ଅମରପାଲି,୨୨ା୧୧(ଡି.ଏନ୍.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ଥାନା ଅନ୍ତର୍ଗତ ଠେଙ୍ଗୋ ଡ୍ୟାମ ନିକଟରେ ନିର୍ମାଣାଧୀନ ପୋଲ କାମ କରୁଥିବା ବେଳେ ଏକ ଟ୍ରାକ୍ଟର ଦୁର୍ଘଟଣାଗ୍ରସ୍ତ ହୋଇଛି। ପୋଲକୁ ସଂଯୋଗ କରୁଥିବା ରାସ୍ତା ପାର୍ଶ୍ୱରେ ପଥର ପ୍ୟାଚିଂ ପାଇଁ ପଥର ଆଣୁଥିବା ବେଳେ ଏହି ଦୁର୍ଘଟଣା ଘଟିଛି। ଏଥିରେ ଟ୍ରାକ୍ଟର ଡ୍ରାଇଭରଙ୍କ ମୃତ୍ୟୁ ଘଟିଛି। ମୃତ ଡ୍ରାଇଭର ଜଣକ ହେଲେ ବରଗଡ଼ ଜିଲା ସୋହେଲା ବ୍ଲକ ଅନ୍ତର୍ଗତ ଝର ପଞ୍ଚାୟତ ଝରେଇ ଗ୍ରାମର ଦିଲୀପ ଛତର(୩୦)। ସୋମବାର ପୂର୍ବାହ୍ନରେ ପୋଲକୁ ସଂଯୋଗ ପାଇଁ ରାସ୍ତା ତିଆରି ପାଇଁ ପଥର ଆଣାଯାଉଥିଲା। ରାସ୍ତା କଡ଼ରେ ପଥର ଅନଲୋଡ ପରେ ଭାରସାମ୍ୟ ହରାଇ ଓଆର ୧୭ ଏଫ୍ ୦୧୨୫ ନମ୍ବର ବିଶିଷ୍ଟ ଟ୍ରାକ୍ଟରଟି ଓଲଟି ପଡ଼ିଥିଲା। ଡ୍ରାଇଭର ଜଣକ ତଳେ ଚାପି ହୋଇ ପଡ଼ିଥିଲେ। ନିକଟରେ କାମ କରୁଥିବା ଜେସିବି ସାହାଯ୍ୟରେ ଦିଲୀପଙ୍କୁ ଉଦ୍ଧାର କରାଯାଇ ବୀରମହାରାଜପୁର ଡାକ୍ତରଖାନା ନିଆଯାଇଥିଲା। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ଘଟଣାସ୍ଥଳରେ ପୋଲିସ ପହଞ୍ଚି ଅଧିକ ତଦନ୍ତ କରୁଛି।