ନୂଆଦିଲ୍ଲୀ,୧୧।୧୧: ପୁଣି ଇସ୍ରାଏଲ ଉପରେ ରକେଟ୍ ମାଡ଼ କଲା ହେଜ୍ବୋଲ୍ଲା। ସୋମବାର ନର୍ଥନ ସିଟି ହାଇଫା ଆଡକୁ ୯୦ ରୁ ଅଧିକ ରକେଟ୍ ସହିତ ଇସ୍ରାଏଲ ଉପରେ ଏକ ନୂତନ ଷ୍ଟ୍ରାଇକ୍ କରିଛି ହେଜ୍ବୋଲ୍ଲା। ରିପୋର୍ଟ ଅନୁସାରେ ଏଥିରେ ପ୍ରାୟ ଚାରି ଜଣ ସାଧାରଣ ନାଗରିକ ଆହତ ହୋଇଛନ୍ତି।
ପ୍ରାଥମିକ ସୂଚନା ଅନୁଯାୟୀ ଇସ୍ରାଏଲର ଡିଫେନ୍ସ ସିଷ୍ଟମ ଆଇରନ ଡୋମ୍ ଅନେକ ରକେଟକୁ ଅଟକାଇବାରେ ସଫଳ ହୋଇଥିଲା। କିନ୍ତୁ ଅନେକ ରକେଟ ହାଇଫା ଉପକୂଳ ଜନବସତି ଅଞ୍ଚଳରେ ପହଞ୍ଚିବାରେ ସକ୍ଷମ ହୋଇଥିଲା।
ଇସ୍ରାଏଲର ସେନା କହିଛି ଯେ, ଏହି ରକେଟ ଗୁଡିକ ଗାଲିଲେ ଅଞ୍ଚଳରେ ମାଡ଼ କରାଯଇଅଥିଲା। ସେଗୁଡିକ ମଧ୍ୟରୁ ଅନେକ ସେନାର ଡିଫେନ୍ସ ସିଷ୍ଟମ ଆକାଶରେ ଧ୍ୱଂସ କରିଦେଇଥିଲା, କିନ୍ତୁ କିଛି ରକେଟ କାର୍ମିଏଲ ଏବଂ ସ୍ଥାନୀୟ ଅଞ୍ଚଳରେ ପଡିଥିଲା।
ରକେଟ ପଡିବା ଏବଂ ଏହା ପରା ସମୟର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେଉଛି। ଏହାର କିଛିକ୍ଷଣ ପରେ ଇସ୍ରାଏଲ ସେନା ଦାବିକରିଛି ଯେ, ଏକ ଡ୍ରୋନ୍ ଆକ୍ରମଣରେ ରକେଟ ମାଡ଼ ପାଇଁ ବ୍ୟବହାର ହୋଇଥିବା ଲଞ୍ଚରକୁ ଧ୍ବଂସ କରିଦିଆଯାଇଛି।
ତେବେ ଏହି ରକେଟ ମାଡ଼ ବହୁତ ବଡ ଅଟେ, କାରଣ ସେପ୍ଟେମ୍ବର ମାସରେ ପେଜର ଆକ୍ରମଣ ପଛରେ ହାତ ଥିବା ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ସ୍ୱୀକାର କରିବାର ଗୋଟିଏ ଦିନ ପରେ ଘଟିଛି। ଏହି ପେଜର ଆକ୍ରମଣରେ ଲେବନାନରେ ପ୍ରାୟ ୩୯ ଲୋକ ମୃତ୍ୟୁ ବରଣ କରିଥିବା ବେଳେ ୩୦୦୦ ରୁ ଅଧିକ ଲୋକେ ଆହତ ହୋଇଥିଲେ।