ଭୁବନେଶ୍ୱର,୯ା୬ (ବ୍ୟୁରୋ): ପାକିସ୍ତାନର ଗୋଇନ୍ଦା ସଂସ୍ଥା ଇଣ୍ଟର ସର୍ଭିସେସ୍ ଇଣ୍ଟେଲିଜେନ୍ସ (ଆଇଏସ୍ଆଇ)ର ଏଜେଣ୍ଟଙ୍କୁ ସିମ୍ କାର୍ଡର ଓଟିପି ଶେୟାରିଂ ମାମଲାରେ କ୍ରାଇମବ୍ରାଞ୍ଚର ସ୍ପେଶାଲ ଟାସ୍କଫୋର୍ସ (ଏସ୍ଟିଏଫ୍) ଆଉ ଜଣେ ଅଭିଯୁକ୍ତଙ୍କୁ ନୟାଗଡ଼ରୁ ଗିରଫ କରିଛି। ସେ ହେଲେ ନୂଆଗାଁ ଥାନା ଅଞ୍ଚଳର ପ୍ରଦ୍ୟୁମ୍ନ କୁମାର ସାହୁ (୩୨)। ପ୍ରଦ୍ୟୁମ୍ନଙ୍କୁ ଗୁରୁବାର କୋର୍ଟଚାଲାଣ କରାଯିବା ପରେ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଏହି ମାମଲାରେ ପୂର୍ବରୁ ନୟାଗଡ଼ ଜିଲାର ଆଇଟିଆଇ ଶିକ୍ଷକ ପଠାଣିସାମନ୍ତ ଲେଙ୍କା, ସରୋଜ କୁମାର ନାୟକ ଏବଂ ଯାଜପୁର ଜିଲାର ସୌମ୍ୟ ପଟ୍ଟନାୟକଙ୍କୁ ଏସ୍ଟିଏଫ୍ ଗିରଫ କରିଥିଲା। ଏସ୍ଟିଏଫ୍ ପକ୍ଷରୁ ଦିଆଯାଇଥିବା ସୂଚନା ଅନୁଯାୟୀ, ଅଭିଯୁକ୍ତ ପ୍ରଦ୍ୟୁମ୍ନ ଗ୍ରାଜୁଏଟ୍ ହୋଇଥିବାବେଳେ ସେ ପୂର୍ବରୁ ଆଇଡିଆର ଟେରିଟୋରି ସେଲ୍ସ ଏକ୍ଜିକ୍ୟୁଟିଭ୍ ଓ ଜିଓ ପଏଣ୍ଟ ମ୍ୟାନେଜର ଭାବେ କାର୍ଯ୍ୟ କରୁଥିଲେ। ତେବେ ସେ ବର୍ତ୍ତମାନ ବ୍ଲାକ ବକ୍ ଓ ଫାସ୍ଟାଗ୍ କମ୍ପାନୀରେ କାମ କରୁଛନ୍ତି। ପ୍ରଦ୍ୟୁମ୍ନ ପୂର୍ବରୁ ବହୁ ଲୋକଙ୍କୁ ଜାଲରେ ଫସାଇ ଅନେକ ସିମ୍ କରିଥିଲେ। ତଦନ୍ତବେଳେ ଜଣାପଡ଼ିଛି ଯେ, ଆଇଟିଆଇ ଶିକ୍ଷକ ପଠାଣିସାମନ୍ତ ଲେଙ୍କାଙ୍କୁ ପ୍ରଦ୍ୟୁମ୍ନ ୫୦୦ରୁ ଉର୍ଦ୍ଧ୍ୱ ପ୍ରି-ଆକ୍ଟିଭେଟେଡ୍ ସିମ୍ ଓ ୧୫୦ରୁ ଊର୍ଦ୍ଧ୍ୱ ପ୍ରି-ଆକ୍ଟିଭେଟେଡ୍ ପେଟିଏମ୍ ୱାଲେଟ୍ ବିକ୍ରି କରିଛନ୍ତି। ଏହି ସିମ୍ ଓ ୱାଲେଟ୍କୁ ଆଇଏସ୍ଆଇ ଏଜେଣ୍ଟମାନେ ବ୍ୟବହାର କରୁଥିଲେ ବୋଲି ଏସ୍ଟିଏଫ୍ କହିଛି। ଏହି ମାମଲାରେ ଏସ୍ଟିଏଫ୍ ଅଧିକ ତଦନ୍ତ ଜାରି ରଖିଛି।
ସୂଚନାଯୋଗ୍ୟ, ପଠାଣିସାମନ୍ତ, ସରୋଜ, ସୌମ୍ୟ ପ୍ରି-ଆକ୍ଟିଭେଟେଡ୍ ସିମ୍ର ବିଭିନ୍ନ ସୋସିଆଲ ମିଡିଆ ଗ୍ରୁପ୍ ଦ୍ୱାରା ଆଇଏସ୍ଆଇ ଏଜେଣ୍ଟଙ୍କୁ ଓଟିପି ଶେୟାର କରି ବିପୁଳ ଟଙ୍କା ପାଉଥିଲେ। ଆଇଏସ୍ଆଇ ଏଜେଣ୍ଟମାନେ ଉକ୍ତ ଓଟିପିକୁ ଆଧାର କରି ହ୍ବାଟ୍ସଆପ୍, ଟେଲିଗ୍ରାମ, ଫେସ୍ବୁକ୍, ଇନ୍ଷ୍ଟାଗ୍ରାମ୍, ଟୁଇଟର୍ ଆଦି ସୋସିଆଲ ମିଡିଆ ଏବଂ ଆମାଜନ, ଫ୍ଲିପକାର୍ଟ ଭଳି ଶପିଂ ଆପ୍ରେ ଆକାଉଣ୍ଟ ଅପରେଟ୍ କରିପାରୁଛନ୍ତି। କିଛିଦିନ ତଳେ ଏସ୍ଟିଏଫ୍ ଏଭଳି ଏକ ହ୍ବାଟ୍ସଆପ୍ ଗ୍ରୁପ୍ର ସନ୍ଧାନ ପାଇଥିଲା। ସେଥିରେ ବହୁ ସଦସ୍ୟ ଥିବାବେଳେ ଏସ୍ଟିଏଫ୍ ଉପରୋକ୍ତ ୩ ଅଭିଯୁକ୍ତଙ୍କ ପରିଚୟ ପାଇବା ପରେ ସେମାନଙ୍କୁ ଗିରଫ କରି ଗତ ମେ’ ୧୪ରେ କୋର୍ଟଚାଲାଣ କରିଥିଲା। ପରେ ୩ ଅଭିଯୁକ୍ତଙ୍କୁ ୩ ଦିନିଆ ରିମାଣ୍ଡରେ ଆଣି ବହୁ ତଥ୍ୟ ହାସଲ କରିଥିଲା।