ପୁରୁଷୋତ୍ତମପୁର,୧୭।୧୦(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ସହର ମଧ୍ୟସ୍ଥ ପୋଲିସ ଥାନା ଓ ଏସ୍ଡିପିଓ ଅଫିସ ପଛପଟ ଚାଙ୍ଗୁଡିଆପଦର ସାହିରେ ଥିବା ଏକ ଦୋକାନରୁ ମଙ୍ଗଳବାର ଲୁଟ୍ ହୋଇଥିଲା। ଲୁଟେରା କୋଟିଏ ଟଙ୍କାରୁ ଉର୍ଦ୍ଧ୍ୱ ମୂଲ୍ୟର ଅଳଙ୍କାର ଲୁଟି ନେଇଥିଲେ। ଏହି ଘଟଣାକୁ ୪ ଦିନ ବିତିଯାଇଥିଲେ ସୁଦ୍ଧା ପୋଲିସ ଲୁଟେରାଙ୍କ କୌଣସି ସୁରାକ ପାଇପାରିନାହିଁ । ଥାନା ଓ ଏସ୍ଡିପିଓ ଅଫିସ ପଛପଟ ତଥା ସହର ମଝିରେ ଦୋକାନ ରହିଥିଲେ ମଧ୍ୟ ଲୁଟେରାମାନେ ଏହାକୁ ଖାତିର ନକରି ଏଭଳି ଘଟଣା ଭିଆଇଛନ୍ତି। ଯାହାକି ପୋଲିସ ପାଇଁ ଖୋଲା ଚ୍ୟାଲେଞ୍ଜ ହୋଇପଡିଛି। ଘଟଣାସ୍ଥଳକୁ ଶନିବାର ନିଜେ ଦକ୍ଷିଣାଞ୍ଚଳ ଡିଆଇଜି ସତ୍ୟବ୍ରତ ଭୋଇ ଓ ଗଞାମ ଏସ୍ପି ବ୍ରିଜେସ କୁମାର ରୟ ଆସି ଘଟଣାର ସମସ୍ତ ପ୍ରକାରର ପାରିପାଶର୍ବିକ ସ୍ଥିତିକୁ ନେଇ ତଦନ୍ତ କରିଛନ୍ତି। ପୂର୍ବରୁ ଏସ୍ପି ଓ ଅତିରିକ୍ତ ଏସ୍ପି ଠାକୁର ପ୍ରସାଦ ପାତ୍ର ଆସି ତଦନ୍ତ କରି ଯାଇଥିଲେ।
