ପାଇଁ ଲଭ୍ଲୀଙ୍କୁ ସ୍କୁଲର ପ୍ରତିଷ୍ଠାତା ଡ. ବିଜୟ କୁମାର ସାହୁ ଧନ୍ୟବାଦ ଜଣାଇବା ସହିତ ତାଙ୍କର ଏହି ଚିନ୍ତାଧାରା ସମାଜ ପାଇଁ ଲାଭଦାୟକ ହୋଇପାରିବ ବୋଲି ପ୍ରକାଶ କରିଛନ୍ତି।