ବିଶ୍ୱବାସୀଙ୍କ ନିଦ ହଜାଇ ସାରିଛି ମହାମାରୀ କରୋନା। ଭାରତରେ ମଧ୍ୟ ସଂକ୍ରମିତଙ୍କ ସଂଖ୍ୟା ବୃଦ୍ଧି ପାଇବାରେ ଲାଗିଥିବା ବେଳେ ମୃତକଙ୍କ ସଂଖ୍ୟା ମଧ୍ୟ ବଢ଼ୁଛି। ତେବେ ଅନ୍ୟ ରୋଗରେ ପୀଡ଼ିତ ଥିବା ବ୍ୟକ୍ତିବିଶେଷଙ୍କ କରୋନାରେ ଜୀବନହାନୀ ହେଉଥିବା ହେତୁ ସତର୍କ ରହିବାକୁ କୁହାଯାଉଛି। ଏହାଛଡ଼ା ଅଧିକ ଓଜନ ଥିବା ତଥା ମେଦବହୁଳତାରେ ପୀଡ଼ିତ ଥିବା ବ୍ୟକ୍ତିଙ୍କୁ କରୋନାରେ ମୃତ୍ୟୁ ଭୟ ତିନିଗୁଣା ଅଧିକ ରହିଛି। ବ୍ରିଟେନ୍ର ସରକାରୀ ଏଜେନ୍ସି ପବ୍ଲିକ୍ ହେଲ୍ଥ ଇଂଲଣ୍ଡର ଏକ ରିପୋର୍ଟରେ ଏହା କୁହାଯାଇଛି।
ମେଦବହୁଳ ରୋଗୀ କରୋନାରେ ଆକ୍ରାନ୍ତ ହେଲେ ଭେଣ୍ଟିଲେଟର ଆବଶ୍ୟକତା ପଡ଼ିଥାଏ। ଏହା ଅନ୍ୟ ବ୍ୟକ୍ତିଙ୍କଠାରୁ ୭ ଗୁଣା ଅଧିକ। ବଡି ମାସ୍ ଇଣ୍ଡେକ୍ସ ୨୫ରୁ ଅଧିକ ଥିଲେ ବ୍ୟକ୍ତିର ଓଜନ ଅଧିକ ବୋଲି କୁହାଯାଏ। ସେହିଭଳି ବଡି ମାସ୍ ଇଣ୍ଡେକ୍ସ ୩୦ରୁ ୩୫ ରହିଲେ କରୋନାରେ ମୃତ୍ୟୁ ଆଶଙ୍କା ୪୦% ଅଧିକ ହୋଇଯାଏ।
ଏହାର ଅର୍ଥ ନୁହେଁ ଯେ ଓଜନ ଅଧିକ ହେଲେ ସଂକ୍ରମିତର ଭୟ ଅଧିକ। ବରଂ ସଂକ୍ରମିତ ହେଲେ ମୃତ୍ୟୁର ସମ୍ଭାବନା ଅନ୍ୟଠାରୁ ୩ ଗୁଣ ଅଧିକ । ସେହିଭଳି ଭେଣ୍ଟିଲେଟର ଆବଶ୍ୟକତାର ସମ୍ଭାବନା ୭ଗୁଣ ଅଧିକ ଥାଏ। ଏଣୁ ଅଧିକ ଓଜନ ଥିବା ଲୋକ ଅସୁବିଧାକୁ ଦୃଷ୍ଟିରେ ରଖି ଓଜନ କମ୍ କରିବାର ଚେଷ୍ଟା କରିବା ଉଚିତ। ଫଳରେ କରୋନା ଯୋଗୁ ଉପୁଜିବାକୁଥgଥିବା qବିପଦ କମ୍ ହେବ।
ପୂର୍ବରୁ ବ୍ରିଟେନ୍ ପ୍ରଧାନମନ୍ତ୍ରୀ ବୋରିସ୍ ଜନସନ୍ କରୋନାର ଦ୍ୱିତୀୟ ପର୍ଯ୍ୟାୟକୁ ଦେଖି ନିଜର ଓଜନ କମ୍ କରିବାକୁ ଲୋକମାନଙ୍କୁ କହିଥିଲେ। କାରଣ ଶରୀରର ଓଜନ ଅଧିକ ରହିଲେ ଶ୍ୱାସକ୍ରିୟା ପ୍ରଭାବିତ ହୋଇଥାଏ। ଏପରିକି ରୋଗ ପ୍ରତିରୋଧକ ପ୍ରଣାଳୀ ଉପରେ ପ୍ରଭାବ ପକାଇଥାଏ।