କଥାରେ ଅଛି ରଖେ ହରି ତ ମାରେ କିଏ। ସତରେ ଭଗବାନ ରକ୍ଷା କଲେ କେହି କିଛି ବି କ୍ଷତି କରିପାରିବେ ନାହିଁ। ରାଜସ୍ଥାନର ନାଗୋରରେ ଏକ ଆଶ୍ଚର୍ଯ୍ୟଜନକ ଘଟଣା ଦେଖିବାକୁ ମିଳିଛି। ଏସ୍ୟୁଭି କାର୍ ଦୁର୍ଘଟଣା ଘଟାଇବା ପରେ ୮ ଥର ଓଲଟି ପଡିଲା ମାତ୍ର କାରରେ ଥିବା ୫ ଯାତ୍ରୀ ସଂପୂର୍ଣ୍ଣ ସୁରକ୍ଷିତ ଥିଲେ। ଏହି ସମୟର ଭିଡିଓ ସିସିଟିଭିରେ କଏଦ ହୋଇଛି। ଯେଉଁଥିରେ କାର୍ କିପରି ହାଇୱେରେ ୮ ଥର ଓଲଟିବା ପରେ ସୋ’ରୁମ ଆଗରେ ପଡ଼ିଛି। ଏହି ସମୟର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
କାରରେ ମୋଟ ୫ଜଣ ଯାତ୍ରୀ ଥିଲେ। ସମସ୍ତେ ନାଗୌରରୁ ବିକାନରକୁ ଯାଉଥିଲେ। ଏହି ସମୟରେ ହଠାତ୍ ଡ୍ରାଇଭର କାରକୁ ବୁଲାଇଥିଲେ ଓ ପରେ ଗାଡି ଉପରୁ ନିୟନ୍ତ୍ରଣ ହରାଇଥିଲେ। କିଛି ସେକେଣ୍ଡ ମଧ୍ୟରେ, ଗାଡି ଆଠଥର ଫ୍ଲପ ହୋଇ ଏକ କାର୍ ଶୋ’ରୁମ ସାମ୍ନାରେ ଓଲଟି ପଡିଲା। ଦୁର୍ଘଟଣା ଯୋଗୁ ଶୋ’ରୁମର ମୁଖ୍ୟ ଫାଟକ ମଧ୍ୟ ଭାଙ୍ଗି ଯାଇଥିଲା। ଏହି ଦୁର୍ଘଟଣା ଏତେ ଭୟଙ୍କର ଥିଲା ଯେ କାରଟି ସମ୍ପୂର୍ଣ୍ଣ ଖଣ୍ଡ ଖଣ୍ଡ ହୋଇଯାଇଥିଲା, କିନ୍ତୁ ଆଶ୍ଚର୍ଯ୍ୟର କଥା ହେଉଛି ଏହି ଦୁର୍ଘଟଣାରେ କୌଣସି ଯାତ୍ରୀ ଆହତ ହୋଇନାହାଁନ୍ତି।
ସୂଚନାନୁଯାୟୀ, ଦୁର୍ଘଟଣା ସମୟରେ ଡ୍ରାଇଭର କାରରୁ ଡେଇଁ ପଡ଼ିଥିଲେ। ଏହା ପରେ କାରଟି ଓଲଟି ପଡ଼ିବା ପରେ ଅବଶିଷ୍ଟ ୪ ଜଣ ଯାତ୍ରୀ ମଧ୍ୟ ଶୋ’ରୁମ ନିକଟରେ ପହଞ୍ଚିଥିଲେ। ସେଠାରେ ପହଞ୍ଚିବା ପରେ ସମସ୍ତେ ଥଟ୍ଟା କରି ଶୋ’ରୁମ୍ରେ ପ୍ରବେଶ କରି କହିଲେ, ଆମକୁ ଚା ଦିଅ । ଅନ୍ୟ ଜଣେ ଅଧିକାରୀ କହିଛନ୍ତି, ”ଏଥିରେ କେହି ଆହତ ହୋଇନାହାଁନ୍ତି, ଗୋଟିଏ ବି ସ୍କ୍ରାଚ ମଧ୍ୟ ନଥିଲା। ଶୋ’ରୁମରେ ପହଞ୍ଚିବା ମାତ୍ରେ ସେମାନେ ଚା ମାଗିଥିଲେ।” ତେବେ ସେମାନଙ୍କ ସୌଭାଗ୍ୟ ପାଇଁ ବଡ଼ ଦୁର୍ଘଟଣାରୁ ବର୍ତ୍ତି ଯାଇଛନ୍ତି।