ନ୍ୟୁୟର୍କ,୧୪।୯(ପି.ଟି.): ୟୁଏସ୍ ଓପନ୍ ଚାମ୍ପିୟନ ଜାପାନର ନାଓମି ଓସାକା ଆମେରିକା ତଥା ସାରା ବିଶ୍ୱରେ ଥିବା ବର୍ଣ୍ଣବୈଷମ୍ୟବାଦ ବିରୋଧରେ ଏକ ପ୍ରକାର ଯୁଦ୍ଧ ଘୋଷଣା କରିଛନ୍ତି। ଆମେରିକାରେ ଚାଲିଥିବା କୃଷ୍ଣକାୟ ବ୍ୟକ୍ତିଙ୍କ ଉପରେ ଅତ୍ୟାଚାର ବିରୋଧରେ ସେ ସ୍ବର ଉତ୍ତୋଳନ କରିଛନ୍ତି। ଏଥିପାଇଁ ସେ ୟୁଏସ୍ ଓପନ୍ ଟୁର୍ନାମେଣ୍ଟ ଅବସରରେ ୭ଟି ମ୍ୟାଚ୍ ଖେଳିବା ଅବସରରେ ଭିନ୍ନ ଭିନ୍ନ ମାସ୍କ ପିନ୍ଧିଥିଲେ। ଏହି ମାସ୍କଗୁଡକରେ ୭ଜଣ କୃଷ୍ଣକାୟ ଆମେରିକୀୟ ନାମ ଉଲ୍ଲେଖ ଥିଲା। ଏହି ବ୍ୟକ୍ତିମାନେ ପୂର୍ବରୁ ବର୍ଣ୍ଣବୈଷମ୍ୟଜନିତ ଅତ୍ୟାଚାରର ଶିକାର ହୋଇଥିଲେ। ଏହି ସାମାଜିକ କଳଙ୍କକୁ ରୋକିବା ପାଇଁ ମିଳୁଥିବା ସବୁ ପ୍ରକାର ସୁଯୋଗର ସେ ସଦ୍ବ୍ୟବହାର କରିବେ ବୋଲି କହିଛନ୍ତି।
ଫାଇନାଲରେ ଓସାକା ୧୨ ବର୍ଷୀୟ କୃଷ୍ଣକାୟ ବାଳକର ନାମ (ସାମିର ରାଇସ୍) ଲେଖାଥିବା ମାସ୍କ ବ୍ୟବହାର କରିଥିଲେ। ୨୦୧୪ରେ ଓହିଓରେ ଏହି ବାଳକକୁ ପୋଲିସ ଗୁଳିକରି ମାରି ଦେଇଥିଲା। ସେତେବେଳକୁ ଏହି ବାଳକ ଏକ ଖେଳଣା ବନ୍ଧୁକ ଧରିଥିଲା। ସେତେବେଳେ ଏ ନେଇ ବେଶ୍ ଚର୍ଚ୍ଚା ଓ ଆନ୍ଦୋଳନ ସୃଷ୍ଟି ହୋଇଥିଲା।
କିମ୍ବଦନ୍ତୀ ବାସ୍କେଟବଲ୍ ଖେଳାଳି କୋବ୍ ବ୍ରାଏଣ୍ଟଙ୍କୁ ଓସାକା ନିଜର ଆଦର୍ଶ ଭାବେ ବିବେଚନା କରନ୍ତି। ଚଳିତବର୍ଷ ଏକ ହେଲିକ୍ୟାପ୍ଟର ଦୁର୍ଘଟଣାରେ ବ୍ରାଏଣ୍ଟ ମୃତ୍ୟୁବରଣ କରିଥିଲେ। ବ୍ରାଏଣ୍ଟ ମୋ ବିଷୟରେ ଯାହା ଭାବୁଥିଲେ ତାହା କରି ଦେଖାଇବାକୁ ଚାହେଁ ବୋଲି ଓସାକା କହିଛନ୍ତି। ସାରା ଟୁର୍ନାମେଣ୍ଟରେ ସେ କୋବ୍ ବ୍ରାଏଣ୍ଟଙ୍କ ଲେକର୍ସ ଶାର୍ଟ ପିନ୍ଧି ମ୍ୟାଚ ସବୁ ଖେଳିଥିବାର ଦେଖାଯାଇଥିଲା।
ବ୍ରାଏଣ୍ଟଙ୍କ ପରମ୍ପରାକୁ ବଞ୍ଚାଇ ରଖିବାକୁ ଚାହେଁ ବୋଲି ସେ କହିଛନ୍ତି। ତାଙ୍କ ଭଳି ଜଣେ ଲୋକ କିପରି ବହୁତ ଲୋକଙ୍କୁ ପ୍ରେରଣା ଦେଇଛନ୍ତି ତାହା ଭାବିଲେ ଆଶ୍ଚର୍ଯ୍ୟ ଲାଗେ। ସେ ଜଣେ ଭଲ ଖେଳାଳି ହେବା ସଙ୍ଗେସଙ୍ଗେ ଭଲ ମଣିଷ ଥିଲେ ବୋଲି ୟୁଏସ୍ ଓପନ୍ ଚାମ୍ପୟନ ହେବା ପରେ ଓସାକା କହିଛନ୍ତି। ଭବିଷ୍ୟତରେ ଜଣେ ବଡ଼ ଖେଳାଳି ହେବି ବୋଲି ବ୍ରାଏଣ୍ଟ କହୁଥିଲେ। ଆଶା କରୁଛି ଏହା ହେବ। ତେବେ ସମୟ ସବୁକିଛି କହିବ। ୭ଟି ମ୍ୟାଚ୍ ଖେଳିବା ଅସବରରେ ତାଙ୍କ ମାସ୍କରେ ଯେଉଁ ଲୋକଙ୍କ ନାମ ଲେଖାଯାଇଥିଲା ସେମାନଙ୍କ ପରିବାର ଲୋକଙ୍କୁ ଓସାକା ସାକ୍ଷାତ କରିବାକୁ ଚାହାନ୍ତି। କୋଭିଡ୍-୧୯ ମହାମାରୀ କାରଣରୁ ଜାରି କରାଯାଇଥିବା ଲକ୍ଡାଉନ ଓ କ୍ୱାରାଣ୍ଟାଇନ୍ ଅବସରରେ ବହୁତ କିଛି ଶିକ୍ଷା କରିଛି। ଇତିମଧ୍ୟରେ ବହୁତ ପରିପକ୍ୱତା ହାସଲ କରିଛି। ଜଣେ ମଣିଷ ଭାବେ ସମ୍ପୂର୍ଣ୍ଣତା ହାସଲ କରିବା ପାଇଁ ପ୍ରୟାସ ଜାରି ରଖିବି ବୋଲି ସେ କହିଛନ୍ତି।