ରାୟଗଡ଼ା,୧୮ା୮(ଆଶିଷ ରଞ୍ଜନ ପଣ୍ଡା): ଓଡ଼ିଶା ଟିଚର୍ସ ଇଲିଜିବିଲିଟ୍ ଟେଷ୍ଟ (ଓଟିଇଟି) ପରୀକ୍ଷା ରାୟଗଡ଼ା ଜିଲାର ବିଭିନ୍ନ କେନ୍ଦ୍ରରେ ଶନିବାର ଅନୁଷ୍ଠିତ ହୋଇଯାଇଛି। ଏହି ପରୀକ୍ଷା ଆରମ୍ଭ ପୂର୍ବରୁ ଆସିଥିବା ପ୍ରଶ୍ନଗୁଡ଼ିକର ଉତ୍ତର ମୋବାଇଲରୁ ମୋବାଇଲ ଘୂରି ବୁଲୁଥିବା ସହ ଏହାର ଜେରକ୍ସ ବଜାରରେ ମିଳୁଥିବା ଦେଖିବାକୁ ମିଳିଥିଲା। ଶୁକ୍ରବାର ଅପରାହ୍ନରୁ ଏହା ଚର୍ଚ୍ଚା ହେଉଥିବା ବେଳେ ଶନିବାର ପୂର୍ବାହ୍ନରେ ପରୀକ୍ଷାର୍ଥୀ କେନ୍ଦ୍ରକୁ ଯିବା ପୂର୍ବରୁ ଉତ୍ତରପତ୍ର ପିଲାଙ୍କ ନିକଟରେ ଥିଲା। ତେବେ ଏହି ଉତ୍ତରପତ୍ର ଚଳିତ ପରୀକ୍ଷାରେ ପଡ଼ିଥିବା ପ୍ରଶ୍ନର କି ନୁହେଁ ତାହା ତଦନ୍ତ ପରେ ଜଣାପଡ଼ିବ।
ଏ ସମ୍ପର୍କରେ ଜିଲା ଶିକ୍ଷାଧିକାରୀ ବସନ୍ତ କୁମାର ନାୟକଙ୍କୁ ପଚାରିବାରୁ ଆମ ତରଫରୁ କୌଣସି ପ୍ରଶ୍ନପତ୍ର ବେନିୟମ ଭାବେ ଖୋଲାଯାଇନାହିଁ। ଠିକ୍ ସମୟରେ ପ୍ରଶ୍ନପତ୍ର ପ୍ୟାକେଟ ଖୋଲାଯାଇଛି। ତେଣୁ ଏହି ଉତ୍ତରପତ୍ର ପ୍ରଘଟ ଘଟଣା ସମ୍ପୂର୍ଣ୍ଣ ମିଥ୍ୟା ବୋଲି ନାୟକ କହିଛନ୍ତି। ଧଳା କାଗଜରେ ଲେଖାଯାଇ ମୋବାଇଲରୁ ମୋବାଇଲକୁ ଘୂରି ବୁଲୁଥିବା ଏହି ଉତ୍ତରପତ୍ର ଘଟଣାର ଏକ ଉଚ୍ଚସ୍ତରୀୟ ତଦନ୍ତ ପାଇଁ ପରୀକ୍ଷାର୍ଥୀମାନେ ଦାବି କରିଛନ୍ତି। ଏହି ଉତ୍ତରପତ୍ର ପରୀକ୍ଷାର୍ଥୀଙ୍କୁ ଚଢ଼ା ଦରରେ ବିକ୍ରିକରି ମୋଟା ଅଙ୍କର ଅର୍ଥ ଆଦାୟ କରିବା ପାଇଁ ଦଲାଲମାନେ ଏଭଳି କରିଥାଇପାରନ୍ତି ବୋଲି ପରୀକ୍ଷାର୍ଥୀମାନେ କହିଛନ୍ତି। ସୂଚନାଯୋଗ୍ୟ, ରାୟଗଡ଼ା ଜିଲାର ୮ କେନ୍ଦ୍ରରେ ମୋଟ ୩,୩୮୪ଜଣ ଓଟିଇଟି ପରୀକ୍ଷା ଦେଇଛନ୍ତି। ସେଥିରୁ ପେପର-୧ ରେ ୯୬୧, ପେପର-୨ ରେ ୨୪୨୩ ପରୀକ୍ଷାର୍ଥୀ ରହିଛନ୍ତି। ତେବେ ଶୁକ୍ରବାର ଅପରାହ୍ନରୁ ଏହି ଉତ୍ତରପତ୍ର ମୋବାଇଲରେ ଭାଇରାଲ ହୋଇଛି। ଏ ନେଇ ଏକ ଅଡିଓ ରେକର୍ଡିଂ ମଧ୍ୟ ସୋସିଆଲ ମିଡିଆରେ ଘୂରି ବୁଲୁଥିବା ବେଳେ ଏଥିରେ ଦଲାଲ ଜଣକ ଉତ୍ତରପତ୍ର ରହିଥିବା ଓ ରେକର୍ଡିଂ ଚାଲିଥିବା କହି ରାୟଗଡ଼ା ଆସି ମିଶିବାକୁ କହୁଥିବା ଜଣାପଡ଼ିଛି। ଗଣିତ, ଓଡ଼ିଆ, ଇଂଲିଶ ଓ ସିଡିପି ଏହିଭଳି ଚାରିଟି ବିଷୟର ପ୍ରାୟ ୧୦୦ ଟି ଉତ୍ତର ଥିବା ଦୁଇଟି କାଗଜର ଜେରକ୍ସ ହୋଇ ମୋବାଇଲରୁ ମୋବାଇଲ ଘୂରିବୁଲୁଥିବା ଜଣାପଡିଛି।