ଇସଲାମାବାଦ,୧୯।୮: ପାକିସ୍ତାନର ଜେଲରେ ଥିବା ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ ଶୁକ୍ରବାର କହିଛନ୍ତ, ସେ ନିଜ ଦେଶ ପାଇଁ ୧୦୦୦ ବର୍ଷ ଜେଲରେ ରହିବାକୁ ପ୍ରସ୍ତୁତ ଅଛନ୍ତି। ବାସ୍ତବରେ, ତୋଶାଖାନା ମାମଲାରେ ଦୋଷୀ ସାବ୍ୟସ୍ତ ହେବା ପରେ ଇମ୍ରାନ୍ ଖାନଙ୍କୁ ତିନି ବର୍ଷ ଜେଲ ଦଣ୍ଡାଦେଶ ହୋଇଛି ଏବଂ ବର୍ତ୍ତମାନ ସେ ପଞ୍ଜାବ ପ୍ରଦେଶର ଅଟକ ଜେଲରେ ଅଛନ୍ତି।
ଅଟକ ଜେଲରେ ଖାନଙ୍କୁ ଭେଟିବା ପରେ ଶୁକ୍ରବାର ଖବରଦାତାମାନଙ୍କ ସହ କଥାବାର୍ତ୍ତା କରି ପାକିସ୍ତାନ ତେହେରିକ-ଇ-ଇନସାଫ ମୁଖ୍ୟଙ୍କ ଆଇନ ଦଳର ସଦସ୍ୟ ଉମିଆର ନିଆଜି କହିଛନ୍ତି, ପୂର୍ବତନ ପ୍ରଧାନମନ୍ତ୍ରୀ ଭଲ ଏବଂ ସୁସ୍ଥ ଅଛନ୍ତି।
ନିଆଜି ଦାବି କରିଛନ୍ତି ଯେ, ୬ ଜଣିଆ ଦଳ ମଧ୍ୟରୁ ତାଙ୍କୁ କେବଳ ଇମ୍ରାନ୍ ଖାନଙ୍କୁ ଭେଟିବାକୁ ଅନୁମତି ଦିଆଯାଇଥିଲା। ପିଟିଆଇ ମୁଖ୍ୟଙ୍କ ସହ ତାଙ୍କର ସାକ୍ଷାତ ବିଷୟରେ କଥାବାର୍ତ୍ତା କରୁଥିବାବେଳେ ନିଆଜି ଅତ୍ୟନ୍ତ ଭାବପ୍ରବଣ ଦେଖାଯାଉଥିଲେ। ସେ ଗଣମାଧ୍ୟମକୁ କହିଛନ୍ତି ଯେ, ସାକ୍ଷାତ ସମୟରେ ଇମ୍ରାନ୍ ଖାନ କହିଛନ୍ତି, (ଜେଲରେ) ସୁବିଧା ଯୋଗାଇ ନ ଦିଆଗଲେ ମୁଁ ବ୍ୟସ୍ତ ନୁହେଁ, ମୋତେ ଯଦି ୧୦୦ବର୍ଷ ପାଇଁ କାରାଗାରରେ ରଖାଯିବ, ଏଥିରେ କୌଣସି ଫରକ ପଡିବନି, ମୁଁ ଏଥିପାଇଁ ପ୍ରସ୍ତୁତ, କାରଣ ଜଣେ ସ୍ବାଧୀନ ବ୍ୟକ୍ତି ପାଇଁ ବଳିଦାନ ଦେବାକୁ ପଡ଼ିଥାଏ।