ଭୁବନେଶ୍ୱର, ୧୪।୬(ବ୍ୟୁରୋ) : ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ (ଓଟିଡିସି) ପକ୍ଷରୁ ଏଥର ମଧ୍ୟ ‘ପିଠା ଅନ୍ ହ୍ବିଲ୍’ କାର୍ଯ୍ୟକ୍ରମ କରାଯିବ। କରୋନା କଟକଣା ଉଠିବା ପରେ ଏଥର ଧୁମ୍ଧାମ୍ରେ ରଜ ପାଳନ ହେବ। ଏହାକୁ ଦୃଷ୍ଟିରେ ରଖି ପାନ୍ଥନିବାସ ଠାରେ ସୋମବାର ‘ରଜ ମହୋତ୍ସବ’ ଓ ‘ପିଠା ଅନ୍ ହ୍ବିଲ୍’ କାର୍ଯ୍ୟକ୍ରମ ଉଦ୍ଘାଟିତ ହୋଇଯାଇଛି। ପହିଲି ରଜ ଠାରୁ ୩ଦିନ ପର୍ଯ୍ୟନ୍ତ ଶହୀଦ ନଗର ପୂଜା ମଣ୍ଡପ ପଡ଼ିଆରେ ରଜ ମହୋତ୍ସବ ଓ ସ୍ବତନ୍ତ୍ର ପ୍ରଦର୍ଶନୀ ହେବ। ସେହିପରି ପୋଡ଼ପିଠା, କାକରା, ଆରିସା, ମହୁଲ ପିଠା ଭଳି ବିଭିନ୍ନ ରକମର ପିଠା ଏହା ମାଧ୍ୟମରେ ବିକ୍ରି କରାଯିବ। ପୋଡ଼ପିଠାର ଦାମ୍ ୪୦୦ ଟଙ୍କା (୧ କେଜି) ଥିବାବେଳେ କାକରା, ଖିରଗଜା, ଆରିସା, ମଣ୍ଡା, ଲବଙ୍ଗଲତା (ଗୋଟା) ୨୦ ଟଙ୍କା, ଛେନାପୋଡ଼ (୧୦୦ ଗ୍ରାମ୍) ୫୦ ଟଙ୍କା, ମହୁଲ ପିଠା (ଗୋଟା) ୪୦ ଟଙ୍କା ରହିଛି। ପାନ୍ଥ ନିବାସ ସମେତ ନିମନ୍ତ୍ରଣ ରେଷ୍ଟୁରାଣ୍ଟ, କିଟ୍ ଛକ, ଶହୀଦ ନଗର ଦୁର୍ଗାପୂଜା ମଣ୍ଡପ ପଡ଼ିଆ ଏବଂ ରାଜ୍ୟ ସଂଗ୍ରହାଳୟ ଠାରେ ସୁସ୍ବାଦୁ ପାରମ୍ପରିକ ଓଡ଼ିଆ ପିଠା ବିକ୍ରୟ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ଏଥିସହ ଶହୀଦନଗର ପୂଜା ମଣ୍ଡପ ପଡ଼ିଆରେ ରଜଦୋଳିର ବ୍ୟବସ୍ଥା ସହ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହେବ ବୋଲି ଓଟିଡିସି ପକ୍ଷରୁ ସୂଚନା ଦିଆଯାଇଛି।