ମୁମ୍ବାଇ: ବଲିଉଡ୍ ନିର୍ଦ୍ଦେଶକ ରାମ ଗୋପାଳ ବର୍ମା ‘ଥ୍ରୀଲର’ ନାମକ ଏକ ନୂଆ ଫିଲ୍ମ ଦର୍ଶକଙ୍କ ପାଇଁ ନେଇ ଆସୁଛନ୍ତି। ସେ ଓଡ଼ିଶାର ଜଣେ ନୂଆ ଅଭିନେତ୍ରୀ ଅପ୍ସରା ରାନୀଙ୍କୁ ସାଇନ୍ କରିଛନ୍ତି। ଏନେଇ ବର୍ମା ନିଜ ଟୁଇଟର୍ରେ ପୋଷ୍ଟ କରି ଜଣାଇଛନ୍ତି। ‘ଆର୍ଜିଭି ଓ୍ବାଲର୍ଡ’ରେ ଆଗାମୀ ଫିଲ୍ମର ନାୟିକା ହେବେ ଅପ୍ସରା ରାନୀ। ତେବେ ଅପ୍ସରାଙ୍କ ପରିଚୟ ଦେବା ସହ ବର୍ମା ଲେଖିଛନ୍ତି, ତାଙ୍କ ଘର ଓଡ଼ିଶାରେ। ସେ ଡେରାଡୁନର ପାହାଡିଆ ଅଞ୍ଚଳରେ ଜନ୍ମ ଗ୍ରହଣ କରିଛନ୍ତି, କିନ୍ତୁ ବର୍ତ୍ତମାନ ସେ ହାଇଦ୍ରାବାଦରେ ରହୁଛନ୍ତି। ସେ ଜଣେ ଭଲ ଡ୍ୟାନ୍ସର ସହ ଭଲ ଅଭିନେତ୍ରୀ ମଧ୍ୟ। ସେ ପ୍ରଥମେ ତାଙ୍କୁ ଦେଖିକି ବିଶ୍ୱାସ କରିପାରି ନ ଥିଲେ। ଓଡ଼ିଶାରେ ଏଭଳି ପ୍ରତିଭା ଥିବା ସେ ଜାଣି ନ ଥିଲେ। ୧୯୯୯ ମହାବାତ୍ୟାକୁ ମୁଁ ଅନୁଭବ କରିପାରୁଛି। ଓଡ଼ିଶାରେ ଏଭଳି ସୁନ୍ଦରୀମାନେ ଥିବାରୁ ବିଭିନ୍ନ ପ୍ରକାର ଝଡ଼ ହେଉଛି ବୋଲି ଆର୍ଜିଭି ତାଙ୍କ ଟ୍ବିଟ୍ରେ ଲେଖିଛନ୍ତି। ଆର୍ଭିଜିଙ୍କ ଏଭଳି ମନ୍ତବ୍ୟ ପରେ ସୋସିଆଲ ମିଡିଆରେ ତାଙ୍କୁ ଟ୍ରୋଲ୍ କରାଯାଇଛି। ଓଡ଼ିଶାରେ ଟାଲେଣ୍ଟ୍ର ଅଭାବ ନାହିଁ। ଏଠାରେ କଳା, ସଂସ୍କୃତିକୁ ପୂଜା କରାଯାଏ। ଓଡ଼ିଶାର ନାମ ଦିନେ କଳିଙ୍ଗ ଓ ଉତ୍କଳ ରହିଥିଲା ବୋଲି ଟୁଇଟର ଓ ଫେସ୍ବୁକ୍ରେ ବିଭିନ୍ନ ୟୁଜର୍ସ କମେଣ୍ଟମାନ ଦେଇଛନ୍ତି। ଓଡ଼ିଶା ଉପରେ ଦୁର୍ବଳ ଜ୍ଞାନକୁ ନେଇ ଆର୍ଭିଜିଙ୍କୁ ସମାଲୋଚନାର ଶିକାର ହେବାକୁ ମଧ୍ୟ ପଡ଼ିଛି।
ରାମ ଗୋପାଲ ବର୍ମା ତାଙ୍କର ଏହି ମୁଭି ପାଇଁ ଅଙ୍କିତା ମହାରଣାଙ୍କ ନାମ ପରିବର୍ତ୍ତନ କରି ଅପ୍ସରା ରାନୀ ରଖିଛନ୍ତି। ଏହି ନାମ ରଖିବା ପରେ ସୋସିଆଲ ସାଇଡ୍ରେ ସେ ଆକାଉଣ୍ଟ ଖୋଲିଛନ୍ତି। ଅପ୍ସରା ଫ୍ୟାନ୍ ଫଲୋଇଙ୍ଗ୍ ମଧ୍ୟ ବଢ଼ିବାରେ ଲାଗିଛି। ଅପ୍ସରା ଓରଫ୍ ଅଙ୍କିତାଙ୍କର ୨୦୧୯ରେ ତେଲୁଗୁ ରୋମାଣ୍ଟିକ୍ ମୁଭି ‘ଫୋର ଲେଟର୍’ ଆସିଥିଲା। ଅପ୍ସରା ଆଉ ମଧ୍ୟ ‘ପାଟଣାଗଡ଼’ ମୁଭିରେ ଅଭିନୟ କରିଥିଲେ। ଏହି ମୁଭି ଓଡ଼ିଶା ପାଟଣାଗଡ଼ର ପାର୍ସଲବୋମା ବିସ୍ଫୋରଣକୁ ନେଇ ନିର୍ମାଣ କରାଯାଇଥିଲା। ଏହା ଦ୍ୱିଭାଷୀ ମୁଭି ଥିଲା। ଏହା ଓଡ଼ିଆ ଏବଂ ତେଲୁଗୁ ଭାଷାରେ ଡବିଂ କରାଯାଇଥିଲା।