ଭୁବନେଶ୍ୱର,୧୫ା୭(ବ୍ୟୁରୋ): ବଲିଉଡ୍ର ଜଣାଶୁଣା ନିର୍ଦ୍ଦେଶକ ତଥା ଫିଲ୍ମ ନିର୍ମାତା ରାମ ଗୋପାଳ ବର୍ମାଙ୍କ ଆଗାମୀ ଫିଲ୍ମ ‘ଥ୍ରୀଲର୍’ରେ ଓଡ଼ିଶା ଜନ୍ମିତ ଅପ୍ସରା ରାଣୀ ନାୟିକା ସାଜିଥିବାବେଳେ ଏବେ ଆଉଜଣେ ଓଡ଼ିଆଙ୍କୁ ରାମଗୋପାଳ ନାୟକ ଭାବେ ସୁଯୋଗ ଦେଇଛନ୍ତି। ସେ ହେଲେ ଓଡ଼ିଶା ଜନ୍ମିତ ମଡେଲ୍ ତଥା ଅଭିନେତା ରକ୍ କାଚି। ଏନେଇ ନିର୍ଦ୍ଦେଶକ ରାମଗୋପାଳ ମଙ୍ଗଳବାର ଟୁଇଟ୍ ଯୋଗେ ସୂଚନା ଦେଇଛନ୍ତି। ରକ୍ କାଚି ଜଣେ ଓଡ଼ିଆ ଏବଂ ତାଙ୍କ ଘର ନବରଙ୍ଗପୁରରେ। ମୁଁ ଓଡ଼ିଶାକୁ ଚିହ୍ନିପାରିଛି ଏବଂ ଓଡ଼ିଶାରୁ ଆଉଜଣେ ପ୍ରତିଭାଙ୍କୁ ଆବିଷ୍କାର କରିଛି। ‘ଥ୍ରୀଲର’ରେ ରକ୍ଙ୍କୁ ଅପ୍ସରାଙ୍କ ବିପକ୍ଷରେ ନେଇଥିବା ସେ ଉକ୍ତ ଟୁଇଟ୍ରେ କହିଛନ୍ତି।
‘କ୍ଲାଇମାକ୍ସ’ ଏବଂ ‘ନେକେଡ୍’ ପରେ ‘ଥ୍ରୀଲର’ର ଶୁଟିଂ ଆରମ୍ଭ କରିଥିବା ରାମଗୋପାଳ ନିଜ ଟୁଇଟର ହ୍ୟାଣ୍ଡେଲରେ ଅପ୍ସରା ଓ ରକ୍ଙ୍କ କିଛି ଫଟୋ ମଧ୍ୟ ଶେୟାର କରିଛନ୍ତି। ତେବେ ଉଭୟଙ୍କର ଏହି ହଟ୍ ଫଟୋଶୁଟ୍କୁ ନେଇ ଏବେ ଚର୍ଚ୍ଚା ଚାଲିଛି। ଏପଟେ ‘ଥ୍ରୀଲର’ର ଲିଡ୍ରେ ସୁଯୋଗ ଦେଇଥିବାରୁ ରକ୍ ମଧ୍ୟ ଟୁଇଟରରେ ରାମଗୋପାଳଙ୍କୁ ଧନ୍ୟବାଦ ଜଣାଇଛନ୍ତି। ଏହି ସଫଳତାକୁ ସେ ଶବ୍ଦରେ ବର୍ଣ୍ଣନା କରିପାରିବେ ନାହିଁ ବୋଲି ଲେଖିଛନ୍ତି।
ଗତ କିଛିଦିନ ତଳେ ‘ଥ୍ରୀଲର୍’ରେ ଓଡ଼ିଶା ଜନ୍ମିତ ଅପ୍ସରା ରାଣୀଙ୍କୁ ନାୟିକା କରିଥିବା ରାମଗୋପାଳ ଘୋଷଣା କରିଥିଲେ। ତେବେ ଏନେଇ ସେ କରିଥିବା ଟୁଇଟ୍ ତାଙ୍କୁ ବିବାଦ ଘେରକୁ ଆଣିଦେଇଥିଲା। ଟୁଇଟ୍ରେ ସେ ଲେଖିଥିଲେ, ‘ ୧୯୯୯ ଝଡ଼ ପରେ ମୁଁ ଓଡ଼ିଶା ବିଷୟରେ ଶୁଣି ନ ଥିଲି। ତେବେ ଅପ୍ସରାଙ୍କୁ ଭେଟିବା ପରେ ମୁଁ ଅନୁଭବ କରୁଛି ଯେ ଓଡ଼ିଶା ସବୁ ପ୍ରକାରର ‘ହରିକେନ୍’ ସୃଷ୍ଟି କରିପାରେ। ଓଡ଼ିଶାରେ ଏଭଳି ସୁନ୍ଦରୀ ଅଛନ୍ତି ବୋଲି ଆଜି ଜଣାପଡ଼ିଲା।’ ରାମଗୋପାଳଙ୍କ ଏହି ଟୁଇଟ୍ ପରେ ସୋସିଆଲ ମିଡ଼ିଆରେ ଏକପ୍ରକାର ଝଡ଼ ସୃଷ୍ଟି ହୋଇଥିଲା। ଟୁଇଟରରେ ଥିବା ଓଡ଼ିଆମାନେ ରାମଗୋପାଳଙ୍କୁ ଓଡ଼ିଶା ସମ୍ପର୍କରେ ଜାଣି ନ ଥିବାରୁ ଟ୍ରୋଲ କରିଥିଲେ। ଏହାପରେ ନିଜର ପରବର୍ତ୍ତୀ ଟୁଇଟ୍ରେ ରାମଗୋପାଳ ନିଜ ଭୁଲ୍ ସୁଧାରି ଫିଲ୍ମ ଇଣ୍ଡଷ୍ଟ୍ରିକୁ ଓଡ଼ିଶା ଏଭଳି ପ୍ରତିଭା ଦେବ ବୋଲି କେବେ ଭାବି ନ ଥିବା କହିଥିଲେ। ଏହାସହ ରାମଗୋପାଳଙ୍କ ଟୁଇଟର୍ ହ୍ୟାଣ୍ଡେଲରେ ଅପ୍ସରାଙ୍କ ଗଦା ଗଦା ଫଟୋ ଦେଖିବାକୁ ମିଳିଥିଲା।
