ଭୁବନେଶ୍ୱର: କରୋନା ମହାମାରୀରେ କ୍ଷତିଗ୍ରସ୍ତ ହୋଇଥିବା ଖୁଚୁରା ଏବଂ ପାଇକାରୀ ବ୍ୟବସାୟୀଙ୍କୁ ଏମ୍ଏସ୍ଏମ୍ଇ ବର୍ଗରେ ସାମିଲ କରି ସରକାରଙ୍କ ସହାୟତା ପ୍ରଦାନ ପାଇଁ ଶୁକ୍ରବାର କେନ୍ଦ୍ର ସରକାରଙ୍କ ପକ୍ଷରୁ ନିଷ୍ପତ୍ତି ନିଆଯାଇଛି। କେନ୍ଦ୍ର ସରକାରଙ୍କ ଉକ୍ତ ନିଷ୍ପତ୍ତିକୁ ଓଡ଼ିଶା କ୍ଷୁଦ୍ର ଶିଳ୍ପ ସଂଘ (ଓସିଆ) ପକ୍ଷରୁ ଘୋର ବିରୋଧ କରାଯାଇଛି। ଏହି ପରିପ୍ରେକ୍ଷୀରେ ସଂଘ କହିଛି ଯେ, ସରକାର ଅଣୁ, କ୍ଷୁଦ୍ର ଏବଂ ମଧ୍ୟମ ଶିଳ୍ପର ସଂଜ୍ଞାକୁ ବଦଳାଇ ଏମ୍ଏସ୍ଏମ୍ଇ କରିଦେଲେ କିଛି ହେବନାହିଁ। ନିକଟରେ ସରକାର ଏମ୍ଏସ୍ଏମ୍ଇର ସଂଜ୍ଞା ପୁନଃ ନିର୍ଦ୍ଧାରିତ କରିବା ସହ ନୂଆ ବ୍ୟବସ୍ଥାରେ କାରଖାନା ଏବଂ ଯନ୍ତ୍ରପାତିରେ ନିବେଶ ଓ କାରବାର ହିସାବରେ ଏମ୍ଏସ୍ଏମ୍ଇର ବର୍ଗୀକୃତ କରାଗଲା। ଏଭଳି ସମୟରେ ଏହି ବର୍ଗର ବ୍ୟବସାୟୀଙ୍କୁ ଏହା ପରିସରକୁ ଆଣିବା ଦ୍ବାରା ଏମ୍ଏସ୍ଏମ୍ଇର ଗୁରୁତ୍ୱ ଆହୁରି ହ୍ରାସ ପାଇବ; ଯାହା ଦ୍ୱାରା ଏମ୍ଏସ୍ଏମ୍ଇ ଅଧୀନରେ ଆସୁଥିବା ବିଭିନ୍ନ କ୍ଷେତ୍ରର ବାସ୍ତବ ଗଣନା କରିବା ଏବଂ ସେମାନଙ୍କ ସମସ୍ୟାକୁ ଉଚିତ ଭାବେ ସମାଧାନ କରିବା କଷ୍ଟକର ହେବ। ସରକାରଙ୍କ ପକ୍ଷରୁ ପ୍ରଦାନ କରାଯାଉଥିବା ସହାୟତାକୁ କିପରି ପ୍ରଦାନ କରାଯିବ ସେ ନେଇ ଏକ ସାଧାରଣ ନୀତି ପ୍ରସ୍ତୁତ କରିବା କଷ୍ଟକର ହୋଇଯିବ ବୋଲି ସଂଘ କହିଛି। ଅତୀତରେ ସେବା କ୍ଷେତ୍ରକୁ ନେଇ ଯେତେବେଳେ ମାନଦଣ୍ଡ ପ୍ରସ୍ତୁତ କରାଗଲା ସେ ସମୟରେ ବ୍ୟାଙ୍କଗୁଡ଼ିକ ସେବା କ୍ଷେତ୍ରକୁ ଋଣ ପ୍ରଦାନ କରିବା ଲାଗି ଅଧିକ ଆଗ୍ରହ ଦେଖାଇଲେ; ଯଦ୍ଦ୍ବାରା ବ୍ୟାଙ୍କ ପକ୍ଷରୁ ପ୍ରଦାନ କରାଯାଇଥିବା ଋଣ ସେମାନଙ୍କ ପାଇଁ ଅଧିକ ସୁରକ୍ଷିତ ରହୁଥିଲା। ସେହିଭଳି ଏମ୍ଏସ୍ଏମ୍ଇ ପାଇଁ ଧାର୍ଯ୍ୟ ଋଣ ପ୍ରଦାନ ଲକ୍ଷ୍ୟ ସେମାନେ ଠିକ ଭାବେ ପୂରଣ କରିପାରିଛନ୍ତି ବୋଲି ସରକାରଙ୍କୁ ଦର୍ଶାଇ ପାରୁଥିଲେ। ଏହି ସବୁ ବ୍ୟବସାୟୀଙ୍କୁ ଏହି ବର୍ଗରେ ସାମିଲ କରାଯିବା ଦ୍ବାରା ଆଗାମୀ ଦିନରେ ବିଭିନ୍ନ ସମସ୍ୟା ଉପୁଜିବ ବୋଲି ସଂଘ ଆକଳନ କରିଛି। ଏଥିସହିତ ସରକାରଙ୍କୁ ସାମଗ୍ରୀ ଯୋଗାଣ କ୍ଷେତ୍ରରେ ମଧ୍ୟ ଏମାନେ କେତେ ସହାୟକ ହେବେ। ସରକାରଙ୍କ ଭୋକାଲ ଫର୍ ଲୋକାଲ୍ ଏବଂ ମେକ୍ ଇନ୍ ଇଣ୍ଡିଆ ଭଳି ଯୋଜନାକୁ କିପରି କାର୍ଯ୍ୟକାରୀ କରାଯାଇପାରିବ ବୋଲି ସଂଘ ଆଶଙ୍କା କରିଛି। ଦେଶର ଅଢେଇ କୋଟି ଖୁଚୁରା ଓ ପାଇକାରୀ ବ୍ୟବସାୟୀଙ୍କୁ ଏମ୍ଏସ୍ଏମ୍ଇରେ ସାମିଲ କରିବା ଦ୍ବାରା ଉପତ୍ାଦନ କ୍ଷେତ୍ରର ଗୁରୁତ୍ୱ ହ୍ରାସ ପାଇବ ବୋଲି ‘ଓସିଆ’ର ସଭାପତି ସ୍ମରଜିତ ମହାନ୍ତି ମତବ୍ୟକ୍ତ କରିଛନ୍ତି। ସଂଘର ଦାବିକୁ ସରକାର ବିଚାର କରି ଏଥିରେ ଆବଶ୍ୟକ ପରିବର୍ତ୍ତନ କରିବାକୁ ରାଜ୍ୟ ସରକାରଙ୍କ ନିକଟରେ ଓସିଆ ପକ୍ଷରୁ ଦାବି କରାଯାଇଛି।