ରସୁଲପୁର,୧୯ା୭(ଡି.ଏନ.ଏ.): ରସୁଲପୁର ବ୍ଲକ ପହଁଗା ପଞ୍ଚାୟତରେ କାମଳ ରୋଗ ୨ ଜଣଙ୍କ ଜୀବନ ନେଇଛି। ଗୋଟିଏ ପରିବାରର ଦମ୍ପତି ଏହି ରୋଗରେ ଆରପାରିକୁ ଚାଲିଯାଇଛନ୍ତି। ୫ବର୍ଷ ପୂର୍ବେ ସ୍ତ୍ରୀ ସରାଗୀ ଦଳାଇ ଉକ୍ତ ରୋଗରେ ଆକ୍ରାନ୍ତ ହୋଇ ମୃତ୍ୟୁବରଣ କରିଥିଲେ। ସ୍ବାମୀ ଶରତ ୧୫ ଦିନ ତଳେ ଆରପାରିକୁ ଚାଲି ଯାଇଛନ୍ତି। ଫଳରେ ସେମାନଙ୍କ ପୁଅ ପୀତବାସ (୧୭), ଝିଅ ସୁପ୍ରିୟା (୧୪) ଓ ସୁଲଗ୍ନା (୧୩) ଅନାଥ ହୋଇପଡ଼ିଛନ୍ତି। ଏହି ଅନାଥ ପିଲାଙ୍କୁ ଆଶୀର୍ବାଦ ଯୋଜନାରେ ସାମିଲ କରିବାକୁ ଦାବି ହେଉଛି। ଏକଥା ଜାଣିବା ପରେ ଯାଜପୁର ଜିଲାର ଅଗ୍ରଣୀ ସ୍ବେଚ୍ଛାସେବୀ ସଂଗଠନ ଅଂଶୁମାନ ଟ୍ରଷ୍ଟ ପକ୍ଷରୁ ଉକ୍ତ ପିଲାଙ୍କୁ ୧୦ ହଜାର ଟଙ୍କା ଓ ରାଶନ ସାମଗ୍ରୀ ପ୍ରଦାନ କରାଯାଇଛି। ଟ୍ରଷ୍ଟ ସମ୍ପାଦକ ହିମାଂଶୁ ଶେଖର ସାହୁ ପିଲାମାନଙ୍କୁ ଭେଟି ଉକ୍ତ ସହାୟତା ପ୍ରଦାନ କରିଛନ୍ତି।
ଶରତ ଯାଜପୁର ରୋଡ୍ ରେଲୱେ ଷ୍ଟେଶନରେ କୁଲି କାମ କରି ପରିବାର ପ୍ରତିପୋଷଣ କରୁଥିଲେ। ଉକ୍ତ ପରିବାର ଭୂମିହୀନ ହୋଇଥିବାରୁ ମୁଣ୍ଡ ଗୁଞ୍ଜିବାକୁ ଘର ଖଣ୍ଡିକ ଛଡ଼ା ଆଉ କିଛିନାହିଁ। ଶରତ ଯାହା ରୋଜଗାର କରନ୍ତି ସେଥିରେ ପରିବାର ଚଳେ। ସେଥିରୁ କିଛି ଅର୍ଥ ସଞ୍ଚୟ କରି ୩ ପିଲାଙ୍କୁ ପାଠ ପଢ଼ାଇବାରେ ଖର୍ଚ୍ଚ କରନ୍ତି। ପିଲାମାନେ ପାଠପଢ଼ି ରୋଜଗାରକ୍ଷମ ହେବେ ବୋଲି ଶରତଙ୍କ ଆଶାଥିଲା। ମାତ୍ର ସେ ଆଶା ଅଧୁରା ରହିଗଲା। ପୀତବାସ ଏବେ ଶଙ୍ଖଚିଲାସ୍ଥିତ ମା’ ହିଙ୍ଗୁଳା ଉଚ୍ଚ ମାଧ୍ୟମିକ କଲେଜରେ ଯୁକ୍ତ ୨ ଶ୍ରେଣୀରେ ଅଧ୍ୟୟନ କରୁଛନ୍ତି। ସୁପ୍ରିୟା ଓ ସୁଲଗ୍ନା ରାଛିପୁର ପଞ୍ଚାୟତର ଯୁଝୁପଦା ହାଇସ୍କୁଲରେ ଦଶମ ଓ ନବମ ଶ୍ରେଣୀରେ ପଢୁଛନ୍ତି। ମା’ବାପା ଚାଲିଗଲା ପରେ ପିଲାଙ୍କ ପାଠପଢ଼ା ପ୍ରଭାବିତ ହେବା ଏକପ୍ରକାର ନିଶ୍ଚିତ ହୋଇଯାଇଛି। ପିଲାମାନେ ରୋଜଗାରକ୍ଷମ ନୁହନ୍ତି। ଏଭଳି ସ୍ଥିତିରେ ସେମାନେ କିପରି ଦୈନନ୍ଦିନ ଜୀବନ ନିର୍ବାହ କରିବେ ତା’ ଉପରେ ବଡ଼ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ସମ୍ପର୍କରେ ବିଡିଓ ଉମାକାନ୍ତ ପରିଡ଼ା କହିଛନ୍ତି, ବ୍ଲକ ସମାଜ ମଙ୍ଗଳ ଅଧିକାରୀଙ୍କୁ ଏହି ଘଟଣାର ତଦନ୍ତ କରିବାକୁ ନିର୍ଦ୍ଦେଶ ଦିଆଯାଇଛି। ସେ ତଦନ୍ତ ରିପୋର୍ଟ ଦେଲାପରେ ପିଲାମାନଙ୍କୁ ଆଶୀର୍ବାଦ ଯୋଜନାରେ ସାମିଲ କରାଯିବ।