ବୁଗୁଡ଼ା,୨୭ା୬(ଡି.ଏନ୍.ଏ.)- ବୁଗୁଡ଼ା ଥାନା ଅନ୍ତର୍ଗତ ୪ ସ୍ଥାନରେ କୋଭିଡ ନିୟମ ଉଲ୍ଲଂଘନ କରି ବାହାଘର ଭୋଜି ଚାଲିଥିବାବେଳେ ସେମାନଙ୍କ ଠାରୁ ୧୮ ହଜାର ଟଙ୍କା ଜରିମାନା ଆଦାୟ କରାଯାଇଛି। ଗୋଲିଆ ଗ୍ରାମର ୩ଟି ସ୍ଥାନରେ ଗୁରୁବାର ଲକ୍ଡାଉନ ତଥା କୋଭିଡ୍ ନିୟମ ଉଲ୍ଲଘଂନ କରି ବାହାଘର ଭୋଜିର ଆୟୋଜନ ଚାଲିଥିବା ବେଳେ ତହସିଲଦାର ସଂଗ୍ରାମ କେଶରୀ ଜେନା ଓ ଏସ୍ଆଇ କାର୍ତ୍ତିକ ନାୟକ ସଦଳବଳ ଚଢାଉ କରିଥିଲେ। ଭୋଜି କରୁଥିବା ୩ ଜଣଙ୍କ ଠାରୁ ୧୬ ହଜାର ଟଙ୍କା ଜରିମାନା ଆଦାୟ କରାଯାଇଥିଲା। ସେହିପରି ଶୁକ୍ରବାର ଭୋଗଡ଼ା ଠାରେ ତହସିଲଦାର ଓ ପୋଲିସ ଅଧିକାରୀ ମିଳିତ ଚଢ଼ାଉ କରି ଉକ୍ତ ଭୋଜି ସାମଗ୍ରୀକୁ ନଷ୍ଟ କରିବା ସହ ଭୋଜିର ଆୟୋଜନ କରିଥିବା ବ୍ୟକ୍ତିଙ୍କ ଠାରୁ ୨ ହଜାର ଟଙ୍କା ଜରିମାନା ଆଦାୟ କରିଥିଲେ। ଅପରପକ୍ଷେ ତହସିଲଦାର ବୁଗୁଡ଼ା ବୁଦ୍ଧଖୋଲ ଛକ ଠାରେ ଥିବା ଏକ ମଦ ଦୋକାନକୁ ମଧ୍ୟ ନିୟମ ମାନୁ ନ ଥିବାରୁ ସିଲ୍ କରିଛନ୍ତି।
