ନୂଆଦିଲ୍ଲୀ, ୨ା୯ (ପି.ଟି.)- ଗତ ସପ୍ତାହରେ କୋଭିଡ୍-୧୯ ଟେଷ୍ଟରେ ଚେନ୍ନାଇ ସୁପର କିଙ୍ଗ୍ସ ଦଳର ୧୩ ଜଣ ସଦସ୍ୟଙ୍କର ରିପୋର୍ଟ ପଜିଟିଭ ଆସିଥିଲା। ତେବେ ଏମାନଙ୍କୁ ଛାଡ଼ି ଦଳର ଅନ୍ୟ ସମସ୍ତ ସଦସ୍ୟଙ୍କର ଫଳାଫଳ ନେଗେଟିଭ୍ ଆସିଛି। ଏହି ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍) ଟିମ୍ର ସିଇଓ କେ.ଏସ୍. ବିଶ୍ୱନାଥନ ମଙ୍ଗଳବାର ସୂଚନା ଦେଇଛନ୍ତି। କୋଭିଡ୍-୧୯ ଟେଷ୍ଟରେ ଯେଉଁ ୧୩ ଜଣଙ୍କର ପଜିଟିଭ ଆସିଥିଲା ସେମାନଙ୍କ ମଧ୍ୟରେ ଭାରତୀୟ ସିମ୍ ବୋଲର ଦୀପକ ଚହର ଏବଂ ଭାରତ ଏ’ ବ୍ୟାଟ୍ସମ୍ୟାନ ଋତୁରାଜ ଗାଏକ୍ୱାଡ୍ ଥିଲେ। ସେମାନେ ସମସ୍ତେ ୧୪ ଦିନ ପାଇଁ କ୍ୱାରାଣ୍ଟାଇନ୍ରେ ଅଛନ୍ତି। ସମସ୍ତଙ୍କର ସେପ୍ଟେମ୍ବର ୩ରେ ଆଉଥରେ ଟେଷ୍ଟ ହେବ। ଟ୍ରେନିଂ ସେପ୍ଟେମ୍ବର ୪ ଅର୍ଥାତ ଶୁକ୍ରବାର ଆରମ୍ଭ ହୋଇପାରେ ବୋଲି ବିଶ୍ୱନାଥନ କହିଛନ୍ତି। ଟିମ୍ ବର୍ତ୍ତମାନ ଦୁବାଇରେ ଅବସ୍ଥାନ କରୁଛି। ପ୍ରୋଟୋକଲ ଅନୁସାରେ ଦୀପକ ଓ ଋତୁରାଜଙ୍କୁ ୧୪ ଦିନ କ୍ୱାରାଣ୍ଟାଇନ୍ରେ ରହିବାକୁ ପଡ଼ିବ। ଦୁଇଥର ନେଗେଟିଭ୍ ଟେଷ୍ଟ ପରେ ସେମାନେ ଦଳରେ ଯୋଗ ଦେଇ ପାରିବେ। ଆଇପିଏଲ୍ ସେପ୍ଟେମ୍ବର ୧୯ରୁ ଖେଳାଯିବା କାର୍ଯ୍ୟକ୍ରମ ରହିଛି। ପାରିବାରିକ ବିପତ୍ତି ଯୋଗୁ ସିନିୟର କ୍ରିକେଟର ସୁରେଶ ରାଇନା ଆଇପିଏଲ୍ରୁ ଓହରି ଘରବାହୁଡ଼ା କରିଛନ୍ତି। ତାଙ୍କର ବଦଳ ଖେଳାଳି ଭାବେ ଦଳରେ କାହାକୁ ନିଆଯିବ ତାହା ଏପର୍ଯ୍ୟନ୍ତ ସ୍ଥିର ହୋଇନାହିଁ। ଖବର ଅନୁସାରେ ସେପ୍ଟେମ୍ବର ୧୯ରେ ସିଏସ୍କେ ଆଇପିଏଲ୍ର ଉଦ୍ଘାଟନୀ ମ୍ୟାଚରେ ମୁମ୍ବାଇ ଇଣ୍ଡିଆନ୍ସକୁ ଭେଟିବା ସମ୍ଭାବନା ରହିଛି।
