ମୁମ୍ବାଇ,୪।୭: ଶିବ ସେନା ଆମ ଶତ୍ରୁ ନୁହେଁ। ସେମାନେ ଆମ ବନ୍ଧୁ। କିଛି ବିଷୟ ଉପରେ ଆମର ମତଭେଦ ଅଛି। ଦୁଇ ପୂର୍ବତନ ସହଯୋଗୀ ଦଳ ମଧ୍ୟରେ ପୁଣି ଥରେ ପ୍ୟାଚ୍ ହେବ କି ନାହିଁ, ତାହା ପରିସ୍ଥିତି ଉପରେ ନିର୍ଭର କରେ। ଏକ ସାକ୍ଷାତ୍କାରରେ ଭାଜପା-ଶିବ ସେନା ମେଣ୍ଟ ପୁଣି ଥରେ ଫେରିବ କି ପ୍ରଶ୍ନ କରାଯିବାରୁ ଉପରୋକ୍ତ ଉତ୍ତର ଦେଇଛନ୍ତି ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ତଥା ଭାଜପାର ବରିଷ୍ଠ ନେତା ଦେବେନ୍ଦ୍ର ଫଡ଼ନାଭିସ। ତାଙ୍କର ଏଭଳି ମନ୍ତବ୍ୟ ରାଜ୍ୟ ରାଜନୀତିକୁ ସରଗରମ କରି ଦେଇଛି।
”ଆମ ବନ୍ଧୁ ୨୦୧୯ ବିଧାନସଭା ନିର୍ବାଚନରେ ଆମ ସହ ମିଶି ଲଢ଼ିଥିଲେ। କିନ୍ତୁ ନିର୍ବାଚନ ପରେ ସେମାନେ ଅନ୍ୟ (କଂଗ୍ରେସ ଓ ଏନ୍ସିପି) ସହ ହାତ ମିଳାଇ ଥିଲେ, ଯେଉଁମାନଙ୍କ ବିପକ୍ଷରେ ଆମେ ନିର୍ବାଚନ ଲଢ଼ିଥିଲୁ “ ବୋଲି ଫଡ଼ନାଭିସ କହିଛନ୍ତି। ନିକଟରେ କଂଗ୍ରେସ ରାଜ୍ୟରେ ପରବର୍ତ୍ତୀ ନିର୍ବାଚନରେ ଏକାକୀ ଲଢ଼ିବ ବୋଲି ଘୋଷଣା କରିଥିଲା। କିନ୍ତୁ ଉଦ୍ଧବ ଠାକେରଙ୍କ ନେତୃତ୍ୱାଧୀନ ସରକାରର କାର୍ଯ୍ୟକାଳ ଶେଷ ନ ହେଲା ପର୍ଯ୍ୟନ୍ତ ଆମ ସମର୍ଥନ ତାଙ୍କ ସହ ଅଛି ବୋଲି ରାଜ୍ୟ କଂଗ୍ରେସ ମୁଖ୍ୟ କହିଥିଲେ।
