ନୂଆଦିଲ୍ଲୀ,୧୧।୭: ସମ୍ପତ୍ତି ମାମଲାରେ ରିଲାଏନ୍ସ ଇଣ୍ଡଷ୍ଟ୍ରିର ଚେୟାରମ୍ୟାନ ମୁକେଶ ଅମ୍ବାନୀ ଓ୍ବାରେନ ବଫେଟଙ୍କୁ ପଛରେ ପକାଇଦେଇଛନ୍ତି। ବ୍ଲୁମମର୍ଗ ବିଲେନିୟର ଇଣ୍ଡେକ୍ସ ଅନୁଯାୟୀ ଗୁରୁବାର ସୁଦ୍ଧା ମୁକେଶଙ୍କ କମ୍ପାନୀ ୬୮.୩ ବିଲିୟନ୍ ଡଲାର ଆୟ କରିଥିବା ବେଳେ ଓ୍ବାରେନ ବଫେଟଙ୍କ କମ୍ପାନୀ ୬୭.୯ ବିଲିୟନ ଡଲାରରେ ପହଞ୍ଚିଛି। Berkshire Hathawayର ପ୍ରତିଷ୍ଠାତା ବଫେଟଙ୍କୁ ବିଶ୍ୱର ସବୁଠାରୁ ବଡ଼ ଓ ସଫଳ ନିବେଶକ ଭାବେ ଜଣାଯାଏ। ୨୦୦୮ରେ ବଫେଟ ବିଶ୍ୱର ସବୁଠାରୁ ଧନଶାଳୀ ବ୍ୟକ୍ତି ହେବା ସହ ଦୀର୍ଘ ଦିନ ଧରି ଶ୍ରେଷ୍ଠ ୩ ଧନୀ ବ୍ୟକ୍ତିଙ୍କ ତାଲିକାରେ ମଧ୍ୟ ରହିଥିଲେ। ବର୍ତ୍ତମାନ ଫୋର୍ବସ ଅନୁଯାୟୀ ବିଶ୍ୱର ଧନଶାଳୀ ବ୍ୟକ୍ତିଙ୍କ ମଧ୍ୟରେ ମୁକେଶ ସପ୍ତମ ସ୍ଥାନ ହାସଲ କରିବା ସହ ବଫେଟ, ଗୁଗଲର ଲେରୀ ପେଜ୍ ଓ ସର୍ଜ ବ୍ରିନ୍ଙ୍କୁ ପଛରେ ପକାଇଦେଇଛନ୍ତି। ବିଶ୍ୱର ଶେଷ୍ଠ ୧୦ ଧନୀ ତାଲିକାରେ ସାରା ଏସିଆରୁ କେବଳ ମୁକେଶ ଅମ୍ବାନୀ ସାମିଲ ହୋଇଥିବା ଜଣାପଡ଼ିଛି। ଏହି ତାଲିକାରେ ସର୍ବପ୍ରଥମେ ଆମାଜନର ପ୍ରତିଷ୍ଠାତା ଜେଫ୍ ବେଜୋସ୍ ରହିଥିବା ବେଳେ ଦ୍ୱିତୀୟ ସ୍ଥାନରେ ମାଇକ୍ରୋସଫ୍ଟ କମ୍ପାନୀର ପ୍ରତିଷ୍ଠାତା ବିଲ୍ ଗେଟ୍ସ ରହିଛନ୍ତି। ସେହିପରି ତୃତୀୟ ସ୍ଥାନରେ ବର୍ନାଡ ଅର୍ନୋଲ୍ଟ ପରିବାର, ଚତୁର୍ଥ ସ୍ଥାନରେ ଫେସ୍ବୁକ୍ ପ୍ରତିଷ୍ଠାତା ମାର୍କ ଜୁକର ବର୍ଗ, ପଞ୍ଚମରେ ଷ୍ଟିଭ୍ ବାଲମର ଓ ଲେରି ଏଲ୍ସନ୍ ଷଷ୍ଠ ସ୍ଥାନ ଅକ୍ତିଆର କରିଛନ୍ତି। ସୂଚନାଯୋଗ୍ୟ, ଫୋର୍ବସ ରିୟଲ ଟାଇମ୍ ବିଲେନିୟର ର଼୍ୟାଙ୍କିଙ୍ଗ ପ୍ରତିମିନିଟ୍ରେ ଅପଡେଟ୍ ହୋଇଥାଏ। ଏଥିରେ କୋଟିପତିଙ୍କ ସମ୍ପତ୍ତିକୁ ସେମାନଙ୍କ କମ୍ପାନୀ କିମ୍ବା ଶେୟାରର ମୂଲ୍ୟ ଆଧାରରେ ମୂଲ୍ୟାଙ୍କନ କରାଯାଇଥାଏ। ଏଥିଯୋଗୁ ବିଲେନିୟରଙ୍କ ସମ୍ପତ୍ତି ପରିବର୍ତ୍ତନ ହେବା ସହ ର଼୍ୟାଙ୍କିଙ୍ଗ ମଧ୍ୟ ପରିବର୍ତ୍ତନ ହୋଇଥାଏ।
