ଦଶମନ୍ତପୁର,୨୬।୩ (ଅରବିନ୍ଦ ନାୟକ): କୋରାପୁଟ ଜିଲା ଦଶମନ୍ତପୁର ବ୍ଲକ ଅନ୍ତର୍ଗତ ପିଣ୍ଡାପଦର ପଞ୍ଚାୟତରେ ଏକ ଅଟୋ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ଥ ହୋଇଛି। ଏଥିରେ ଜଣଙ୍କର ମୃତ୍ୟୁ ହୋଇଥିବା ବେଳେ ୬ ଜଣ ଗୁରୁତର ହୋଇଛନ୍ତି। ଏହା ସହ ୧୦ ଆହତ ହୋଇଛନ୍ତି। ମୃତ ନାବାଳିକା ଜଣକ ହେଲେ ବରଗଛ ଗ୍ରାମର ଦିନବନ୍ଧୁ ଦିଶାରୀଙ୍କ ୧୭ ବର୍ଷିୟା ଝିଅ ଦାସୀ ଦିଶାରୀ। ତେବେ ସୁଶିଳା ମୁଦୁଲି (୧୫), ଅନିତା ମୁଦୁଲି (୧୫), ଅଙ୍ଗ୍ରାବତୀ ମୁଦୁଲି (୧୨), ଚଇତି ଦିଶାରୀ, ସବିତା ମୁଦୁଲି ଓ ରଙ୍ଗବତୀ ମୁଦୁଲି (୧୨) ଏହି ୬ ଜଣ ଗୁରୁତରଙ୍କୁ ପ୍ରାଥମିକ ଚିକିତ୍ସା ପରେ ଜିଲା ସ୍ବାସ୍ଥ୍ୟକେନ୍ଦ୍ରକୁ ପଠାଯାଇଛି। ୧୦ ଆହତ ସ୍ଥାନୀୟ ଚିକିତ୍ସାଳୟରେ ଚିକିତ୍ସିତ ହେଉଥିବା ଡାକ୍ତର ଦୀପକ କୁମାର ସାମଲ କହିଛନ୍ତି।
ପ୍ରକାଶ ଯେ, ଉକ୍ତ ପଞ୍ଚାୟତ ଅଧୀନରେ ଥିବା ବରଗଛ ଗ୍ରାମର ଚାଳକଙ୍କ ସମେତ ମୋଟ ୧୬ ଜଣ ଝିଅ ଏକ ଅଟୋ ଯୋଗେ ସ୍ଥାନୀୟ ଦଶମନ୍ତପୁର ସଦରମହକୁମାରେ ଚାଲିଥିବା ଦୋଳପୂର୍ଣ୍ଣିମାରେ ନାଟ ଦେଖି ଭୋର ସମୟରେ ଗାଁକୁ ଫେରୁଥିଲେ। ଏହି ସମୟରେ ଅଟୋଟି ଭାରସାମ୍ୟ ହରାଇ ମୁନ୍ଦାର ଗାଁ ନିକଟସ୍ଥ ଏକ କଲଭର୍ଟ ତଳକୁ ଖସିପଡ଼ିଥିବା ଦେଖିବାକୁ ମିଳିଛି।
ଖବର ପାଇଁ ଥାନା ଅଧିକାରୀ ସୁକୁମା ହାସଦାଙ୍କ ନେତୃତ୍ୱରେ ତଦନ୍ତକାରୀ ଅଧିକାରୀ ଏଏସ୍ଆଇ ଲଷ୍ମୀକାନ୍ତ ପଣ୍ଡା ଓଟୋଟିକୁ ଜବତ କରିବା ସହ ତଦନ୍ତ ଚଳାଇଛନ୍ତି।