୯୫ ପ୍ରତିଶତରୁ ଅଧିକ ଗର୍ଭାଶୟ କର୍କଟ ଆକ୍ରାନ୍ତ ଗ୍ରାମାଞ୍ଚଳ ଗରିବ, ଶସ୍ତା ଟିକାକରଣ ଅଭିଯାନ ପାଇଁ ପ୍ରସ୍ତୁତି…

ନୂଆଦିଲ୍ଲୀ,୧୦।୮ : ଗର୍ଭାଶୟ କର୍କଟ ସମ୍ବନ୍ଧରେ ଏକ ଅଧ୍ୟୟନ ରିପୋର୍ଟ ସାମ୍ନାକୁ ଆସିଛି। ରିପୋର୍ଟ ଅନୁଯାୟୀ, ଦେଶରେ ଗର୍ଭାଶୟ କର୍କଟରେ ପୀଡିତ ୯୫ ପ୍ରତିଶତରୁ ଅଧିକ ଆକ୍ରାନ୍ତ ଗ୍ରାମାଞ୍ଚଳର ପରିବେଶରେ ବସବାସ କରୁଛନ୍ତି। ସେମାନଙ୍କ ଆର୍ଥିକ ସ୍ଥିତି ସ୍ବଚ୍ଛଳ ନୁହେଁ। ଆକ୍ରାନ୍ତଙ୍କ ମଧ୍ୟରେ ଅଧିକ ଗରିବ। ବିଶ୍ୱର ୯୦ ପ୍ରତିଶତ ଗର୍ଭାଶୟ କର୍କଟ ଆକ୍ରାନ୍ତ ଅତ୍ୟନ୍ତ ଗରିବ ଏବଂ ସ୍ବଳ୍ପ ଆୟକାରୀ ଦେଶରେ ଅଛନ୍ତି। ଏହି ରିପୋର୍ଟରୁ ଅନ୍ୟ ଦୁଇଟି ଗୁରୁତ୍ୱପୂର୍ଣ୍ଣ ତଥ୍ୟ ମଧ୍ୟ ସାମ୍ନାକୁ ଆସିଛି। ପ୍ରଥମତଃ ଯଦି ବାଳିକା ଏବଂ ମହିଳାମାନଙ୍କର ଠିକ ସମୟରେ ଟିକାକରଣ କରାଯାଏ ତେବେ ଏହି କର୍କଟକୁ ରୋକାଯାଇପାରିବ ।

ଅପରପକ୍ଷରେ, ଠିକ ସମୟରେ କର୍କଟ ଚିହ୍ନଟ ହୋଇଥିଲେ ମଧ୍ୟ ରୋଗୀର ଜୀବନ ରକ୍ଷା କରାଯାଇପାରିବ। ୨୧ ଟି ଏସୀୟ ଦେଶରେ କରାଯାଇଥିବା ଏହି ଅଧ୍ୟୟନ ରିପୋର୍ଟ ନିକଟରେ ଅନ୍ତର୍ଜାତୀୟ ପତ୍ରିକା ଦ ଲାନସେଟ ଦ୍ୱାରା ପ୍ରକାଶିତ ହୋଇଛି। ଦିଲ୍ଲୀର ଏମ୍ସରୁ ଅଙ୍କୋଲୋଜିଷ୍ଟ ଡାକ୍ତର ଅଭିଷେକ ଶଙ୍କର ଭାରତ ପକ୍ଷରୁ ଏହି ଅଧ୍ୟୟନରେ ଭାଗ ନେଇଥିଲେ।

ଡାକ୍ତରର ଅଭିଷେକ କହିଛନ୍ତି ୯୫ ପ୍ରତିଶତ ଗର୍ଭାଶୟ କର୍କଟ ମାନବ ପାପିଲୋମା ଭାଇରସ ଦ୍ୱାରା ହୋଇଥାଏ ଏବଂ ଏହାକୁ ରୋକାଯାଇପାରିବ। ଦ୍‌ଗର୍ଭାଶୟ କର୍କଟରୁ ରକ୍ଷା କରିବା ପାଇଁ ବିଶ୍ୱ ସ୍ବାସ୍ଥ୍ୟ ସଂଗଠନ ଏବଂ ଭାରତ ମିଳିତ ଭାବେ କାର୍ଯ୍ୟ କରୁଛନ୍ତି। ୨୦୩୦ ସୁଦ୍ଧା, ୧୫ ବର୍ଷ ବୟସର ୯୦ ପ୍ରତିଶତ ବାଳିକାଙ୍କୁ ଟିକା ଦେବା ପାଇଁ ଏକ ଲକ୍ଷ୍ୟ ଧାର୍ଯ୍ୟ କରାଯାଇଛି।

ଗର୍ଭାଶୟ କର୍କଟକୁ ରୋକିବା ପାଇଁ କେନ୍ଦ୍ର ସରକାର ଏକ ବଡ ଅଭିଯାନ ଆରମ୍ଭ କରିବାକୁ ନିଷ୍ପତ୍ତି ନେଇଛନ୍ତି। ଏହି ଟିକା ନିଜେ ଭାରତରେ ପ୍ରସ୍ତୁତ ହୋଇଛି। ଟିକାକରଣ ଅଭିଯାନ ଖୁବ ଶୀଘ୍ର ଏକ ବଡ଼ ଆକାରରେ ଆରମ୍ଭ ହେବ। ଏଥିରେ ମହିଳା ଏବଂ ବାଳିକାମାନଙ୍କୁ ସ୍ବଳ୍ପ ମୂଲ୍ୟରେ ଟିକା ଦିଆଯିବ। ବର୍ତ୍ତମାନ ବଜାରରେ ଉପଲବ୍ଧ ଏହି ଟିକା ପ୍ରତି ଡୋଜ ପିଛା ପ୍ରାୟ ୨ ହଜାର ଟଙ୍କା ରହିଛି।