ସିଓଲ: ଦକ୍ଷିଣ କୋରିଆ ଅଭିନେତା ତଥା ଓସ୍କାର ବିଜେତା ଫିଲ୍ମ ‘ପାରାସାଇଟ୍’ରେ କାମ କରିଥିବା ଅଭିନେତା ଲି ସୁନ କ୍ୟୁ ଆଉ ନାହାନ୍ତି। ସନ୍ଦେହ ଅବସ୍ଥାରେ ଏକ କାର୍ରୁ ତାଙ୍କ ମୃତଦେହକୁ ଜବତ କରାଯାଇଛି। ସେ ଡ୍ରଗ୍ସ ଏବଂ ନିଶାଦ୍ରବ୍ୟ ସେବନ କରୁଥିବା କୁହାଯାଉଥିବା ବେଳେ ପୋଲିସ ମାମଲାର ତଦନ୍ତ ଆରମ୍ଭ କରିଛି।
ଦେଶର ଜରୁରିକାଳୀନ କାର୍ଯ୍ୟାଳୟ ପକ୍ଷରୁ ବୁଧବାର ପ୍ରଶଂସକଙ୍କ ଅବଗତି ନିମନ୍ତେ କୁହାଯାଇଛି ଯେ, ସେଣ୍ଟ୍ରାଲ୍ ସିଓଲ ପାର୍କର ଏକ କାର୍ରେ ଲି ସୁନ୍ଙ୍କୁ ଅଚେତ ଅବସ୍ଥାରେ ପଡ଼ିରହିଥିବା ଦେଖାଯାଇଥିଲା। ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲେ ହେଁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ତେବେ ଅଭିନେତା ସୁଇସାଇଡ୍ ନୋଟ୍ ଲେଖି ଘରୁ ବାହାରିଥିବା ପୋଲିସକୁ ତାଙ୍କ ପତ୍ନୀ ଜଣାଇଥିଲେ। ଏଣୁ ପ୍ରାରମ୍ଭିକ ତଦନ୍ତରୁ ପୋଲିସ ଅଭିନେତା ଆତ୍ମହତ୍ୟା କରିଥିବା ସନ୍ଦେହ କରୁଛି।
ମୃତ୍ୟୁର ଗୋଟିଏ ଦିନ ପୂର୍ବରୁ ଲି ସୁନ୍ଙ୍କୁ ଡ୍ରଗ୍ସ ମାମଲାରେ ପଚରାଉଚରା କରାଯାଇଥିଲା। ହେଲେ ସେ କିଛି ବି ସେବନ କରୁ ନ ଥିବା ସ୍ପଷ୍ଟ କରିଥିଲେ। ଘଟଣାର ଗୋଟିଏ ଦିନ ପରେ ଏବେ ତାଙ୍କର ମୃତଦେହ ମିଳିବା ପରେ ସନ୍ଦେହ ବଢ଼ିଛି।