ପ୍ୟାରିସ୍,୨୮।୩(ପି.ଟି.): ଏଠାରେ ଚାଲିଥିବା ଓରଲେନ୍ସ ମାଷ୍ଟର୍ସ ବ୍ୟାଡ୍ମିଣ୍ଟନରୁ ଭାରତୀୟ ମହିଳା ତାରକା ସାଇନା ନେହ୍ବାଲ ସେମିଫାଇନାଲରେ ପରାସ୍ତ ହୋଇ ବିଦାୟ ନେଇଛନ୍ତି। ତେବେ ଭାରତୀୟ ଯୋଡି କ୍ରିଷ୍ଣା ପ୍ରସାଦ ଗାରାଗା ଓ ବିଷ୍ଣୁବର୍ଦ୍ଧନ ଗୌଡ ପାଞ୍ଜାଲା ପୁରୁଷ ଡବଲ୍ସ ଫାଇନାଲରେ ପ୍ରବେଶ କରିଛନ୍ତି। ଫଳରେ ଭାରତର ଟାଇଟଲ ଆଶା ଉଜ୍ଜୀବିତ ରହିଛି।
ଲଣ୍ଡନ ଅଲିମ୍ପିକ୍ସ ବ୍ରୋଞ୍ଜ୍ ପଦକ ବିଜୟିନୀ ସାଇନା ସେମିରେ ଡେନମାର୍କର ଲାଇନ୍ କ୍ରିଷ୍ଟୋଫେର୍ସେନଙ୍କଠାରୁ ୧୭- ୨୧, ୧୭ -୨୧ରେ ମାତ୍ର ୨୮ ମିନିଟ୍ରେ ପରାସ୍ତ ହୋଇଥିଲେ। ଅନ୍ୟପଟେ ମହିଳା ଡବଲ୍ସ ଯୋଡି ଅଶ୍ୱିନୀ ପୋନାପ୍ପା ଓ ଏନ୍. ସିକ୍କି ରେଡ୍ଡୀ ସେମିରେ ପରାସ୍ତ ହୋଇ ବିଦାୟ ନେଇଛନ୍ତି। ଏହି ଭାରତୀୟ ମହିଳା ଯୋଡି ୧୮- ୧୨, ୯- ୨୧ରେ ଟପ୍ ସିଡ୍ ଥାଇଲାଣ୍ଡ ଯୋଡି ଜଙ୍ଗ୍କୋଲଫାନ କିଟିଥାରାକୁଲ ଓ ରାଓ୍ବିଣ୍ଡା ପ୍ରଜୋଙ୍ଗଜାଇଙ୍କଠାରୁ ପରାସ୍ତ ହୋଇଛନ୍ତି।
ତେବେ କ୍ରିଷ୍ଣା ଓ ବିଷ୍ଣୁ ୨୧-୧୭, ୨୧-୧୭ରେ ପୁରୁଷ ଡବଲ୍ସ ସେମିଫାଇନାଲରେ ଇଂଲଣ୍ଡ ଯୋଡି କାଲମ ହେମିଂ ଓ ଷ୍ଟିଭେନ ଷ୍ଟାଲୁଡଙ୍କୁ ମାତ୍ର ୩୫ ମିନିଟ୍ରେ ପରାସ୍ତ କରି ପ୍ରଥମଥର ପାଇଁ ଫାଇନାଲକୁ ଉଠିଛନ୍ତି ଓ ଭାରତର ଟାଇଟଲ ଆଶା ଉଜ୍ଜୀବିତ ରଖିଛନ୍ତି। ପ୍ରଥମଥର ପାଇଁ ଏହି ଯୋଡି ଏକାଠି ହୋଇ ଏହି ଇଭେଣ୍ଟରେ ଅଂଶଗ୍ରହଣ କରିଥିଲେ। ଏବେ ଫାଇନାଲରେ ଏହି ଯୋଡି ଇଣ୍ଡୋନେସିଆର ସବର କରିୟାମାନ ଗୁଟାମା ଓ ମୋ ରେଜା ପହଲେଭି ଇସ୍ଫାନି କିମ୍ବା ଚତୁର୍ଥ ସିଡ୍ ଇଂଲଣ୍ଡ ଯୋଡି ବେନ ଲେନ୍ ଓ ସିନ ଭେଣ୍ଡିଙ୍କୁ ରବିବାର ଫାଇନାଲରେ ଭେଟିବେ। ୨୧ ବର୍ଷୀୟ କ୍ରିଷ୍ଣା ଭାରତର ଏକନମ୍ବର ଡବଲ୍ସ ଖେଳାଳି ରହିଛନ୍ତି। ଜୁନିୟରସ୍ତରରେ ସେ ସାତ୍ତ୍ୱିକସାଇରାଜ ରାଙ୍କିରେଡ୍ଡୀଙ୍କ ସହ ଡବଲ୍ସ ଖେଳୁଥିଲେ।
