ଭୁବନେଶ୍ୱର,୧୭।୮: ଭାରତୀୟ ଅଧିନାୟକ ମନପ୍ରୀତ୍ ସିଂ ହକିରେ ଦୃଷ୍ଟାନ୍ତମୂକଳ ଉନ୍ନତି ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭୂୟସୀ ପ୍ରଶଂସା କରିଛନ୍ତି। ପୁରୁଷ ଦଳର ବ୍ରୋଞ୍ଜ ପଦକ ଦେଶକୁ ନବୀନଙ୍କ ଏକ ବଡ଼ ଉପହାର ବୋଲି ସେ କହିଛନ୍ତି। କ୍ରୀଡ଼ାର ଜଣେ ବଡ଼ ସମର୍ଥକ ଭାବେ ନବୀନ ବେଶ୍ ଜଣାଶୁଣା। ଆମେ ଯେଉଁ ବ୍ରୋଞ୍ଜ ପଦକ ଜିତିଛୁ ତାହା ପ୍ରକୃତରେ ଦେଶକୁ ନବୀନଙ୍କ ଏକ ବହୁମୂଲ୍ୟ ଉପହାର ବୋଲି ସେ କହିଛନ୍ତି। ତାଙ୍କ ଦୂରଦୃଷ୍ଟି ଓ ପ୍ରୋତ୍ସାହନ କାରଣରୁ ଆମେ ଏହି ସଫଳତା ପାଇଛୁ ଓ ଦୀର୍ଘ ୪୧ ବର୍ଷ ପରେ ଅଲିମ୍ପକ୍ସ ପଦକ ହାସଲ କରିଛୁ। ଆମେ ସମସ୍ତଙ୍କ ପଛରେ ସେ ଖୁଣ୍ଟ ଭଳି ଠିଆ ହୋଇ ସମର୍ଥନ ଦେଇ ଆସିଛନ୍ତି। ତାଙ୍କ ନିରନ୍ତର ସମର୍ଥନ ଓ ମାର୍ଗଦର୍ଶନ ଏହି ସ୍ବପ୍ନ ସାକାର ହୋଇ ନ ଥାନ୍ତା ବୋଲି ମନପ୍ରୀତ କହିଛନ୍ତି।
ଏହାପୂର୍ବରୁ ଶେଷଥର ପାଇଁ ଭାରତ ୧୯୮୦ ମସ୍କୋ ଅଲିମ୍ପିକ୍ସରେ ଭାରତ ପଦକ ହାସଲ କରିଥିଲା। ଓଡ଼ିଶା ଆମ ପାଇଁ ଦ୍ୱିତୀୟ ଘର ସଦୃଶ। ଏହା ଆମ ଘର ଭଳି। ତେଣୁ ଦୀର୍ଘ ଦିନ ପରେ ଏଠାକୁ ଆସି ଖୁସି ଲାଗୁଛି। ଟୋକିଓ ଅଲିମ୍ପିକ୍ସର ସଫଳତାର ଶ୍ରେୟ ଓଡ଼ିଶାକୁ ଯାଉଛି। ଏଠାରେ ହକିକୁ ସମସ୍ତେ ଭଲ ପାଆନ୍ତି। ଓଡ଼ିଶାର ଲୋକେ ମଧ୍ୟ ଆମକୁ ବହୁତ ଭଲ ପାଉଛନ୍ତି। ଏହା ଅବର୍ଣ୍ଣନୀୟ। ଓଡ଼ିଶାରେ ଗତ କିଛି ବର୍ଷ ମଧ୍ୟରେ ବିଶ୍ୱକପ୍ ସମେତ ଏକାଧିକ ବିଶ୍ୱସ୍ତରୀୟ ଟୁର୍ନାମେଣ୍ଟ ଆୟୋଜନ ହୋଇଛି। ଏହି ଟୁର୍ନାମେଣ୍ଟ ଖେଳି ଆମେ ବହୁତ ଅଭିଜ୍ଞତା ହାସଲ କରିଛୁ। ଓଡ଼ିଶାରେ ହକିର ଲୋକପ୍ରିୟତା ଦେଶରେ ସର୍ବାଧିକ। ଓଡ଼ିଶାର ପୃଷ୍ଠପୋଷକତାରେ ହକିର ଆହୁରି ଉନ୍ନତି ହେବ ବୋଲି ମନପ୍ରୀତ କହିଛନ୍ତି।